Recent Post Recent Post
View More

on September 25, 2026


Na Mwandishi wa OTR - Arusha.


Serikali imesema Mkutano wa Wenyeviti wa Bodi na Watendaji Wakuu wa Taasisi za Umma (C-CEOs Forum) 2026, unaotarajiwa kuwakutanisha viongozi kutoka Mashirika zaidi ya 300 ya Umma, pamoja na wawakilishi wa Sekta Binafsi na washiriki wengine zaidi ya 700 kuanzia Septemba 28 hadi 30, 2026, utakuwa jukwaa muhimu la kuimarisha utendaji, tija na mchango wa Mashirika hayo katika utekelezaji wa Dira 2050.

Forum hiyo, inayoratibiwa na Ofisi ya Msajili wa Hazina (OTR), ni ya nne kufanyika tangu kuanzishwa kwake mwaka 2023 na inalenga kuwakutanisha Wenyeviti wa Bodi, Watendaji Wakuu wa Mashirika ya Umma na wadau mbalimbali kujadili namna ya kuongeza ufanisi wa taasisi hizo na kuhakikisha mipango na shughuli zao zinaendana na vipaumbele vya kitaifa vilivyoainishwa katika Dira 2050.

Akizungumza na waandishi wa habari ofisini kwake Ijumaa, Septemba 25, 2026, Mkuu wa Mkoa wa Arusha, Mhe. CPA Amos Gabriel Makalla, alisema kuwakutanisha viongozi wa Mashirika ya Umma katika jukwaa moja kunatoa fursa ya kujenga uelewa wa pamoja, kubadilishana uzoefu na kuimarisha ushirikiano kwa lengo la kuongeza tija na mchango wa Mashirika hayo katika maendeleo ya Taifa.

Amesema ni muhimu Mashirika ya Umma kuhakikisha mipango na shughuli zao zinaendana na malengo ya Dira 2050, ili rasilimali na uwekezaji unaosimamiwa na Serikali uweze kuzalisha matokeo yenye thamani zaidi kwa uchumi na wananchi.

“Tunataka mkutano huu uwe na manufaa yanayoonekana pia nje ya ukumbi wa mikutano, kwa kuwafungulia fursa wafanyabiashara, watoa huduma na wananchi wa Arusha,” alisema.

Mhe. Makalla amesema Arusha ina uzoefu wa kuhudumia mikutano mikubwa ya kitaifa na kimataifa na kwamba Mkoa uko tayari kuwapokea washiriki wa C-CEOs Forum 2026, huku akisisitiza umuhimu wa kuhakikisha mazingira ya usalama, utulivu na ukarimu kwa wageni.

“Watakaohudumia wageni wawe wakarimu ili warudi tena,” amesema, akieleza kuwa ujio wa washiriki zaidi ya 700 utatoa fursa kwa sekta mbalimbali za kiuchumi, ikiwemo hoteli, migahawa, usafiri, utalii, biashara na huduma nyingine.

Kwa upande wake, Msajili wa Hazina, Nehemiah Mchechu, alisema utekelezaji wa Dira 2050 unahitaji mabadiliko katika namna Mashirika ya Umma yanavyotazama utendaji wao, kutoka kwenye kuendesha taasisi na shughuli zake kwenda kwenye kuzalisha matokeo yanayopimika na yenye thamani kwa Taifa.

Kwa mtazamo wake, ufanisi wa juu unapaswa kuonekana katika uwezo wa Mashirika kutumia rasilimali na uwekezaji waliokabidhiwa kwa tija, kujenga ushindani, kuimarisha uimara wa kifedha na kutoa huduma zenye ubora, huku yakichangia kikamilifu katika ukuaji wa uchumi.

“Tunataka Mashirika ya Umma yenye ufanisi wa juu, shindani na imara katika kutekeleza Dira 2050,” alisema Mchechu.

Bw. Mchechu alisema thamani ya uwekezaji wa Serikali katika Mashirika na kampuni zake imeongezeka kutoka Sh67.95 trilioni mwaka 2020/21 hadi Sh92.28 trilioni mwaka 2024/25, sawa na ongezeko la asilimia 35.8, hali inayoongeza umuhimu wa kuhakikisha uwekezaji huo unazalisha matokeo makubwa zaidi.

Alisema matokeo hayo hayawezi kupimwa kwa gawio pekee, bali yanapaswa kuangaliwa kwa upana kupitia tija, ubora wa huduma, ufanisi wa matumizi ya rasilimali, uimara wa kifedha, ubunifu, matumizi ya teknolojia, uwezo wa kushindana na athari ya taasisi katika uchumi.

Kwa mtazamo huo, alisema Mashirika ya Umma yanapaswa kujenga uwezo wa kubadilika kulingana na mazingira ya uchumi, teknolojia na mahitaji ya wananchi, huku uongozi na bodi zikibeba jukumu muhimu la kuweka mwelekeo wa utendaji na uwajibikaji.

“C-CEOs Forum inalenga kuangalia kwa upana zaidi jinsi ya kubadilisha rasilimali na uwekezaji kuwa utendaji na matokeo yenye thamani zaidi,” alisema.

Bw. Mchechu alisema ongezeko la mapato yasiyo ya kodi linalotokana na Mashirika na taasisi zinazochangia kupitia Ofisi ya Msajili wa Hazina, linaonesha pia umuhimu wa kuendelea kuboresha utendaji wa taasisi hizo.

Mapato hayo yameongezeka kutoka Sh637.7 bilioni mwaka 2020/21 hadi Sh1.327 trilioni mwaka 2025/26, sawa na ongezeko la asilimia 108.3.

Alisema kwa hiyo, mjadala kuhusu Mashirika ya Umma haupaswi kuishia kwenye suala la kiasi cha fedha kinachowasilishwa Serikalini, bali unapaswa kuangalia thamani pana inayozalishwa na uwekezaji wa umma, ikiwemo huduma, ajira, uzalishaji, ubunifu, ushindani na mchango katika uchumi.

Katika mtazamo wake, maeneo hayo yanahitaji uongozi wenye mwelekeo wa kimkakati, utawala bora, matumizi makubwa zaidi ya teknolojia za kidijitali na akili bandia, mifumo endelevu ya upatikanaji wa fedha, pamoja na ushirikiano kati ya sekta ya umma na binafsi.

Alisema pia Mashirika yanahitaji kuwekeza katika rasilimali watu na ujuzi wa baadaye ili yaweze kukabiliana na mabadiliko ya kiteknolojia, kiuchumi na kimazingira, sambamba na kuzingatia masuala ya mazingira, jamii na utawala bora.

soma zaidi »

on September 25, 2026

 

Kampuni ya JETOUR Tanzania imezindua JETOUR Club na kutambulisha magari mawili mapya yenye teknolojia ya plug-in hybrid, JETOUR G700 na JETOUR F700, hatua inayolenga kuwapa Watanzania chaguo zaidi katika matumizi ya usafiri unaozingatia ufanisi wa nishati.

Uzinduzi huo unafanyika wakati dunia ikikabiliwa na changamoto za upatikanaji wa mafuta na kuongezeka kwa gharama za nishati, hali inayosukuma matumizi ya teknolojia zinazolenga kupunguza utegemezi wa mafuta.

Tanzania nayo inaendelea kuchukua hatua katika kuhamasisha matumizi yenye ufanisi ya nishati na kupunguza matumizi yasiyo ya lazima ya mafuta, chini ya uongozi wa Rais wa Jamhuri ya Muungano wa Tanzania, Dkt. Samia Suluhu Hassan.

Kwa mujibu wa JETOUR Tanzania, magari hayo mapya yanachanganya matumizi ya umeme na mafuta, hivyo kumpa mtumiaji fursa ya kutumia umeme katika safari fupi na mafuta kwa safari ndefu, kulingana na mahitaji ya safari.

Hatua hiyo inalenga kuongeza chaguo kwa Watanzania wanaohitaji magari yenye uwezo wa kufanya kazi katika mazingira mbalimbali, huku wakipata fursa ya kutumia teknolojia inayoweza kusaidia kupunguza matumizi ya mafuta ikilinganishwa na magari yanayotegemea mafuta pekee.

Uzinduzi huo umefanyika chini ya kaulimbiu “Africa Expedition 2025”, ikiwa ni sehemu ya mpango wa JETOUR Tanzania kwa kushirikiana na Africarriers Group wa kuimarisha uwepo wa chapa hiyo katika soko la Tanzania, sambamba na kuunganisha teknolojia ya magari ya kizazi kipya na uzoefu mpana wa umiliki.

Akizungumza katika hafla hiyo, Mkurugenzi Mtendaji wa JETOUR Tanzania, Zain Pirbhai, amesema kampuni hiyo inalenga kuwapatia wateja magari yanayokidhi mahitaji ya matumizi ya kila siku, safari za masafa marefu pamoja na shughuli za nje.

Amesema teknolojia ya plug-in hybrid inatoa unyumbufu zaidi katika matumizi ya nishati, kwa kumwezesha mtumiaji kutumia umeme na mafuta kulingana na aina na umbali wa safari.

“Tunataka kuwapa wateja wetu magari yanayokidhi mahitaji yao ya kila siku, safari ndefu na shughuli mbalimbali za nje, huku wakinufaika na teknolojia ya kisasa inayowapa unyumbufu katika matumizi ya nishati,” amesema Pirbhai.

















soma zaidi »

on September 25, 2026




Wizara ya Elimu, Sayansi na Teknolojia imefanya marekebisho ya ratiba ya upimaji na mitihani ya Taifa kwa mwaka 2026, kwa lengo la kuzuia athari zinazoweza kujitokeza kutokana na uwezekano wa mvua kubwa za El Nino zinazotarajiwa katika baadhi ya maeneo nchini.

Akizungumza Jijini Dar es Salaam, Septemba 25, 2026, Naibu Waziri wa Elimu, Sayansi na Teknolojia, Mhe. Wanu Hafidh Ameir, amesema hatua hiyo imechukuliwa baada ya Serikali kufuatilia kwa karibu taarifa za hali ya hewa na kutathmini athari zinazoweza kujitokeza katika uendeshaji wa upimaji na mitihani ya Taifa.

Amesema kwa mujibu wa utabiri rasmi wa Mamlaka ya Hali ya Hewa Tanzania, kuna uwezekano wa kutokea kwa El Nino yenye nguvu, huku mvua zikitarajiwa kuanza katika baadhi ya maeneo mwezi Oktoba 2026 na kuwa nyingi zaidi mwezi Novemba 2026, hali ambayo inaweza kuathiri usafiri na kufikika kwa baadhi ya vituo vya mitihani.

Ameeleza kuwa kwa kuzingatia jiografia ya nchi na uwezekano wa baadhi ya maeneo kukumbwa na mafuriko, changamoto za usafiri na athari nyingine zinazoweza kusababishwa na hali ya hewa, Wizara kwa kushirikiana na Baraza la Mitihani la Tanzania imefanya marekebisho ya ratiba ya upimaji na mitihani ya Taifa.

Kwa mujibu wa ratiba iliyorekebishwa, Upimaji wa Kitaifa wa Darasa la Pili Ngazi ya Shule utafanyika Oktoba 7 hadi 8, 2026, wakati Upimaji wa Kitaifa wa Darasa la Nne utafanyika Oktoba 5 hadi 6, 2026.

Aidha, Upimaji wa Kitaifa wa Kidato cha Pili utafanyika Oktoba 12 hadi 23, 2026, huku Mitihani ya Kidato cha Nne ikifanyika kuanzia Oktoba 19 hadi Novemba 6, 2026.

Amesema marekebisho hayo yanalenga kuhakikisha usalama wa wanafunzi, walimu, wasimamizi, maafisa na wadau wengine wanaohusika na uendeshaji wa mitihani, pamoja na kulinda mitihani, vifaa na nyaraka muhimu.

Ameongeza kuwa iwapo ratiba ya awali ingeendelea na mvua kubwa zikajitokeza mwezi Novemba 2026, changamoto zingeweza kujitokeza katika usafirishaji na ufikishaji wa mitihani, vifaa na nyaraka muhimu katika vituo, huku wanafunzi na wasimamizi wakikabiliwa na ugumu wa kufika kwa wakati kutokana na mafuriko na uharibifu wa barabara.

Wizara imeendelea kufuatilia kwa karibu mwenendo wa hali ya hewa na kuchukua hatua stahiki kwa kushirikiana na mamlaka na taasisi husika, ili kuhakikisha upimaji na mitihani ya Taifa inafanyika kwa utaratibu unaofaa, huku usalama wa wanafunzi, walimu, wasimamizi na wadau wengine ukipewa kipaumbele.








soma zaidi »

on September 25, 2026

Waziri wa Nchi, Ofisi ya Waziri Mkuu- Kazi, Ajira na Mahusiano, Mhe. Deus Sangu (katikati), akizungumza alipotembela bdna la mfuko wa hifadhi ya jamii kwa watumishi wa umma (psssf) kwenye maonesho ya 9 ya teknolojia ya madini mkoani geita. Kulia ni Katibu Tawala Mkoa wa Geita Bw. Mohammed Gombati na kushoto ni Kaimu Meneja wa PSSSF Kanda ya Ziwa Magharibi, Bw. Nathan Makuchilo

Waziri wa Nchi, Ofisi ya Waziri Mkuu- Kazi, Ajira na Mahusiano, Mhe. Deus Sangu (kushoto) akisaini kitabu cha wageni wakati alipotembelea banda la PSSSF kwenye Maonesho ya 9 ya Teknolojia ya Madini mkoani Geita. Anayemshuhudia ni Kaimu Meneja wa PSSSF Kanda ya Ziwa Magharibi, Bw. Nathan Makuchilo

Geita, Septemba 24, 2026 — Waziri wa Nchi, Ofisi ya Waziri Mkuu – Kazi, Ajira na Mahusiano, Mhe. Deus Sangu, ameupongeza Mfuko wa Hifadhi ya Jamii kwa Watumishi wa Umma (PSSSF) kuwa mfano wa kuigwa kutokana na mafanikio makubwa katika kuimarisha thamani ya mfuko na kuboresha huduma kwa wanachama na wastaafu.

Mhe. Sangu ameyasema hayo alipotembelea banda la PSSSF kwenye Maonesho ya 9 ya Teknolojia ya Madini Mjini Geita akibainisha kuwa  katika kipindi cha uongozi wa Rais Dkt. Samia Suluhu Hassan, thamani ya mfuko imepanda kutoka Shilingi Trilioni 7.4 Serikali ilipoingia madarakani hadi Shilingi Trilioni 16.96 hivi sasa. “Ongezeko hilo la zaidi ya mara mbili linaonesha uthabiti, uwazi na usimamizi thabiti wa rasilimali za wanachama,” amesema.


Kuhusu ulipaji wa mafao, amesema kupitia kaulimbiu ya “Tunalipa Jana,” wastaafu hupata mafao yao mara wanapostaafu na pensheni ya kila mwezi hulipwa kabla ya tarehe 25. Ameongeza kuwa PSSSF inashirikiana na waajiri kutoa elimu na kuwaandaa wastaafu, huku akisisitiza watumishi kujiandaa mapema kabla ya kustaafu ili kufanikisha malipo kwa wakati.


Kuhusu matumizi ya TEHAMA, Mhe. Sangu amesema PSSSF imewekeza kwenye mfumo wa PSSSF KIDIJITAL unaomwezesha mstaafu kuhakikiwa kidijitali akiwa popote alipo, hatua iliyoondoa adha ya kusafiri hadi ofisi za Mfuko kwa ajili ya uhakiki.

soma zaidi »

on September 25, 2026

Waziri wa Elimu, Sayansi na Teknolojia, Prof. Adolf Mkenda, ameshiriki mkutano wa GPE Multiplier Possibility wenye lengo la kuchangisha fedha kwa ajili ya kuimarisha elimu duniani, uliofanyika katika ECOSOC Chamber, Makao Makuu ya Umoja wa Mataifa (UN), New York, Marekani.

Mkutano huo umeongozwa na Rais Mstaafu wa Jamhuri ya Muungano wa Tanzania na Mwenyekiti wa Bodi ya Wakurugenzi wa Global Partnership for Education (GPE), Mheshimiwa Jakaya Mrisho Kikwete.

Mkutano huo umejikita katika juhudi za kutafuta na kuhamasisha rasilimali kutoka kwa wadau wa elimu duniani kupitia mfuko wa GPE, kwa lengo la kusaidia nchi wanachama kuimarisha na kufadhili miradi mbalimbali ya elimu.

Kupitia mpango huo, wadau wa elimu duniani wanahamasishwa kutoa michango itakayowezesha kuongeza uwekezaji katika sekta ya elimu, hususan katika maeneo yanayohitaji rasilimali zaidi kwa ajili ya kuboresha upatikanaji na ubora wa elimu.

Tanzania ni miongoni mwa nchi zinazowanufaika na ufadhili wa Global Partnership for Education (GPE), unaolenga kusaidia nchi katika kuimarisha mifumo ya elimu na kutekeleza mipango mbalimbali ya maendeleo ya elimu.

soma zaidi »

on September 25, 2026

 


Mgeni Rasmi, Waziri Ridhiwani Kikwete, akikabidhi tuzo ya shukrani  kwa PSSSF iliyopokelewa na Meneja wa PSSSF  Kanda ya Kati Bw. Sayi Lulyalya wakati wa ufunguzi wa Mkutano Mkuu wa 14 wa Chama cha Menejimenti ya Kumbukumbu na Nyaraka Tanzania (TRAMPA).

Picha ya maafisa kumbukumbu na nyaraka kutoka PSSSF, waliohudhuria Mkutano Mkuu wa 14 wa TRAMPA

Wanachama wa PSSSF wakihudumia kandoni mwa Mkutano Mkuu wa 14 wa Maafisa Kumbukumbu na Nyaraka kutoka Ofisi za Umma jijini Dodoma

Dodoma, Septemba 23, 2026

Mfuko wa Hifadhi ya Jamii kwa Watumishi wa Umma (PSSSF) umeshiriki katika Mkutano wa 14 wa Chama cha Menejimenti ya Kumbukumbu na Nyaraka Tanzania (TRAMPA) uliofunguliwa rasmi Jumatano, Septemba, 2026 na Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe, Ridhiwani Kikwete ambaye aliwataka wanachama wa TRAMPA kuhakikisha historia ya Taifa inalindwa, pamoja na kutoa huduma bora kwa wananchi wanaofika katika ofisi za umma.

Mhe. Ridhiwani Kikwete ameiagiza Taasisi za Umma kuanzisha vituo vya kisasa vya utunzaji wa kumbukumbu na nyaraka, huku akisisitiza matumizi ya mfumo wa Ofisi Mtandao (e-Office).

“Naagiza  Ofisi ya Rais, Menejimenti ya Utumishi wa Umma na Utawala Bora kufuatilia mara kwa mara matumizi ya mfumo huo na kubaini ofisi ambazo hazitumii mfumo huo ili hatua zichukuliwe” aliagiza Mhe. Kikwete  

Aidha, Mhe, Ridhiwani Kikwete alihitimisha hotuba yake kwa  kuagiza Ofisi za Umma kuwekeza nguvu katika matumizi sahihi ya kumbukumbu na kutathmini utekelezaji wa Dira ya Maendeleo ya Taifa ya 2050.

Pembeni mwa mkutano huo wa, PSSSF ilishiriki kwa kutoa huduma kwa wanachama wa TRAMPA ambao ni wanachama wa PSSSF. Mfuko hutumia majukwaa kama haya ili kutoa elimu na huduma kwa wanachama wake.

Afisa Matekelezo Mkuu wa PSSSF Mkoa wa Dodoma, Juma Milinga, amewasisitiza wanachama wa Chama cha Menejimenti ya Kumbukumbu na Nyaraka nchini (TRAMPA) kuendelea kujisajili na kutumia mifumo ya kidigitali katika kupata huduma za mfuko huo badala ya kutegemea matumizi ya makaratasi.

Ameyasema hayo wakati akizungumza katika Mkutano wa 14 wa TRAMPA uliofanyika jijini Dodoma leo Septemba 24, 2026.

Milinga amesema matumizi ya mifumo ya kidigitali yamesaidia kupunguza ucheleweshaji wa madai pamoja na kupunguza changamoto ya upotevu wa nyaraka, hatua inayowezesha wanachama kupata huduma kwa wakati.

Kwa upande wao, baadhi ya wanachama wa TRAMPA wameiomba Serikali kupitia PSSSF kuendelea kutoa elimu kuhusu huduma za PSSSF, sambamba na kuboresha miundombinu ya mawasiliano ili wanachama walioko maeneo ya vijijini waweze kupata huduma za mfuko huo kwa ufanisi.

mwisho

soma zaidi »

on September 25, 2026

Mgeni Rasmi, Waziri Ridhiwani Kikwete, akikabidhi tuzo ya shukrani  kwa PSSSF iliyopokelewa na Meneja wa PSSSF  Kanda ya Kati Bw. Sayi Lulyalya wakati wa ufunguzi wa Mkutano Mkuu wa 14 wa Chama cha Menejimenti ya Kumbukumbu na Nyaraka Tanzania (TRAMPA).

Picha ya maafisa kumbukumbu na nyaraka kutoka PSSSF, waliohudhuria Mkutano Mkuu wa 14 wa TRAMPA

Wanachama wa PSSSF wakihudumia kandoni mwa Mkutano Mkuu wa 14 wa Maafisa Kumbukumbu na Nyaraka kutoka Ofisi za Umma jijini Dodoma

Dodoma, Septemba 23, 2026

Mfuko wa Hifadhi ya Jamii kwa Watumishi wa Umma (PSSSF) umeshiriki katika Mkutano wa 14 wa Chama cha Menejimenti ya Kumbukumbu na Nyaraka Tanzania (TRAMPA) uliofunguliwa rasmi Jumatano, Septemba, 2026 na Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe, Ridhiwani Kikwete ambaye aliwataka wanachama wa TRAMPA kuhakikisha historia ya Taifa inalindwa, pamoja na kutoa huduma bora kwa wananchi wanaofika katika ofisi za umma.

Mhe. Ridhiwani Kikwete ameiagiza Taasisi za Umma kuanzisha vituo vya kisasa vya utunzaji wa kumbukumbu na nyaraka, huku akisisitiza matumizi ya mfumo wa Ofisi Mtandao (e-Office).

“Naagiza  Ofisi ya Rais, Menejimenti ya Utumishi wa Umma na Utawala Bora kufuatilia mara kwa mara matumizi ya mfumo huo na kubaini ofisi ambazo hazitumii mfumo huo ili hatua zichukuliwe” aliagiza Mhe. Kikwete  

Aidha, Mhe, Ridhiwani Kikwete alihitimisha hotuba yake kwa  kuagiza Ofisi za Umma kuwekeza nguvu katika matumizi sahihi ya kumbukumbu na kutathmini utekelezaji wa Dira ya Maendeleo ya Taifa ya 2050.

Pembeni mwa mkutano huo wa, PSSSF ilishiriki kwa kutoa huduma kwa wanachama wa TRAMPA ambao ni wanachama wa PSSSF. Mfuko hutumia majukwaa kama haya ili kutoa elimu na huduma kwa wanachama wake.

Afisa Matekelezo Mkuu wa PSSSF Mkoa wa Dodoma, Juma Milinga, amewasisitiza wanachama wa Chama cha Menejimenti ya Kumbukumbu na Nyaraka nchini (TRAMPA) kuendelea kujisajili na kutumia mifumo ya kidigitali katika kupata huduma za mfuko huo badala ya kutegemea matumizi ya makaratasi.

Ameyasema hayo wakati akizungumza katika Mkutano wa 14 wa TRAMPA uliofanyika jijini Dodoma leo Septemba 24, 2026.

Milinga amesema matumizi ya mifumo ya kidigitali yamesaidia kupunguza ucheleweshaji wa madai pamoja na kupunguza changamoto ya upotevu wa nyaraka, hatua inayowezesha wanachama kupata huduma kwa wakati.

Kwa upande wao, baadhi ya wanachama wa TRAMPA wameiomba Serikali kupitia PSSSF kuendelea kutoa elimu kuhusu huduma za PSSSF, sambamba na kuboresha miundombinu ya mawasiliano ili wanachama walioko maeneo ya vijijini waweze kupata huduma za mfuko huo kwa ufanisi.

mwisho

soma zaidi »

on September 25, 2026



Na Denis Chambi, Tanga.


WAKATI Serikali na wadau mbalimbali wakiendelea kuweka mipango madhubuti ambayo ni tahadhari juu ya ujio wa Mvua za El- Nino Mamlaka ya Bima Tanzania 'TIRA' imesema kuwa inaendelea kutoa elimu kwa watumiaji wa bahari wakiwemo wavuvi wanaofanya shughuli zao za usafirishaji wa abiria na mizigo ili wawe na huduma ya bima itakayowasaidia pindi watakapopata changamoto.


Hayo yamebainishwa na Meneja wa Mamlaka ya Bima Tanzania (TIRA) Kanda ya Kaskazini Dk. Emmanuel Lupilya wakati alipokuwa akitoa maelezo kwa Naibu Waziri wa ujezi na uchukuzi David Kihenzile alipotembelea na kukagua Banda la Mamlaka hiyo katika kilele cha maadhimisho ya siku ya usafirishaji na usafiri majini Duniani iliyofanyika mkoani Tanga  wakieleza namna jinsi walivyojipanga kuendelea kutoa elimu kwa wananchi na watumiaji wa bahari.


Dk. Lupilya amesema kuwa lengo lao ni kuhakikisha  kuwa mizigo yote ya ndani na nje ya nchi  inayosafirishwa kupitia usafiri wa majini katika vyombo mbalimbali ikiwemo Mashua viwe vimekatiwa bima ambayo itakuwa ni kinga itakayowasaidia pindi yanapotokea majanga.


"Tunaendelea kutoa elimu kwa watu wenye Mashua wanaosafirisha mali, mizigo na abiria lakini pia wameweza katika vyombo vyao ni lazima tutengeneze bidhaa muhimu inayomlinda Mmiliki huyu, tumejipanga kuhakikisha kwamba mizigo yote inayoingia iwe ya Tanzania au nje ya nchi na yenyewe ni lazima ikatiwe bima tutawaelimisha ili kukinga athari zinazoweza kujitokeza wakati wakifanya shughuli zao hili ni eneo ambalo tunakwenda kuliwekea msisitizo" amesema


Aidha Meneja huyo ameipongeza Serikali kwa jinsi inayoendelea kuboresha miundombinu ya bahari pamoja na Bandari ikiwemo Bandari ya Tanga ambayo imeanza kuleta manufaa akisema kuwa maendeleo hayo yaendane na mabadiliko kwa jamii kupitia fursa zilizopo kwenye uchumi wa buluu .


Ameongeza kuwa TIRA imemfanya mazungumzo na Mamlaka ya Bandari Tanzania (TPA) kushirikiana kwa lengo kuhakikisha kuwa vyombo vyote vya usafiri vinavyoingia hapa nchini viwe vimekatiwa bima hii ikiwa ni utekelezaji wa sheria ya bima.


"Tayari tumefanya majadiliano na wenzetu wa Mamlaka ya Bandari Tanzania (TPA)  kuhakikisha kuwa wale wanaoingia  na vyombo vyao lazima vikatiwe bima hapa nchini lakini pia shughuli zote zinazofanyika za kuingiza na kutoa  mizigo ni lazima vikatiwe bima hii ni kwa mujibi wa Sheria ya bima namba 394 lakini pia tunasisitiza ulinzi wa mali zao" amesema Meneja huyo.


Akifunga maonesho hayo kitaifa kwa mwaka 2026 Naibu Waziri wa ujezi na uchukuzi David Kihenzile amesema kuwa sekta ya usafiri majini umekuwa ni kiungo muhimu kwa Tanzania na mataifa mengine ambapo zaidi ya nchi saba zinategemea na kuchukua   mizigo mbalimbali  kutoka hapa nchini.


Ameongeza kuwa  kulingana na takwimu za Mamlaka ya Mapato Tanzania 'TRA' sekta ya usafiri na usafirishaji majini umekuwa ukichangia asilimia 40 ya Pato la Taifa.


"Sekta hii ni muhimu kwa Taifa letu na Duniani kote, nchi yetu inahudumia  zaidi ya nchi saba zikitegemea  mizigo kutoka Tanzania , kulingana na taarifa za  mapato ya TRA  asilimia 40  ya pato la  Taifa inachangiwa  na  usafirishaji wa majini hivyo sekta hii ni muhimu sana kiuchumi inatusaidia sana" amesema Naibu Waziri .


Hata hivyo ameiagiza Wakala wa  Meli Tanzania TASAC kwa kushirikiana na  ZMA  kuhakikisha zinaendelea kufanyanga ukaguzi wa mara kwa mara  kwenye vyombo vyote vinavyotumia usafiri huo ili kuepukana na changamoto ambazo zinaweza kujitokeza wawapo safarini.

soma zaidi »

on September 25, 2026

TUME ya Nguvu za Atomu Tanzania (TAEC) imeendelea kuimarisha usalama wa mionzi na nyuklia katika mipaka ya nchi kwa kuwajengea uwezo wataalamu wake kuhusu uendeshaji, matengenezo na utunzaji wa vifaa vinavyotumika kugundua mionzi katika maeneo mbalimbali ya kuingia na kutoka nchini.

Hatua hiyo inalenga kuhakikisha vifaa vilivyowekwa katika maeneo ya kimkakati mipakani vinafanya kazi kwa ufanisi na vinaendelea kuwa katika hali nzuri wakati wote, ili kusaidia kubaini uwepo wa vifaa vya mionzi au nyuklia vinavyoweza kuingizwa au kusafirishwa nchini bila kufuata taratibu zinazotakiwa.

Akizungumza jijini Mwanza wakati wa mafunzo hayo, Mkurugenzi wa Teknolojia na Huduma za Ufundi wa TAEC, Dkt. Remigius Kawala, amesema Tume imeendelea kuwekeza katika vifaa na miundombinu ya kisasa ili kuongeza uwezo wake wa kutoa huduma za kitaalamu kwa usahihi na kwa viwango vinavyokubalika.

Amesema katika mwaka huu wa fedha, TAEC imenunua vifaa mbalimbali vya maabara vyenye thamani ya takribani Sh bilioni 3, ikiwa ni sehemu ya uwekezaji unaolenga kuimarisha uwezo wa Tume katika kufanya vipimo, uchunguzi na tafiti mbalimbali zinazohusiana na matumizi salama ya teknolojia ya nyuklia.

Kwa mujibu wa Dkt. Kawala, wataalamu wamekutana kwa siku mbili katika Kanda ya Ziwa kujitathmini kuhusu namna huduma za maabara zinavyotolewa, hali na ubora wa vifaa vinavyotumika pamoja na kuweka mikakati ya kuhakikisha vipimo vinavyofanyika vinakuwa sahihi na vya kuaminika.

“Tumekutana wataalamu Kanda ya Ziwa kwa lengo la kuweka mikakati ya utoaji wa huduma za maabara kwa usahihi bila kuwa na mashaka. Hivi ni vipimo ambavyo vinapaswa kuendana na viwango vinavyotambulika duniani,” amesema Dkt. Kawala.

Ameeleza kuwa TAEC ina takribani maabara tano katika maeneo mbalimbali nchini, ikiwemo Zanzibar, huku pia ikitoa huduma katika maeneo mbalimbali ya mipakani. Kutokana na ukubwa wa majukumu hayo, uwekezaji katika vifaa vya kisasa na kuwajengea uwezo wataalamu ni muhimu katika kuhakikisha huduma zinazotolewa zinakuwa na ubora unaotakiwa.

Katika mafunzo hayo, wataalamu wamejengewa uwezo wa kuendesha kwa usahihi vifaa vya kugundua mionzi vilivyowekwa mipakani, kufanya ukaguzi na matengenezo ya kawaida pamoja na kuvihifadhi na kuvitunza ili viweze kufanya kazi kwa ufanisi kwa muda mrefu.

Mafunzo hayo pia yameweka mkazo katika namna ya kutambua na kuchukua hatua pale vifaa vinapotoa tahadhari ya uwepo wa mionzi, sambamba na kuzingatia taratibu za kujikinga na mionzi wakati wa utekelezaji wa majukumu yao.

Vifaa hivyo vina umuhimu mkubwa katika mfumo wa usalama wa nchi kwa kuwa vinasaidia kugundua na kuzuia usafirishaji usioidhinishwa wa vifaa vya mionzi na nyuklia kupitia mipaka na maeneo mengine ya kimkakati ya kuingia na kutoka nchini.

Dkt. Kawala amesema uwekezaji unaoendelea kufanywa na Serikali unalenga kuhakikisha TAEC inakuwa na uwezo wa kufanya vipimo, uchunguzi na tafiti mbalimbali kwa kutumia vifaa vya kisasa, huku matumizi ya teknolojia ya nyuklia yakifanyika kwa kuzingatia viwango vinavyotakiwa vya usalama.

Ameongeza kuwa teknolojia ya nyuklia haipaswi kuonekana kama eneo linalohusu kundi fulani la wataalamu pekee, kwa kuwa matumizi yake yana mchango katika maisha ya wananchi kupitia sekta mbalimbali zikiwemo afya, kilimo, viwanda, mazingira na utafiti.

Kwa upande wake, Mkuu wa Kitengo cha Mawasiliano wa TAEC, Bw. Peter Ngamilo, amesema pamoja na uwekezaji unaofanywa katika vifaa na kuwajengea uwezo wataalamu, Tume itaendelea kutoa elimu kwa umma ili wananchi waelewe umuhimu wa matumizi salama ya mionzi na teknolojia ya nyuklia katika maendeleo ya Taifa.

“Ni muhimu wananchi waelewe kuwa teknolojia ya nyuklia ina matumizi mengi yenye manufaa katika maisha yetu. Jukumu letu ni kuhakikisha matumizi hayo yanafanyika kwa usalama, lakini pia wananchi wanapata taarifa sahihi kuhusu kazi zinazofanywa na TAEC katika kuwalinda wao na mazingira dhidi ya madhara yanayoweza kutokana na matumizi yasiyo salama ya mionzi,” amesema Ngamilo.

Amesema uwepo wa vifaa vya kugundua mionzi katika maeneo ya mipakani ni sehemu muhimu ya mfumo wa ulinzi na usalama, kwa kuwa unasaidia kuhakikisha vifaa vya mionzi vinavyoingia au kutoka nchini vinatambuliwa na kushughulikiwa kwa mujibu wa taratibu zilizowekwa.

Aidha, Serikali imeendelea kuweka mazingira yanayowezesha taasisi za umma na sekta binafsi kushirikiana katika matumizi ya teknolojia ya nyuklia kwa madhumuni ya amani na maendeleo, ili manufaa ya teknolojia hiyo yaweze kuwafikia wananchi wengi zaidi.

Katika hatua nyingine, Dkt. Kawala amesema TAEC ipo katika hatua za mwisho za kupata ithibati zinazohitajika kwa ajili ya maabara yake kubwa na ya kisasa iliyopo jijini Arusha. Kukamilika kwa hatua hiyo kutaongeza uwezo wa maabara hiyo kutoa huduma za vipimo na uchunguzi kwa kuzingatia viwango vinavyotambulika.

Maabara hiyo inatarajiwa kuongeza uwezo wa Tanzania kufanya vipimo na tafiti za kitaalamu nchini na hivyo kuimarisha upatikanaji wa huduma zinazohusiana na teknolojia ya nyuklia pamoja na kupunguza utegemezi wa baadhi ya huduma kutoka nje ya nchi.

TAEC imeendelea kuimarisha uwezo wa Taifa katika usalama wa mionzi na nyuklia kupitia uwekezaji katika vifaa na miundombinu, mafunzo kwa wataalamu, usimamizi wa matumizi salama ya mionzi pamoja na ushirikiano na taasisi mbalimbali za ndani na nje ya nchi.

Hatua hizo zinalenga kuhakikisha teknolojia ya nyuklia na mionzi inaendelea kutumika kwa usalama na kwa madhumuni ya amani, huku afya ya wananchi, wafanyakazi na mazingira ikilindwa.

soma zaidi »

on September 25, 2026


Same – Kilimanjaro


Mjumbe wa Kamati ya Siasa ya Chama Cha Mapinduzi (CCM) Wilaya ya Same, Mariam Mjema, ameshiriki katika mapokezi ya Naibu Katibu Mkuu wa CCM Tanzania Bara, Ndugu Aggrey Mwanri, aliyewasili  wilayani Same kuanza ziara ya kikazi.


Ndugu Mwanri amewasili katika Ofisi za CCM Wilaya ya Same, Jana ikiwa ni sehemu ya ziara yake iliyolenga kutembelea maeneo mbalimbali ya Majimbo ya Same Mashariki na Same Magharibi.


Katika ziara hiyo, Naibu Katibu Mkuu huyo alikutana na viongozi na wanachama wa CCM, pamoja na wananchi, kwa ajili ya kujadili masuala mbalimbali yanayohusu shughuli za chama na maendeleo ya wananchi.

Mariam Mjema, akiwa miongoni mwa viongozi walioshiriki katika mapokezi hayo, amekuwa sehemu ya viongozi wa CCM wa Wilaya ya Same waliokuwepo kumpokea Naibu Katibu Mkuu huyo wakati wa kuwasili kwake.


Ziara hiyo hili hitimishwa kwa mkutano wa hadhara, ambapo Ndugu Mwanri alizungumza na wananchi pamoja na wanachama wa CCM wa Wilaya ya Same kuhusu masuala mbalimbali yanayohusu chama na maendeleo ya jamii.

soma zaidi »
Subscribe to: Posts (Atom)