Shirika la Posta Tanzania (TPC) limepata mafunzo ya viwango vya usalama wa posta vya S58 na S59, yaliyoandaliwa na Umoja wa Posta Duniani (UPU) jijini N’Djamena, nchini Chad kwa malengo ya kuimarisha usalama wa huduma za posta.
Recent Post Recent Post
View More Shirika la Viwango Tanzania (TBS) limewahimiza wazalishaji wa bidhaa na vifaa vinavyotumia nishati jadidifu kuhakikisha bidhaa zao zinakidhi matakwa ya viwango vya ubora na usalama ili kuongeza ushindani katika soko la ndani na nje ya nchi.
VIONGOZI WATAKAOSHINDWA KUDHIBITI MIGOGORO YA WAKULIMA NA WAFUGAJI KUCHUKULIWA HATUA - PROF. SHEMDOE
Na: OWM–TAMISEMI, Nanyumbu – Mtwara
Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe amemthibitishia Makamu wa Rais, Mhe. Deogratius Ndejembi kuwa ofisi yake itawachukulia hatua za kinidhamu na kisheria viongozi wa ngazi za msingi katika Mamlaka za Serikali za Mitaa watakaoshindwa kudhibiti uingiaji holela wa mifugo katika maeneo yao ya utawala na kusababisha migogoro kati ya wakulima na wafugaji.
Prof. Shemdoe ametoa ahadi hiyo leo Novemba 12, 2026 akiwa Nanyumbu, alipopewa fursa na Makamu wa Rais Mhe. Ndejembi kueleza kwa wananchi hatua zinazochukuliwa na ofisi yake katika kuzuia migogoro ya wakulima na wafugaji, wakati wa ziara ya kikazi ya Makamu wa Rais yenye lengo la kukagua miradi ya maendeleo na kutoa ufafanuzi wa masuala mbalimbali yanayowahusu wananchi wa wilaya ya Nanyumbu, mkoani Mtwara.
“Mhe. Makamu wa Rais, kama ulivyotuelekeza, tutawachukulia hatua viongozi wote watakaoshindwa kusimamia sheria na taratibu na kusababisha migogoro kati ya wakulima na wafugaji, kuanzia Mwenyekiti wa Kijiji, Mtendaji wa Kijiji, Mtendaji wa Kata mpaka viongozi wa ngazi za juu,” amesisitiza Prof. Shemdoe.
Akizungumzia uwekezaji katika sekta ya elimu, Prof. Shemdoe amesema ujenzi wa Shule ya Mkoa ya Sayansi ya Wasichana ya Mkapa Girls wenye thamani ya Shilingi Bilioni 4 ni uwekezaji wenye manufaa kitaaluma na kiuchumi kwa wananchi, kwani umeshawishi wananchi wa Mangaka, Nanyumbu, kufungua maduka ya vifaa vya shule yaliyowaongezea kipato. Ameongeza kuwa Serikali imepeleka tena Shilingi Milioni 560 Mangaka kwa ajili ya ujenzi wa shule nyingine ya sekondari.
Ameongeza kuwa kwa mwaka huu wa fedha TARURA inaendelea na ujenzi wa barabara ya lami ya Kambuti yenye urefu wa kilomita moja iliyopo Mangaka, na mwaka wa fedha ujao Serikali italeta Shilingi Bilioni 1 kwa ajili ya ujenzi wa barabara ya CCM.
Akieleza kuhusu uwekezaji katika afya ya msingi, Prof. Shemdoe amemshukuru Mhe. Rais Dkt. Samia Suluhu Hassan kwa ujenzi wa Hospitali ya Wilaya ya Nanyumbu iliyopo Mangaka na kuongeza kuwa kwa mwaka huu wa fedha ameridhia kiasi cha Shilingi Milioni 500 kutumika kwa ajili ya kuongeza wodi itakayoimarisha huduma za kulaza wagonjwa hospitalini hapo.
Makamu wa Rais Mhe. Deogratius Ndejembi ameanza ziara yake ya kikazi mkoani Mtwara leo kwa kukagua na kuweka jiwe la msingi mradi wa maji wa Miji 28 katika chanzo cha mto Ruvuma, Mangaka wilaya ya Nanyumbu, ikiwa ni pamoja na kuzungumza na wananchi wa wilaya za Nanyumbu, Masasi, Tandahimba na Newala.
UNGUJA, ZANZIBAR: Tume ya Taifa ya UNESCO ya Jamhuri ya Muungano wa Tanzania imeendelea kuchangia kukuza nafasi ya Kiswahili katika sayansi, afya na teknolojia kupitia uwasilishaji wa utafiti unaochunguza makosa ya kifonolojia kwa watu wenye Afasia ya Broca na Wernicke, kwa kutumia uchimbaji data wa mitandao ya kijamii na mifumo ya Akili Mnemba (AI).
Utafiti huo wenye kichwa “Makosa ya Kifonolojia Kati ya Wagonjwa wa Afasia ya Broca na Wernicke Katika Lugha ya Kiswahili: Uchambuzi wa Kiisimu Tiba kwa Kutumia Uchimbaji Data wa Mitandao ya Kijamii na Mifumo ya Akili Mnemba” uliwasilishwa na Bi. Edelfrida Tibaija, Afisa Programu wa Sekta ya Utamaduni, Tume ya Taifa ya UNESCO, katika Kongamano la 10 la Kimataifa la Kiswahili lililofanyika tarehe 11–12 Novemba 2026, Unguja, Zanzibar.
Makala hiyo iliandaliwa na Bi. Edelfrida kwa kushirikiana na Dkt. Ahmad Yahya Sovu wa Idara ya Lugha na Fasihi, Chuo cha Kumbukumbu ya Mwalimu Nyerere (MNMA), Kampasi ya Kivukoni, Dar es Salaam.
Utafiti huo umechunguza namna Afasia ya Broca na Wernicke zinavyoathiri matamshi ya wazungumzaji wa Kiswahili. Kwa kutumia sampuli ya machapisho 20 kutoka Instagram, pamoja na programu ya Praat, mifumo ya Utambuzi Kiotomatiki wa Usemi (ASR) na Akili Mnemba, utafiti ulibaini kuwa Afasia ya Broca hujitokeza zaidi kwa udondoshaji wa sauti, hasa katika viambishi awali vya nafsi na wakati, huku Afasia ya Wernicke ikihusishwa na ubadilishaji wa sauti na mabadiliko ya mpangilio wa silabi.
Matokeo hayo yanaonesha fursa ya kutumia teknolojia za kisasa katika kupanua tafiti za Isimu Tiba kwa lugha ya Kiswahili. Utafiti unapendekeza kuimarishwa kwa tafiti katika eneo hilo, ushirikiano kati ya wanaisimu na wataalamu wa afya, pamoja na kuendelezwa kwa teknolojia saidizi zinazoweza kusaidia uchambuzi wa changamoto za lugha na mawasiliano.
Kongamano hilo lililoandaliwa na Baraza la Kiswahili la Zanzibar (BAKIZA) lilikuwa jukwaa la kukutanisha wadau, watafiti na wataalamu wa Kiswahili kutoka maeneo mbalimbali ili kujadili maendeleo na matumizi ya lugha hiyo.
Ushiriki wa NATCOM kupitia uwasilishaji huo unaonesha dhamira ya Tume ya kuendeleza Kiswahili kama lugha ya maarifa, utafiti, sayansi na ubunifu, pamoja na kukuza matumizi yake katika ulimwengu wa kidijitali.
Waziri wa Nishati, Mhe Juma Homera, amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa kuongoza jitihada za kuharakisha matumizi ya nishati safi ya kupikia nchini, akisema Tanzania imekuwa mfano wa kuigwa katika kuendeleza ajenda hiyo barani Afrika.
Waziri Homera alitoa pongezi hizo tarehe 11 Novemba wakati akitoa salamu za ukaribisho za Wizara ya Nishati kwa Rais Samia katika Mkutano wa Ngazi ya Juu kutangaza mafanikio ya mpito wa Nishati Tanzania na Matumizi ya Nishati Safi ya Kupikia katika Shule na Vituo vya Afya, uliofanyika pembezoni mwa COP31 jijini Antalya, Türkiye.
Alieleza kuwa chini ya uongozi wa Rais Samia, matumizi ya nishati safi ya kupikia nchini yameongezeka kutoka asilimia 6.9 mwaka 2021 hadi asilimia 28.6 mwaka 2025, hatua inayoonesha maendeleo katika utekelezaji wa Mkakati wa Taifa wa Nishati Safi ya Kupikia wa 2024–2034.
Mkutano huo uliwakutanisha viongozi wa Serikali, wadau wa maendeleo na taasisi za kimataifa kujadili mafanikio, fursa za uwekezaji na kuimarisha ushirikiano katika kuharakisha matumizi ya nishati safi ya kupikia.
Tanzania inalenga kuhakikisha asilimia 80 ya Watanzania wanatumia nishati safi ya kupikia ifikapo mwaka 2034.
Rais wa Jamhuri ya Muungano wa Tanzania, Dkt. Samia Suluhu Hassan, amepanga kutumia uzoefu wa Tanzania katika kuimarisha huduma za watoto njiti kuhamasisha nchi nyingine za Afrika kuwekeza katika ujenzi wa wodi maalumu za watoto wachanga, huku akichangia ujenzi wa wodi hizo katika baadhi ya nchi za Bara la Afrika.
Hayo yameelezwa Novemba 11, 2026, na Mshauri wa Rais wa Masuala ya Afya ya Uzazi, Mama na Mtoto na Mkuu wa Sekretarieti ya Kinara wa Umoja wa Afrika wa Masuala ya Afya ya Uzazi, Mama na Mtoto Mhe. Ummy Mwalimu wakati wa ziara katika Hospitali ya Wilaya ya Kwimba, mkoani Mwanza, ambako amejionea mafanikio ya wodi maalumu ya watoto njiti.
“Rais Dkt. Samia amepewa dhamana na Wakuu wa nchi 55 na Viongozi wanachama wa Umoja wa Afrika kuwa Kinara wa masuala ya Afya ya Uzazi, Mama na Mtoto barani humo, amedhamiria kuendeleza uwekezaji katika huduma zinazookoa maisha ya wanawake na watoto, ndani na nje ya Tanzania” amesema Mhe. Ummy Mwalimu
Amesema wodi hiyo ni mfano wa uwekezaji ambao Tanzania kwa kushirikiana na Wadau wa Maendeleo ya Sekta ya Afya wanakusudia kuutumia kuhamasisha nchi nyingine za Afrika kuongeza uwekezaji katika huduma za kuokoa maisha ya watoto wachanga.
Akifafanua namna uzoefu wa Kwimba utakavyotumika katika kuhamasisha nchi nyingine za Afrika, Mhe. Ummy amesema Tanzania itatumia mfumo wa kuhamasisha uwekezaji kwa vitendo, ambapo Rais Samia atatoa mchango wa kujenga wodi katika nchi nyingine pamoja na kusomesha wataalam wa Afya ya Mama na Mtoto huku akiendelea kuzihamasisha Serikali za. nchi husika kuongeza uwekezaji katika miundombinu na rasilimali watu.
Katika hatua nyingine, Mhe. Ummy amebainisha kuwa Rais Dkt. Samia ametoa ahadi ya kuchangia Shilingi milioni 500 kwa ajili ya ujenzi wa wodi ya wazazi katika hospitali hiyo ili kuendelea kuimarisha huduma za afya ya uzazi Wilayani Kwimba.
Kwa upande wake, Mkurugenzi Msaidizi wa Huduma za Watoto Wachanga, Watoto na Vijana kutoka Wizara ya Afya, Dkt. Felix Bundala, amesema katika kipindi cha miezi tisa baada ya kuanzishwa kwa wodi hiyo katika Hospitali ya Wilaya ya Kwimba, idadi ya watoto waliopata huduma imeongezeka kutoka 183 hadi 542, huku rufaa zikipungua kwa asilimia 70 na vifo vya watoto waliolazwa vikishuka kutoka asilimia 34 hadi asilimia 12.
Amesema mafanikio hayo yanaunga mkono mpango wa Serikali wa kujenga wodi maalumu za watoto njiti zisizopungua 60 ifikapo mwaka 2028, kwa lengo la kupunguza vifo vya watoto wachanga na kufikia lengo la vifo 12 au chini ya hapo kwa kila vizazi hai 1,000 ifikapo mwaka 2030.
“Uwekezaji huu ni sehemu ya utekelezaji wa ajenda ya Rais Samia, Kinara wa Umoja wa Afrika (AU) wa Afya ya Uzazi, Mama na Mtoto, inayolenga kufikia malengo makuu matatu ya sifuri: sifuri ya uzazi wa nyumbani, sifuri ya vifo vinavyoweza kuzuilika vya kina mama na watoto wachanga, na sifuri ya watoto wasiopata chanjo” amefafanua Dkt. Bundala.
Wodi ya kwanza na ya kisasa nchini kwa ajili ya watoto njiti imejengwa na taasisi ya Doris Mollel kwa kushirikiana na Serikali pamoja na wadau wengine wa maendeleo ya Sekta ya Afya ni kielelezo hai cha namna ushirikiano kwenye maendeleo ya Sekta ya Afya unavyoweza kuleta tija katika upatikanaji wa Huduma za Afya.
Naibu Waziri wa Nishati, Mhe. Salome Makamba, ameiagiza kampuni tanzu ya TANESCO ya ETDCO kukamilisha ujenzi wa Kituo cha Kuboresha Hali ya Umeme (AVR) kilichopo Mangaka, Wilaya ya Nanyumbu mkoani Mtwara, ambacho kitaongeza nguvu ya kuendesha mradi wa maji na hivyo kuwawezesha wananchi kupata maji kwa ufanisi.
Kituo hicho cha AVR kinajengwa kwa lengo la kuimarisha kiwango cha volteji ya umeme unaosambazwa katika mradi wa maji wa Mangaka, hatua itakayosaidia mitambo ya kusukuma maji kufanya kazi kwa ufanisi na kuboresha upatikanaji wa huduma ya maji kwa wananchi.
Mhe. Salome ametoa agizo hilo leo, Novemba 12, 2026, wakati akikagua maendeleo ya ujenzi wa kituo hicho unaotekelezwa na Kampuni ya ETDCO.
Amesisitiza kuwa kazi zote zilizosalia zinapaswa kukamilishwa ndani ya muda alioutoa ili kituo hicho kianze kufanya kazi.
SERIKALI ya Tanzania imeunga mkono maazimio sita ya Jumuiya ya Maendeleo Kusini mwa Afrika (SADC), yanayolenga kuimarisha mifumo ya usimamizi wa maafa katika ukanda huo, hususan kukabiliana na athari zinazoweza kusababishwa na mvua za El Niño.
Msimamo huo umetolewa na Naibu Waziri wa Ardhi, Nyumba na Maendeleo ya Makazi, Mhe.Kaspar Mmuya, kwa niaba ya Waziri wa Nchi Ofisi ya Waziri Mkuu (Sera, Bunge, Uratibu na Wenye Ulemavu) Mhe. Prof. Palamagamba Kabudi ambapo aliwasilisha msimamo wa Tanzania katika Mkutano wa Saba wa Kawaida wa Kamati ya Mawaziri wenye dhamana ya Usimamizi wa Maafa katika nchi wanachama wa SADC, uliofanyika kwa njia ya mtandao Leo, Novemba 12, 2026, jijini Johannesburg, Afrika Kusini.
Mmuya amesema Tanzania inatambua na kupongeza jitihada zinazofanywa na nchi wanachama pamoja na Sekretarieti ya SADC katika kujiandaa kukabiliana na maafa yanayoweza kujitokeza kutokana na El Niño, ikiwemo kuandaa mipango ya dharura ya kitaifa na kikanda kwa lengo la kupunguza madhara.
Amesema jitihada hizo ni pamoja na kuratibu mazoezi ya utayari wa kukabiliana na vimbunga na mafuriko kupitia Timu ya Kikanda ya Utayari wa Kukabiliana na Dharura, yaliyofanyika Nacala, Msumbiji, pamoja na maandalizi ya taarifa ya kikanda kuhusu hali ya usalama wa chakula na lishe kwa mwaka 2026.
“Tanzania inaunga mkono na kuridhia maazimio yote kuanzia Uamuzi Na. 1 hadi Na. 6 kama yalivyopendekezwa na Sekretarieti,” amesema.
Ameongeza kuwa Sekretarieti imeendelea kuratibu usambazaji wa taarifa za utabiri wa hali ya hewa na tahadhari za mapema, kuandaa mkakati wa kikanda wa kuhifadhi vifaa vya akiba kwa ajili ya misaada ya kibinadamu na mwongozo wa utekelezaji wa hatua za mapema za kupunguza athari za vihatarishi mbalimbali kwa kipindi cha mwaka 2026 hadi 2030.
Akisisitiza maeneo yanayohitaji kupewa kipaumbele, Mmuya amesema ni muhimu nchi wanachama kuimarisha usalama wa chakula na lishe kwa kuhakikisha taarifa zinazohusu eneo hilo zinaandaliwa na kuwasilishwa kwa wakati.
Amesema upatikanaji wa chakula cha kutosha, salama na chenye virutubisho muhimu ni sehemu muhimu ya usimamizi wa maafa kwa kuwa unasaidia kulinda maisha ya wananchi, kupunguza athari za majanga na kuimarisha ustahimilivu wa jamii.
"Sekretarieti ya SADC kushirikiana na washirika wa maendeleo kuhamasisha upatikanaji wa rasilimali fedha na utaalamu utakaowezesha kuimarisha utayari wa kikanda, kutekeleza hatua za mapema na kutoa misaada ya kibinadamu kwa haraka wakati wa maafa,"amesema
Pia, amesisitiza umuhimu wa utaratibu wa kikanda wa kuhifadhi vifaa vya dharura kuzingatia vihatarishi vya majanga, haki na usawa, uendelevu wa kifedha, uwazi na kuimarisha mifumo ya kitaifa iliyopo.
Kwa upande mwingine, Mmuya ameipongeza Sekretarieti ya SADC kwa kuendelea kutekeleza ajenda ya kuimarisha Kituo cha Huduma za Kibinadamu na Operesheni za Dharura (SHOC), ikiwemo kuimarisha timu ya utayari wa kukabiliana na dharura kupitia mafunzo, mazoezi na upatikanaji wa vifaa.
Amesema hatua hizo ni muhimu katika kuimarisha uwezo wa nchi wanachama kukabiliana na maafa, kupunguza madhara kwa wananchi na kulinda maendeleo ya kiuchumi na kijamii katika ukanda wa SADC.
Na, Mwandishi Wetu - Dodoma
SERIKALI ya Tanzania imeunga mkono maazimio sita ya Jumuiya ya Maendeleo Kusini mwa Afrika (SADC), yanayolenga kuimarisha mifumo ya usimamizi wa maafa katika ukanda huo, hususan kukabiliana na athari zinazoweza kusababishwa na mvua za El Niño.
Benki ya Maendeleo ya Kilimo Tanzania (TADB) imesema imeweka mikakati ya kuongeza uwekezaji katika kilimo himilivu dhidi ya mabadiliko ya tabianchi kwa kutumia mifumo ya kisasa ya tathmini ya vihatarishi vya tabianchi, dhamana za mikopo na ushirikiano na taasisi za kifedha ili kuwawezesha wakulima wadogo kupata mitaji.
WIZARA ya Maliasili na Utalii, kupitia Idara ya Utawala na Usimamizi wa Rasilimali Watu, imeratibu zoezi la upimaji wa macho kwa watumishi wake katika ofisi za Wizara zilizopo Mtumba jijini Dodoma, ili waweze kufanya uchunguzi na kuchukua hatua madhubuti za kutibu afya zao mapema, huku ikisisitiza kuwa afya ya mtumishi wa umma ni mtaji kwa mwajiri na huboresha utendaji kazi mahali pa kazi.
Tume ya Taifa ya UNESCO (NATCOM) imesisitiza umuhimu wa kuimarisha usimamizi shirikishi wa Hifadhi ya Biosphere ya Rufiji-Mafia-Kilwa-Kibiti (RUMAKI), kwa kuzingatia uwiano kati ya uhifadhi wa bioanuwai, maendeleo endelevu ya jamii na matumizi endelevu ya rasilimali za bahari na pwani.
Hayo yameelezwa na Naibu Katibu Mtendaji wa Programu wa Tume ya Taifa ya UNESCO, Dkt. Khamis Khalid Said, wakati wa kufungua rasmi Kikao cha Kitaalamu cha Kuhakiki Rasimu ya Mpango Mkuu wa Usimamizi (GMP) wa Hifadhi ya Biosphere ya RUMAKI kilichofanyika katika Ukumbi wa TUJIWAKI, Kilwa Masoko, Wilaya ya Kilwa, Mkoa wa Lindi.
Kikao hiki kinalenga kupitia na kuboresha rasimu ya mpango huo ili kuhakikisha unazingatia changamoto zinazokabili mifumo ikolojia ya bahari na pwani, zikiwemo athari za mabadiliko ya tabianchi, uvuvi uliokithiri na uharibifu wa makazi ya viumbe vya baharini.
Mpango huo unalenga kulinda mifumo muhimu ya ikolojia, ikiwemo misitu ya mikoko, miamba ya matumbawe na maeneo ya kutagia mayai ya kasa, sambamba na kuimarisha maisha ya jamii za pwani kupitia uvuvi endelevu, utalii wa kiikolojia na ufugaji endelevu wa viumbe vya majini.
Kupitia Mpango wa UNESCO wa Binadamu na Hifadhi Hai (MAB), NATCOM inaendelea kuratibu na kusimamia juhudi za kuunganisha uhifadhi wa bioanuwai, utafiti wa kisayansi na maendeleo endelevu, kwa kuhakikisha kuwa uhifadhi wa mazingira unaenda sambamba na ustawi wa jamii na vizazi vijavyo.
Uhifadhi wa mazingira ni uwekezaji katika maisha ya sasa na mustakabali wa vizazi vijavyo.
#UNESCOTanzania #RUMAKI #MABProgramme #Biodiversity #SustainableDevelopment
📌 Utekelezaji Mradi wa TAZA wafikia asilimia 95
📌 Ili kuukamilisha mradi kutakuwa na katizo la muda la umeme Novemba 14 na 15 katika baadhi ya maeneo ya Kanda ya Kaskazini, Magharibi na Ziwa.
Shirika la Umeme Tanzania (TANESCO) limefikia hatua muhimu katika utekelezaji wa Mradi wa Usafirishaji Umeme wa Tanzania na Zambia (TAZA), ambao sasa umefikia asilimia 95 ya utekelezaji na unatarajiwa kuiwezesha Rukwa kuunganishwa na gridi ya Taifa ifikapo Desemba 5, 2026, hatua itakayoboresha upatikanaji na uhakika wa huduma ya umeme mkoani humo.
Mradi huo utaiwezesha Rukwa kuacha kutegemea umeme kutoka Zambia na badala yake kupata umeme kupitia gridi ya Taifa ya Tanzania. Hatua hiyo ni muhimu katika kuimarisha usalama wa upatikanaji wa nishati, kuunga mkono ukuaji wa shughuli za kiuchumi na kijamii na kufungua fursa zaidi za maendeleo kwa wananchi na wawekezaji.
Ili kufanikisha hatua za mwisho za mradi huo, TANESCO imetangaza kuwapo kwa katizo la muda la umeme Novemba 14 na 15, 2026, katika baadhi ya maeneo ya Kanda ya Kaskazini, Magharibi na Ziwa, kuanzia saa 12:30 asubuhi hadi saa 11:30 jioni kwa kila siku.
Akizungumza na waandishi wa habari jijini Dodoma leo, Novemba 12, 2026, Naibu Mkurugenzi Mtendaji wa Usambazaji Umeme, Mhandisi Timothy Mgaya, amesema katizo hilo ni sehemu ya maandalizi ya kitaalamu yanayohitajika ili kuwezesha mkandarasi kukamilisha kazi zilizobaki na kuiweka miundombinu katika hali ya utayari wa kuanza kutumika.
“Kazi ilipofikia inatulazimu kuzima umeme kwa siku ya Jumamosi na Jumapili katika mikoa ya Kanda ya Kaskazini, Kanda ya Magharibi na Kanda ya Ziwa ili kumruhusu mkandarasi kumalizia kazi,” amesema Mhandisi Mgaya.
Mikoa itakayoathirika na katizo hilo ni Singida, Manyara, Arusha, Kigoma, Kagera, Tabora, Shinyanga, Simiyu, Geita, Mwanza na Mara.
Ameongeza kuwa TANESCO imejipanga kuhakikisha kuwa taarifa kwa wateja wake zinawafikia wateja wake na kazi hizo zinakamilika ndani ya muda uliopangwa ili kupunguza usumbufu kwa wananchi na kurejesha huduma kwa wakati.
Akifafanua manufaa ya mradi huo, Meneja wa Mradi wa TAZA, Mhandisi Deogratius Nyamtumbaga, amesema kukamilika kwa mradi kutaiwezesha Rukwa kupata umeme kutoka katika gridi ya Taifa ya Tanzania badala ya kutegemea umeme unaotoka Zambia kama ilivyo sasa.
“Hadi kufikia Desemba 5, 2026, Mkoa wa Rukwa utakuwa umeunganishwa kwenye gridi ya Taifa,” amesema Mhandisi Nyamtumbaga.
Mradi wa TAZA unahusisha ujenzi wa njia ya kusafirisha umeme wa msongo wa kilovolti 400 kutoka Iringa hadi Sumbawanga mkoani Rukwa. Miundombinu hiyo itaongeza uwezo wa usafirishaji wa umeme na kuimarisha mfumo wa usambazaji wa nishati nchini.
Kukamilika kwa mradi huo ni hatua muhimu katika kuimarisha miundombinu ya nishati nchini, kuongeza uhakika wa upatikanaji wa umeme na kuweka mazingira bora ya uwekezaji, uzalishaji na ukuaji wa uchumi.
Kampuni ya Mkuyu Africa ya Tanzania imeingia katika ushirikiano wa kibiashara na kampuni ya kimataifa ya uendelezaji wa majengo ya DAMAC Properties ya Dubai, kwa lengo la kuwawezesha Watanzania kupata fursa za kumiliki nyumba na apartments za kisasa jijini Dubai, Falme za Kiarabu (UAE).
Ushirikiano huo unalenga kufungua milango ya uwekezaji wa kimataifa kwa wafanyabiashara, wafanyakazi na Watanzania wengine wenye nia ya kuwekeza katika sekta ya nyumba na majengo nje ya nchi.
Akizungumza mara baada ya kusainiwa kwa makubaliano hayo, Mkurugenzi Mtendaji wa Mkuyu Africa, Juneid Othman, alisema mpango huo utarahisisha upatikanaji wa nyumba Dubai kwa Watanzania bila kulazimika kusafiri kwenda nchini humo katika hatua za awali za ununuzi.
Alisema kupitia ushirikiano huo, Mkuyu Africa itakuwa kiungo kati ya wanunuzi wa Tanzania na DAMAC Properties kwa kuwaonyesha miradi na nyumba zilizopo sokoni, kuwaelekeza katika taratibu za ununuzi na kuwawezesha kukamilisha malipo.
“Tumekuwa tukishuhudia wawekezaji kutoka nchi za nje wakija kuwekeza Tanzania. Sasa kupitia ushirikiano huu kati ya Mkuyu Africa na DAMAC, Watanzania nao wanapata fursa ya kumiliki nyumba na apartments Dubai wakiwa hapa nchini,” alisema Juneid.
Alifafanua kuwa mnunuzi anaweza kuanza mchakato wa kumiliki nyumba kwa kulipa asilimia tano ya thamani ya nyumba husika, huku malipo yaliyobaki yakikamilishwa kwa mujibu wa masharti na ratiba ya malipo iliyokubaliwa, hadi hatua ya kukabidhiwa nyumba pamoja na nyaraka za umiliki zinazotakiwa kisheria nchini Dubai.
Juneid alisema lengo la mpango huo ni kupanua wigo wa Watanzania kushiriki katika uwekezaji wa kimataifa, hususan katika sekta ya nyumba na majengo, ambayo ni miongoni mwa maeneo yenye fursa za kukuza thamani ya mali na kupata mapato ya ziada.
Aliongeza kuwa katika kuwarahisishia wanunuzi kupata uzoefu wa moja kwa moja, Mkuyu Africa kwa kushirikiana na DAMAC imeweka utaratibu wa kugharamia safari za wanunuzi kwenda Dubai ili kutembelea miradi, kuona nyumba wanazokusudia kununua na kushiriki katika hatua za makabidhiano kwa mujibu wa makubaliano ya ununuzi.
Kwa upande wake, Meneja Mauzo na Mshauri wa Uwekezaji wa DAMAC Properties, Farah Al Hashimy, alisema kampuni hiyo ni miongoni mwa kampuni kubwa za uendelezaji wa majengo nchini Dubai, ikiwa na miradi mbalimbali ya makazi ya kisasa na ya kifahari, ikiwamo Chelsea Residences.
Alisema ushirikiano huo utaongeza fursa kwa Watanzania kupata huduma na taarifa kuhusu miradi ya DAMAC, huku ukiimarisha mahusiano ya kibiashara kati ya kampuni hizo mbili.
Aidha, ushirikiano huo unatarajiwa kuwa na manufaa ya pande mbili, kwa kuwa utarahisisha wawekezaji kutoka Dubai kuja kutafuta fursa za uwekezaji nchini Tanzania kupitia Mkuyu Africa, wakati Watanzania watapata fursa ya kuwekeza Dubai kupitia DAMAC Properties.
Hatua hiyo inaonekana kuwa sehemu ya juhudi za kuimarisha uhusiano wa kiuchumi na kibiashara kati ya Tanzania na mataifa ya nje, sambamba na fursa zinazotokana na sera za Serikali za kufungua nchi na kuvutia mitaji pamoja na uwekezaji wa kimataifa.
.jpeg)
Meneja Mauzo na Mshauri wa Uwekezaji wa DAMAC Properties, Farah Al Hashimy, akizungumza wakati akiwaonyesha wandishi wa habari moja ya miradi ya kampuni hiyo nchini Dubai mara baada ya kusaini makubaliano ya kibiashara na mkurugenzi wa MKUYU Africa Juneid Othumani(kushoto) nchini Dubai hivi karibuni.
Meneja Mauzo na Mshauri wa Uwekezaji wa DAMAC Properties, Farah Al Hashimy, akizungumza wakati akiwaonyesha wandishi wa habari moja ya miradi ya kampuni hiyo nchini Dubai mara baada ya kusaini makubaliano ya kibiashara na mkurugenzi wa MKUYU Africa Juneid Othumani(kushoto) nchini Dubai hivi karibuni.NA EMMANUEL MBATILO, DAR ES SALAAM
SHIRIKA la Posta Tanzania limeanza kuweka msisitizo mpya katika uwajibikaji wa viongozi wake, likieleza kuwa utendaji wa mameneja utapimwa kwa mafanikio wanayoyapata katika kukuza biashara na kuboresha huduma.
Mkuu wa Mkoa wa Morogoro Mhe. Queen Sendiga amesema atalinda vyanzo vya maji kwa nguvu na maarifa kwa kuishirikisha jamii kuhusu uhifadhi.
Amesema katika kikao na kamati ya Bunge ya Maji na Mazingira na kusisitiza hatua hiyo ni muhimu ili kupunguza gharama ya kutibu maji na kuepuka athari za mabadiliko ya tabianchi.
Kaimu Mwenyekiti wa kamati Mhe. Patrick Mwalunenge (Mb) amepongeza hatua hiyo na kusema vyanzo vya maji ni lazima kutunzwa ili miradi ya maji ilete matokeo katika jamii.
Amesema baada ya kukagua mto Mvuha unaochangia maji kwa asilimia 22 katika mto Ruvu mkuu na kuona uvamizi na kazi za kibinadamu zinazofanyika kinyume na taratibu.
Ameainisha kuwa kamati ya Maji na Mazingira itarudi Mvuha baada ya siku 60 kujionea hatua zilizochukuliwa.
Amepongeza ujenzi wa miundombinu ya maji iliyowezesha uwepo wa mabirika ya mifugo na matumizi ya maji nyumbani.
Miongoni mwa maeneo ya mfano huo ni Bwakira chini, mtaa wa Usukumani Morogoro vijijini ambapo serikali imejenga mabirika matano na kijiji cha Dakawa ambapo tanki lenye uwezo wa kuhifadhi maji lita 225,000 limejengwa na linahudumia zaidi ya wakazi elfu sita pamoja na mifugo ambapo visima viwili vimechimbwa.
Mhe. Mwalunenge amefafanua kuwa mpango mahsusi wa kuwa na Gridi ya Taifa ya Maji unahitaji ushirikiano wa jamii .
Eneo la Ruvu ni moja ya dakio muhimu la maji katika kufanikisha azma ya serikali ya kuimarisha huduma ya majisafi kwa wakazi wa jiji la Dar es salaam na Pwani, ambapo maji yake yanategemewa kujaza bwawa la Kidunda linalojengwa hivi sasa utekelezaji wake ukiwa umeshavuka asilimia 50.
Kamati ya Kudumu ya Bunge ya Maji na Mazingira imeipongeza Wizara ya Maji kwa ubunifu uliofanywa na Bonde la Wami Ruvu kwa kufanikisha huduma ya majisafi kwa wananchi na mifugo, hivyo kuepusha migogoro na uhakika wa usalama wa vyanzo vya maji.
Subscribe to:
Posts (Atom)
