Recent Post Recent Post
View More

on October 06, 2026

 


📌Asisitiza mifumo iliyozinduliwa ifanye kazi kwa ufanisi na kuendana na mahitaji ya wateja


📌Aipongeza TANESCO kwa ubunifu na kuimarisha huduma kwa wateja wakubwa


Waziri wa Nishati, Mhe. Dkt. Juma Zuberi Homera, leo Oktoba 6, 2026 amezindua Mkataba wa Huduma kwa Wateja uliohuishwa pamoja na  huduma mbalimbali za TANESCO zinazolenga kuboresha zaidi namna ya utoaji wa huduma kwa wateja kwa ufanisi na kwa wakati, uzinduzi uliofanyika katika Ukumbi wa Super Dome, jijini Dar es Salaam.

Mhe. Homera amesema matumizi ya mifumo ya teknolojia za kisasa katika utoaji wa huduma kwa wateja yanazidi kuiwezesha TANESCO kupiga hatua kubwa katika kuboresha huduma zake  kwa kuzingatia uwajibikaji, uwazi na weledi unaolenga kuleta matokeo chanya kiutendaji.

Ametoa rai kuhakikisha  changamoto zinazowakabili  wananchi katika matumizi ya umeme zinashughulikiwa kwa haraka kwa kuwa changamoto katika huduma ya umeme zinaweza kuathiri moja kwa moja uzalishaji na shughuli za kiuchumi.

“Mwelekeo wa Serikali ni kujenga sekta ya nishati inayoweza kuunga mkono kasi ya ukuaji wa uchumi wa Tanzania. Tunataka kuona shughuli za uzalishaji zinaendelea bila vikwazo visivyo vya lazima na tunataka wananchi wapate huduma kwa urahisi zaidi,” ameeleza Waziri Homera.

Amesema Tanzania hivi sasa ina umeme wa kutosha, ambapo uwezo wa uzalishaji umefikia jumla ya Megawati 4,606 dhidi ya mahitaji ya juu ya Megawati 2,316, hatua inayotoa fursa zaidi za kukuza shughuli za kiuchumi kupitia uwekezaji katika viwanda, biashara na shughuli za kijamii.

Kwa upande wake, Mwenyekiti wa Kamati ya Kudumu ya Bunge, Mhe. Subira Mgalu, ameipongeza Wizara ya Nishati kupitia Shirika la Umeme Tanzania (TANESCO) kwa kuendelea kuja na ubunifu unaolenga kutatua changamoto zinazowakabili wananchi katika nyanja mbalimbali.

Naye Makamu Mwenyekiti wa Bodi ya Wakurugenzi wa TANESCO, Mhe. Balozi Zuhura Bundala, amesema Bodi itaendelea kuisimamia TANESCO katika kuhakikisha utoaji wa huduma unaenda sambamba na matumizi ya teknolojia za kisasa, ili huduma zimfikie mteja moja kwa moja bila vikwazo.

“Bodi itaendelea kuishauri TANESCO katika utoaji wa huduma kwa ufanisi. Kwetu sisi, mteja ni mfalme, na huduma inayotolewa na Shirika inamgusa mwananchi moja kwa moja. Tumejipanga kuhakikisha jitihada hizi zinaendelea kupiga hatua,” amesisitiza Balozi Bundala

Kwa upande wake, Mkurugenzi Mtendaji wa TANESCO, Bw. Lazaro Twange, ametoa ufafanuzi kuhusu uzinduzi wa Twiga Assistant, mfumo unaolenga kuachana na utoaji wa huduma kwa njia za makaratasi na kuingia katika matumizi ya mifumo ya kielektroniki inayompunguzia   mteja kutumia muda mrefu kusubiri huduma anayohitaji.

“TANESCO inafanya kazi kubwa kuhakikisha nishati ya umeme inawafikia wananchi baada ya kukamilika kwa miradi mingi ya kimkakati, ukiwemo Mradi wa Chalinze–Dodoma. Hatua hii inatupa nguvu ya kuja na ubunifu wa kuona namna ya kumfikia mteja kwa haraka. 

Ndiyo maana TANESCO imeamua kushuka chini na kusogeza huduma zake karibu na wananchi,” amefafanua Bw. Twange.

Hafla hiyo iliyobeba kaulimbiu ya “EXTRA MILE” imeenda sambamba na uzinduzi wa namba mpya ya 185 kwa ajili ya wateja wakubwa, Twiga AI Chatbot, mfumo saidizi wa kidijitali unaolenga kujibu maswali ya wateja, Kitengo cha watwja wakubwa kilichoboreshwa, pamoja na Premium Customer Portal, mfumo maalumu kwa ajili ya wateja wakubwa, ikiwa ni sehemu ya kutambua mchango wao katika shughuli za Shirika.

Uzinduzi huo umefanyika katika kuadhimisha Wiki ya Huduma kwa Wateja, ikiwa ni sehemu ya jitihada za TANESCO kuendelea kuboresha huduma kwa kutumia teknolojia za kisasa na kuhakikisha mteja anapata huduma kwa urahisi, haraka na kwa ufanisi.

soma zaidi »

on October 06, 2026

 

Na Mwandishi Wetu- Same

 

Katibu Tawala Wilaya ya Same Bi. Mamndolwa Gembe amewataka Kamati ya Usimamizi wa Maafa Wilaya ya Same kuendelea kutoa elimu ya tahadhari kwa wananchi wa maeneo yote ya wilaya hiyo hususani wakulima na wafugaji.

Bi. Gembe amesisitiza hayo kwa niaba ya Mkuu wa Wilaya hiyo, leo Octoba 06, 2026, wakati akifungua kikao kazi cha Kamati za usimamizi wa maafa za wilaya na timu ya wataalamu kutoka Ofisi ya Waziri Mkuu (Sera, Bunge, Uratibu na Wenye Ulemavu), Mamlaka ya Hali ya Hewa Tanzania (TMA) na Shirika la Chakula Duniani (WFP) sambamba na kuimarisha utoaji wa matumizi ya taarifa za tahadhari za awali katika kujiandaa na kukabiliana na madhara ya El nino.


“Wilaya ya Same ni miongoni mwa maeneo yanayokabiliwa na mabadiliko makubwa ya tabianchi, kijiografia wilaya yetu ina maeneo ya milima na tambarare, hivyo inatufanya tuwe katika hatari ya kukabiliwa na changamoto za pande mbili, kutokana na hilo mipango na mapendekezo yatakayotolewa katika kikao kazi hiki yasibaki kwenye nyaraka tu, bali yakatimizwe na kuingizwa kwenye mipango kazi ya halmashauri, mamlaka za kata na vijiji” amesisitiza Bi. Gembe.

 

Aidha, Bi. Gembe ameishukuru Ofisi ya Waziri Mkuu (Sera, Bunge, Uratibu na Wenye Ulemavu), Mamlaka ya Hali ya Hewa Tanzania (TMA) na Shirika la Chakula Duniani (WFP) kwa ushirikiano lakini pia amesema kuwa Serikali ya Wilaya ya Same ipo tayari kufanya kazi bega kwa bega ili kuhakikisha malengo ya programu hiyo yanatimia.


“Tunawashukuru sana kwa kuchagua Wilaya ya Same kuwa sehemu yay a ziara na kikao kazi hiki cha kimkakati, ujio wenu ni Ushahidi tosh awa dhamira ya Serikali ya Awamu ya Sita katika kulinda Maisha na mali za wananchi dhidi ya athari za majanga Ameongeza Katibu Tawala huyo.

 


Nae, Mwakilishi kutoka Shirika la Chakula Duniani (WFP) Bi. Sandra Hakim amebainisha kuwa, lengo la programu hiyo ni kuifanya taarifa ya Mamlaka ya Hali ya Hewa inashuka chini ili jamii ikiwemo wazee, wamama, walemavu na watoto waweze kupata taarifa kwa wakati kwani upatikanaji wa taarifa za hali ya hewa mapema zitakuwa na thamani pale utakapochukua hatua kabla ya majanga kutokea.

 


Katika kikao hicho mada mbalimbali kuhusu Utabiri wa Msimu, El nino na madhara tarajiwa, Dhana ya Maafa ikiwemo mzingo wa maafa, Mpango wa Dharurawa Kukabiliana na Maafa na majukumu ya kamati na utekelezaji wa mpango pamoja na Usambazaji wa Huduma za Hali ya Hewa ziliwasilishwa kwa Kamati ya Usimamizi wa Maafa.

soma zaidi »

on October 06, 2026
SHIRIKA la Mawasiliano Tanzania (TTCL) imesema itaendelea kwenda hatua ya ziada katika kuboresha huduma kwa wateja kwa kutumia teknolojia, kuongeza kasi ya utatuzi wa changamoto na kuimarisha mifumo ya kupokea na kufanyia kazi mrejesho wa wateja.
soma zaidi »

on October 06, 2026

 

Makamu wa Rais wa Jamhuri ya Muungano wa Tanzania Mhe. Deogratius Ndejembi amesema matumizi ya mifumo ya kisasa ya teknolojia ni chachu katika ukusanyaji wa kodi hivyo yanapaswa kutiliwa mkazo ili kuongeza uwazi, kuimarisha usimamizi wa kodi na kurahisisha ulipaji kodi.

Makamu wa Rais ameyasema hayo jijini Arusha Oktoba 06, 2026 wakati wa ufunguzi wa Mkutano wa wa Chama cha Wasimamizi wa Kodi wa Jumuiya ya Madola (CATA) na kueleza kuwa teknolojia ni nyenzo muhimu katika kuboresha ukusanyaji wa mapato ya ndani na kuimarisha huduma kwa walipa kodi ndiyo maana mkutano huo umekuja na kauli mbiu inayogusa teknolojia.

Amesema pamoja na umuhimu wa teknolojia, mafanikio katika ukusanyaji wa mapato hayawezi kutegemea teknolojia pekee, bali yanahitaji sera nzuri, madhubuti, zinazoeleweka na zinazotabirika, pamoja na usimamizi wa kodi wenye ufanisi na unaokidhi mahitaji ya walipakodi.

Makamu wa Rais pia amesisitiza umuhimu wa ushirikiano wa kimataifa katika masuala ya kodi, akibainisha kuwa biashara zinazovuka mipaka, makampuni ya kimataifa, miamala ya kidijitali pamoja na mali za kifedha zinazohifadhiwa nje ya nchi zimefanya ushirikiano kati ya mamlaka za kodi kuwa muhimu zaidi.

Amesema Tanzania inaendelea kuimarisha ushiriki wake katika ushirikiano wa kimataifa wa kodi, ikiwemo kubadilishana taarifa za kodi na kutoa msaada wa kiutawala baina ya nchi huku akieleza kuwa ushirikiano huo ni muhimu katika kuongeza uhakika wa kodi, kubadilishana taarifa, kuzuia na kutatua migogoro ya kikodi.

Amesema uratibu mzuri kati ya nchi unaweza kusaidia kulinda mapato ya Serikali huku ukipunguza uwezekano wa kutozwa kodi mara mbili na kuondoa sintofahamu kwa wawekezaji halali.

“Nchi inayovutia uwekezaji siyo ile isiyokuwa na kodi, bali ni ile yenye kanuni za kodi zilizo wazi, thabiti na zinazosimamiwa kwa haki, zikiungwa mkono na taratibu bora za forodha na ukusanyaji wa mapato,” amesema.

Awali akizungumza katika mkutano huo Rais wa CATA Mhe. Abu Tariq Jamaluddin amesema matumizi ya teknolojia ya kisasa yamekuwa yakisaidia nchi wanachama wa CATA kurahisisha utawala wa kodi kwa kuweka mazingira rahisi ya ukusanyaji wa mapato na kuwasaidia walipakodi kufuata sheria za kodi.

Amesema kauli mbiu ya mkutano huo inalenga kuhimiza matumizi zaidi ya teknolojia na kueleza kuwa CATA itaendelea kuwezesha matumizi ya teknolojia katika ukusanyaji wa kodi ili kuimarisha usimamizi wa kodi baina ya nchi wanachama.

Amesema kupitia mkutano huo nchi washiriki wataweza kubadilishana ujuzi na uzoefu kuhusu usimamizi wa kodi na matumizi ya teknolojia.

Kwa upande wake Kamishna Mkuu wa Mamlaka ya Mapato Tanzania (TRA) ambao ndiyo waandaaji wa mkutano huo Bw. Yusuph Juma Mwenda amesema Mamlaka hiyo imepiga hatua kubwa katika matumizi ya teknolojia ambayo yameboresha zaidi huduma za usimamizi wa kodi kwa kuongeza uwazi na ufanisi.

Amesema kupitia matumizi ya teknolojia TRA imekuja na mfumo wa IDRAS unaosimamia kodi za ndani ambao unamuwezesha Mlipakodi kutoa risiti za kielektroniki kwa kutumia simu ya mkononi bila kuwa na mashine hali ambayo imeongeza uhiari katika kulipa kodi na kupunguza kuonana kwa walipakodi na maofisa wa TRA.

Amesema kupitia mkutano huo wataweza kubadilishana ujuzi na mataifa mengine akieleza kuwa matumizi ya teknolojia ya kisasa pia kwa Tanzania yameongeza wigo wa kodi kutokana na kuwapa uhuru walipakodi kujisajili kupitia mtandao na kupata namba ya utambulisho wa mlipakodi (TIN).

Mkutano huo utadumu mpaka Oktoba 09 mwaka huu.




soma zaidi »

on October 06, 2026


Na Mwandishi Wetu - ARUSHA.


Tanzania imeendelea kuimarisha nafasi yake katika juhudi za kikanda na kimataifa za usalama wa nyuklia baada ya kukutanisha wataalamu na washiriki kutoka nchi 18 katika warsha ya kikanda inayolenga kuimarisha uwezo wa rasilimali watu katika masuala ya usalama wa nyuklia.

Warsha hiyo ya siku tano, inayofanyika jijini Arusha kuanzia Oktoba 5 hadi 9, 2026, imeandaliwa kwa ushirikiano kati ya Tume ya Nguvu za Atomu Tanzania (TAEC) na Wakala wa Kimataifa wa Nguvu za Atomu (IAEA), ikiwa na lengo la kujadili namna Vituo vya Usaidizi wa Usalama wa Nyuklia (Nuclear Security Support Centres – NSSCs) vinavyoweza kusaidia nchi kujenga na kudumisha wataalamu wenye uwezo wa kusimamia masuala ya usalama wa nyuklia.

Akifungua warsha hiyo, Mkurugenzi Mkuu wa Tume ya Nguvu za Atomu Tanzania (TAEC), ambaye pia ni Mratibu wa Kitaifa wa Tanzania na Wakala wa Kimataifa wa Nguvu za Atomu (IAEA) (National Liaison Officer – NLO), Prof. Najat Kassim Mohamed, amesema matumizi ya teknolojia ya nyuklia kwa madhumuni ya amani yanahitaji kwenda sambamba na uwepo wa wataalamu wenye ujuzi na uwezo wa kuhakikisha nyenzo za nyuklia na vyanzo vingine vya mionzi vinatumika kwa uwajibikaji na kulindwa ipasavyo.

Amesema mifumo bora na vifaa vya kisasa pekee haviwezi kuhakikisha usalama wa nyuklia bila kuwa na wataalamu wenye ujuzi wa kuvitumia, kuvitunza na kuchukua hatua stahiki pale linapotokea tukio linalohusisha usalama wa nyuklia.

“Maendeleo ya rasilimali watu ni jukumu endelevu la kila nchi. Tunahitaji kutambua ujuzi unaohitajika, kujua uwezo tulionao, kutoa elimu na mafunzo yanayofaa na kutathmini kama mafunzo hayo yameleta matokeo yanayotarajiwa,” amesema Prof. Najat.

Warsha hiyo imekusanya watu 48 kutoka nchi 18, wakiwemo washiriki 25 wanaohudhuria moja kwa moja jijini Arusha, washiriki 18 wanaoshiriki kwa njia ya mtandao pamoja na wataalamu watano. Wataalamu wanaowezesha warsha hiyo wanatoka Algeria, Misri, Malaysia na Tanzania.

Prof. Najat amesema ushirikiano huo unaonesha dhamira ya pamoja ya nchi zinazoshiriki katika kujenga uwezo endelevu wa kukabiliana na changamoto za usalama wa nyuklia, huku akisisitiza umuhimu wa kuwa na mifumo ya kuhifadhi maarifa na kuendeleza utaalamu hata pale watumishi wanapobadilisha majukumu au kuondoka katika utumishi.

Kwa mujibu wa Prof. Najat, Vituo vya Usaidizi wa Usalama wa Nyuklia vina nafasi muhimu katika maeneo matatu yanayokamilishana, ambayo ni maendeleo ya rasilimali watu, msaada wa kiufundi na msaada wa kisayansi. Maeneo hayo yanasaidia nchi kuwa na wataalamu wenye uwezo, vifaa na mifumo inayofanya kazi kwa ufanisi pamoja na utaalamu wa kisayansi unaohitajika katika kushughulikia masuala ya usalama wa nyuklia.

Katika kipindi cha warsha hiyo, washiriki watajadili misingi ya mifumo ya usalama wa nyuklia na namna ya kuifanya iwe endelevu, nafasi ya Vituo vya Usaidizi wa Usalama wa Nyuklia katika maendeleo ya rasilimali watu, pamoja na umuhimu wa kuwa na mipango ya kitaifa ya kujenga uwezo wa wataalamu wanaohusika na usalama wa nyuklia.

Majadiliano pia yataangalia kwa kina maeneo matatu muhimu ya usalama wa nyuklia ambayo ni kuzuia matukio ya kiusalama, kugundua vitendo au matukio yanayoweza kuhatarisha usalama na kuwa na uwezo wa kuchukua hatua stahiki yanapotokea.

Mada nyingine zitakazojadiliwa ni pamoja na usimamizi na utunzaji wa maarifa ndani ya taasisi, kubaini mapungufu katika uwezo uliopo, kujenga uwezo wa kitaifa na namna ya kutekeleza mipango ya maendeleo ya rasilimali watu kwa kuzingatia mahitaji halisi ya kila nchi.

Prof. Najat amewataka washiriki kutumia warsha hiyo kubadilishana uzoefu kwa uwazi, ikiwemo kueleza mafanikio, changamoto, upungufu wa rasilimali na vikwazo wanavyokutana navyo katika nchi zao ili majadiliano hayo yasaidie kupata njia zinazoweza kutekelezeka katika mazingira halisi.

Amesisitiza kuwa mafanikio ya warsha hiyo hayatapimwa kwa idadi ya mada zitakazowasilishwa pekee, bali kwa namna maarifa na uzoefu watakaoupata washiriki vitakavyosaidia kuleta maboresho katika taasisi na nchi zao baada ya kumalizika kwa warsha.

Warsha hiyo pia inatoa fursa kwa nchi zinazoshiriki kujifunza kutokana na uzoefu wa kila mmoja, kubaini mbinu zinazoweza kutumika katika mazingira tofauti na kuimarisha mahusiano ya kitaalamu yatakayosaidia kuendeleza ushirikiano katika masuala ya usalama wa nyuklia.

Kwa upande wake, Mkuu wa Kitengo cha Mawasiliano wa TAEC, Bwana Peter Ngamilo, amesema kufanyika kwa warsha hiyo nchini Tanzania ni fursa muhimu ya kuongeza uelewa kuhusu umuhimu wa usalama wa nyuklia na kuonesha mchango wa ushirikiano wa kimataifa katika kujenga uwezo wa wataalamu wanaosimamia eneo hilo.

“Usalama wa nyuklia ni suala linalohitaji ushirikiano, ujuzi na uelewa wa pamoja. Kukutana kwa wataalamu kutoka nchi 18 hapa Arusha kunatoa nafasi ya kubadilishana uzoefu na maarifa ambayo yatasaidia kuimarisha uwezo wa nchi zetu katika kulinda nyenzo za nyuklia na vyanzo vingine vya mionzi,” amesema Ngamilo.

Ngamilo amesema TAEC itaendelea kutoa elimu na taarifa sahihi kwa umma kuhusu masuala ya usalama wa mionzi na nyuklia ili wananchi wawe na uelewa mpana kuhusu matumizi salama na yenye manufaa ya teknolojia ya nyuklia katika maendeleo ya kijamii na kiuchumi.

Akihitimisha hotuba yake, Prof. Najat ameishukuru IAEA kwa kuendelea kushirikiana na Tanzania katika kujenga uwezo wa kitaifa na kikanda katika usalama wa nyuklia, huku akiwataka washiriki kutumia kikamilifu siku tano za warsha hiyo kupata maarifa na uzoefu utakaosaidia kuleta maboresho katika nchi na taasisi wanazowakilisha.

Warsha hiyo inatarajiwa kuhitimishwa Oktoba 9, 2026, jijini Arusha.









soma zaidi »

on October 06, 2026

 



Mkurugenzi wa Rasilimaliwatu na Utawala Mfuko wa Hifadhi ya Jamii kwa Watumishi wa Umma (PSSSF), Bw. Paul Kijazi (Kulia), Akiwasalimia Wanachama wa Mfuko huo wakati wa uzinduzi wa Wiki ya Huduma kwa wateja Ofisi za Makao Makuu ya PSSSF Dodoma, Oktoba 5, 2026

Mkurugenzi wa Rasilimaliwatu na Utawala Mfuko wa Hifadhi ya Jamii kwa Watumishi wa Umma (PSSSF), Bw. Paul Kijazi (Kulia), akimkabidhi cheti cha pongezi Afisa wa PSSSF, Bw. Dolphin Kaizer (katikati), kwa kutambua mchango wake katika kuhakikisha wanachama wanapata huduma bora. Anayeshuhudia ni Mkurugenzi wa Uendeshaji Mfuko wa PSSSF, Bw. Hajji Khamis (kushoto). Cheti hicho amekabidhiwa leo Oktoba 5, 2026 wakati wa uzinduzi wa Wiki ya Huduma kwa Wateja Ofisi za Makao Makuu ya PSSSF Dodoma.

Picha ya Pamoja ya Watumishi wa Mfuko wa PSSSF Makao Makuu Dodoma, wakati wa uzinduzi wa Wiki ya Huduma kwa Wateja, Oktoba 5, 2026

Mkurugenzi wa Uendeshaji Mfuko wa PSSSF, Bw. Hajji Khamis (kushoto) akimuhudumia mwanachama  wakati wa uzinduzi wa Wiki ya Huduma kwa wateja Ofisi za Makao Makuu ya PSSSF Dodoma, Oktoba 5, 2026.

Afisa wa Huduma kwa Wateja Mwandamizi wa Mfuko wa Hifadhi ya Jamii kwa Watumishi wa Umma (PSSSF), Bw. Jimmy Kamasho, Kutoka Kanda ya Ziwa Magharibi mkoani Geita,  akimuhudumia mwanachama wakati wa Wiki ya Huduma kwa wateja iliyoanza leo oktoba 5, 2026.


Dodoma, Oktoba 5, 2026


Katika hali inayoashiria upendo, kuwajali na kutambua mchango wa waajiri mbalimbali, Mfuko wa Hifadhi ya Jamii kwa Watumishi wa Umma (PSSSF) umejumuika na baadhi ya Waajiri katika uzinduzi wa Wiki ya Huduma kwa Wateja 2026 na kuwaomba waendelee kuwa mabalozi wazuri wa PSSSF katika maeneo yao ya kazi.


Hayo yalisemwa na Mwakilishi wa Mkurugenzi Mkuu wa PSSSF ambaye pia ni Mkurugenzi wa Utawala na Rasilimaliwatu, Bw. Paul Kijazi alipokuwa akizindua Wiki ya Huduma kwa Wateja ambayo itaadhimishwa hadi Oktoba 9, 2026.


“Kwa namna ya kipekee napenda kutambua uwepo wa Waajiri mbalimbali na kuwashukuru kwa ushirikiano mkubwa mnaotupatia katika maeneo mbalimbali katika kuhakikisha wanachama wa PSSSF wanapata huduma bora na kwa wakati. Na sisi tunaahidi kuendeleza ushirikiano uliopo kwa maslahi makubwa ya wanachama wetu, asanteni sana kwa kutuunga mkono.” Alisema Bw. Kijazi


Bw. Kijazi alisema, kauli mbiu ya mwaka huu ya Wiki ya Huduma kwa Wateja ni Hatua Moja  Zaidi ( The Extra Mile), ambapo amewataka watumishi wa PSSSF kufanya  yasiyowezekana yawezekane na wajue kwamba kutoa huduma bora kwa wanachama ni wajibu wao wa kwanza, na aliongeza, “Hivyo, tuendelee kusikiliza zaidi wanachama wetu, tuwe wa kwanza kuwafikia wanachama wetu, tutoe elimu sahihi na kwa wakati na tuendelee kutekeleza majukumu yetu kwa uadilifu kama kawaida yetu”.


Akizugumzia utoaji huduma kwa wanachama, alisema kuna watumishi  wapo  katika madawati ya huduma, hao ni pamoja na wenzetu wa kituo cha huduma kwa wanachama, Call Center na Kitengo cha Uhusiano na Elimu kwa Wanachama, ambao mara nyingi ndio wa kwanza kukutana na wanachama wetu, aliwapongeza  na kuwatia moyo waendelee kutoa huduma bora na aliwaomba watumishi wengine wawe tayari kuwasaidia pale wanapohitaji msaada wowote kwa lengo la kumhudumia vyema wanachama wa PSSSF.   


Awali akizungumza kabla ya kumkaribisha Mwakilishi wa Mkurugenzi Mkuu, Mkurugenzi wa Uendeshaji, Bw. Hajji Khamis alisema, “Tuwahudumie wanachama wetu kwa usawa, bila kujali nafasi zao, umri wao, eneo wanalotoka au aina ya huduma wanayohitaji. Siku zote tuzingatie muda wa huduma, usahihi wa taarifa,usiri wa taarifa za wateja na kufuata taratibu zetu tulizojiwekea ili tuweze kutoa huduma bora kwa wanachama wetu.

Mwisho

soma zaidi »

on October 05, 2026

 

 

Na Mwandishi Wetu.

Rome, Italia. Tarehe 4 Oktoba 2026: Taasisi ya CRDB Bank Foundation imeendelea kujiimarisha kama daraja muhimu la mitaji ya kimataifa na jamii ambazo hazijafikiwa ipasavyo na huduma za fedha, baada ya kushiriki mkutano unaojadili Ufadhili Mseto wa Miradi yaani Blended Finance Working Group (BFWG) ulioandaliwa Shirika la Chakula na Kilimo la Umoja wa Mataifa (FAO) kujadili namna ya kuongeza upatikanaji wa fedha kwa wananchi na biashara za vijijini. 

Akishiriki mkutano huo uliowajumuisha wadau wengine ukiwamo Mfuko wa Kimataifa wa Maendeleo ya Kilimo (IFAD), Benki ya Dunia, Benki ya Maendeleo ya Ujasiriamali ya Uholanzi (FMO), Shirika la Mazingira la Umoja wa Mataifa (UNEP), pamoja na wadau wa maendeleo, taasisi za fedha na wataalamu wa sekta mbalimbali, Mkurugenzi Mtendaji wa CRDB Bank Foundation, Tully Esther Mwambapa amesema mikakati ya pamoja inahitajika kuwafikia wananchi wenye uhitaji wa mitaji nafuu ili nao washiriki kuujenga uchumi wa mataifa yao.

Akizungumza pembezoni mwa mkutano huo, Tully amesema CRDB Bank Foundation ipo katika nafasi ya kipekee ya kuunganisha rasilimali za kimataifa na fursa zilizopo katika jamii kwa sababu ya uelewa wake wa kina kuhusu mahitaji ya wananchi wa vijijini pamoja na dhamira yake ya muda mrefu ya kukuza ujumuishaji wa kiuchumi.

"Upatikanaji wa fedha bado ni moja ya changamoto kubwa kwa jamii za vijijini na biashara ndogondogo. Kupitia uzoefu wetu chini ya Programu ya iMBEJU Kilimo, tumedhihirisha kuwa ushirikiano sahihi na mifumo bunifu ya ufadhili, inaweza kurahisisha namna kuwafikia wananchi ambao mara nyingi huonekana kutofikika na huduma za kifedha na kuwasaidia kuwa washiriki wenye tija katika uchumi," amesema.

Majadiliano ya mkutano huo yalijikita katika kutafuta majibu ya swali muhimu kuhusu namna ya kuhamasisha na kuelekeza mitaji zaidi kwa jamii, wakulima na biashara zinazohitaji fedha ili kukuza shughuli zao za kiuchumi hivyo kutoa fursa kwa washiriki kubadilishana uzoefu kuhusu mchango wa mifumo ya ufadhili mseto (blended finance), dhamana za mikopo, na nafasi ya taasisi imara za fedha katika kuvutia uwekezaji mkubwa zaidi kwenye sekta za kilimo na maendeleo ya biashara za vijijini.

Majadiliano hayo pia yalisisitiza umuhimu wa kuziba pengo lililopo kati ya wawekezaji wa kimataifa na jamii nyingi ambazo bado zimeendelea kubaki nje ya mifumo rasmi ya fedha.

Kwa CRDB Bank Foundation, ushiriki katika mikutano ya BFWG umetoa jukwaa muhimu la kushirikisha uzoefu wa Tanzania katika utekelezaji wa miradi ya maendeleo pamoja na kuimarisha ushirikiano wa kimkakati unaoweza kuleta vyanzo vipya vya mitaji karibu zaidi na wajasiriamali wa vijijini, wakulima na biashara zinazomilikiwa na jamii.

Zaidi ya hayo, Foundation inaendelea kuonyesha dhamira yake ya kuziba mapengo ya upatikanaji wa huduma muhimu za maendeleo kama inavyofanya sasa kupitia programu ya iMBEJU Nuru, inayotekelezwa kwa ushirikiano na Shirika la Umeme Tanzania (TANESCO) kwa kutoa ruzuku za gharama za kuunganishiwa umeme kwa jamii za vijijini ambazo zina changamoto ya upatikanaji wa huduma hiyo muhimu.
Kupitia mipango kama hii, CRDB Bank Foundation inaendelea kuhimiza matumizi ya mifumo bunifu ya ufadhili inayounganisha mitaji kutoka sekta ya umma, sekta binafsi na taasisi za maendeleo ili kupunguza vihatarishi vya uwekezaji, kuongeza upatikanaji wa huduma muhimu na kuweka msingi thabiti wa ukuaji wa uchumi shirikishi.

Kwa kushirikiana na taasisi za maendeleo za kimataifa na wadau wa kifedha, Foundation inalenga kuharakisha upatikanaji wa fedha kwa miradi na biashara zinazochochea ajira, kuimarisha uhakika wa chakula na kujenga uchumi imara na endelevu katika maeneo ya vijijini.

Ushiriki wa CRDB Bank Foundation katika mkutano huo wa Rome ni sehemu ya utekelezaji wa dira ya kuchochea maendeleo jumuishi kwa kuunganisha mitaji na fursa zilizopo katika jamii. Wakati majadiliano ya kimataifa kuhusu maendeleo jumuishi na ufadhili endelevu yakiendelea, CRDB Bank Foundation inaendelea kuelekeza nguvu zake katika kubadili ushirikiano kuwa miradi inayotekelezeka, na miradi hiyo kuwa matokeo halisi yanayogusa maisha ya mamilioni ya wananchi wa vijijini nchini Tanzania na kwingineko.
soma zaidi »

on October 05, 2026

Serikali imesema Tanzania inakabiliwa na pengo la takribani dola bilioni 10 za Marekani katika fedha zinazohitajika kutekeleza mipango yake ya kukabiliana na mabadiliko ya tabianchi.

soma zaidi »

on October 05, 2026

 


Naibu Waziri wa Nishati, Mhe. Salome Makamba (Mb), ameshiriki  katika Tanzania Climate Finance Roundtable 2026, iliyofanyika katika Ukumbi wa Ofisi za Benki Kuu ya Tanzania (BoT), jijini Dar es Salaam.

Kikao hicho kimewakutanisha viongozi, wawakilishi wa mashirika ya kimataifa na wadau mbalimbali wa mazingira, kwa ajili ya kujadili fursa na mikakati ya kuongeza upatikanaji wa fedha za kukabiliana na mabadiliko ya tabianchi.

Wizara ya Nishati ni mdau muhimu katika agenda ya tabianchi, hususan kupitia juhudi za kuongeza matumizi ya nishati safi, nishati jadidifu na teknolojia rafiki kwa mazingira, sambamba na kuimarisha usalama na upatikanaji wa nishati nchini.





soma zaidi »

on October 05, 2026
Mkuu wa Mkoa wa Shinyanga, Mhe. Mboni Mhita, amemuapisha Mhe. Dkt. Fransis Daud Mlacha kuwa Mkuu wa Wilaya ya Kahama.

Hafla ya uapisho imefanyika leo katika Ukumbi wa Ofisi ya Mkuu wa Mkoa wa Shinyanga, ambapo baada ya kuapishwa, Dkt. Mlacha amekabidhiwa rasmi vitendea kazi na Mkuu wa Mkoa huo, Mhe. Mboni Mhita, kwa ajili ya kuanza kutekeleza majukumu yake katika Wilaya ya Kahama.

Dkt. Mlacha anaanza rasmi majukumu yake ya kuiongoza Wilaya ya Kahama kwa mujibu wa mamlaka aliyopewa.









soma zaidi »

on October 05, 2026
NA EMMANUEL MBATILO, DAR ES SALAAM

SERIKALI inaendelea kuchukua hatua mbalimbali za kuimarisha taaluma na hadhi ya walimu nchini, ikiwamo kuanzisha mafunzo ya vitendo kwa wahitimu wa ualimu kabla ya kuajiriwa, pamoja na kuanzisha mfumo wa utoaji leseni kwa walimu.
soma zaidi »

on October 05, 2026

 

Naibu Katibu Mkuu Ofisi ya Waziri Mkuu-Kazi, Ajira na Mahusiano, Bi.  Zuhura Yunus, kwa niaba ya Katibu Mkuu, Bi. Mary Maganga, akitoa hotuba wakati wa ufunguzi wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, ulioanza leo Oktoba 5, 2026 jijini dar es ssalaam. Wengine pichani kutoka kushoto ni Dkt. Sabelo Mbokazi, Mkuu wa Kitengo Cha Kazi, Ajira, na Uhamaji wa Kamisheni ya Umoja Wa Afrika (AU) Mhe. Sheikha Najwa Bint Abdulrahman Al-Thani, Naibu Katibu Mkuu Wizara ya Kazi nchini Qatar na Mhe, Mohammed Hassan Al Obaidli kutoka Baraza la Ushirikiano la Nchi za Ghuba (GCC Bureau)

Naibu Katibu Mkuu Ofisi ya Waziri Mkuu-Kazi, Ajira na Mahusiano, Bi.  Zuhura Yunus, kwa niaba ya Katibu Mkuu, Bi. Mary Maganga, akitoa hotuba wakati wa ufunguzi wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, ulioanza leo Oktoba 5, 2026 jijini dar es ssalaam.

Katibu Mkuu Ofisi ya Waziri Mkuu-Kazi, Ajira na Mahusiano, Bi.  Zuhura Yunus (katikati), kwa niaba ya Katibu Mkuu, Bi. Mary Maganga, akitoa hotuba wakati wa ufunguzi wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, ulioanza leo Oktoba 5, 2026 jijini dar es ssalaam. Wengine pichani kushoto ni Dkt. Sabelo Mbokazi, Mkuu wa Kitengo Cha Kazi, Ajira, na Uhamaji wa Kamisheni ya Umoja Wa Afrika (AU) na Mhe. Sheikha Najwa Bint Abdulrahman Al Thani, Naibu Katibu Mkuu Wizara ya Kazi nchini Qatar.

Washiriki wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira Oktoba 5, 2026 jijini dar es ssalaam.
Katibu Mkuu Wizara ya Kazi nchini Qatar, Mhe. Sheikha Najwa Bint Abdulrahman Al-Thani, Akizungumza Kwenye kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, ulioanza leo Oktoba 5, 2026 jijini dar es ssalaam

Mhe, Mohammed Hassan Al Obaidli kutoka Baraza la Ushirikiano la Nchi za Ghuba (GCC Bureau), akizungumza kwenye kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, leo Oktoba 5, 2026 jijini dar es ssalaam

Mkurugenzi Mkuu wa Mfuko wa Hifadhi ya Jamii kwa Watumishi wa Umma (PSSSF), Bw. Fortunatus Magambo (Wapili kulia) na Mkurugenzi Mkuu wa Wakala wa Afya na Usalama Mahali pa Kazi (OSHA)  Bi. Khadija Mwenda,wakiwa katika ufunguzi wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, leo Oktoba 5, 2026 jijini dar es ssalaam.

UJUMBE WA TANZANIA KWENYE ufunguzi wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, leo Oktoba 5, 2026 jijini dar es ssalaam.


Katibu Mkuu Wizara ya Kazi nchini Qatar, Mhe. Sheikha Najwa Bint Abdulrahman Al-Thani (Kulia), akizungumza jambo na Naibu Katibu Mkuu Ofisi ya Waziri Mkuu-Kazi, Ajira na Mahusiano, Bi.  Zuhura Yunus, waki wa ufunguzi wa kikao cha Makatibu Wakuu, Watendaji na Wataalamu wa Mkutano wa Pili wa Doha Dialogue kuhusu uhamaji wa nguvu kazi na ajira, leo Oktoba 5, 2026 jijini dar es ssalaam.


✅Tanzania yasisitiza utekelezaji wa vitendo katika uhamaji wa nguvu kazi Afrika na GCC+


✅Asema Tanzania itahakikisha Maslahi ya Wafanyakzi wanaokwenda kufanya kazi nje ya nchi yanalindwa


Na: OWM (KAM) – Dar es Salaam


Serikali ya Tanzania imesisitiza umuhimu wa kuimarisha ushirikiano katika masuala ya kulinda haki za wafanyakazi na maslahi ya wahamiaji ili kuhakikisha uhamaji wa nguvu kazi kati ya Afrika na nchi za GCC+ unakuwa salama, wenye haki na wenye tija.


Akizungumza leo tarehe 5 Oktoba, 2026 jijini Dar es salaam, Naibu Katibu Mkuu, Ofisi ya Waziri Mkuu - Kazi, Ajira na Mahusiano, Zuhura Yunus ambaye alimwakilisha Katibu Mkuu wa Ofisi hiyo katika Mkutano wa Pili wa Doha Dialogue uliowakutanisha Makatibu wakuu, Watendaji na Wataalamu wa Serikali ya Jamhuri ya Muungano wa Tanzania, Serikali ya Nchi ya Qatar, Tume ya Umoja wa Afrika na washiriki kutoka nchi wanachama wa Baraza la Ushirikiano la Nchi za Ghuba (Gulf Cooperation Council - GCC) amesema idadi kubwa ya vijana kutoka nchi za Afrika inaendelea kutafuta fursa za ajira katika nchi za nje hususan katika nchi za Ghuba, na kueleza kuwa kuna umuhimu wa kuhakikisha mchakato huo unafanyika kwa usalama na kulinda haki zao.


“Mafanikio ya Doha Dialogue hayapaswi kupimwa kwa ahadi na makubaliano pekee, bali kwa hatua zitakazochukuliwa katika kuimarisha mifumo ya uajiri, maslahi, usalama na afya mahali pa kazi, upatikanaji wa haki, kinga ya jamii na mifumo ya takwimu za uhamaji wa nguvu kazi,” amesema 


Kadhalika, amesema Tanzania ipo tayari kushirikiana na Umoja wa Afrika pamoja na nchi za Ghuba, Jordan, Lebanon na washirika wengine katika kujenga mfumo madhubuti wa ushirikiano utakaosaidia kuimarisha uhamaji salama na wenye staha wa nguvu kazi kati ya Afrika na nchi za Ghuba.


Kwa upande wake, Katibu Mkuu wa Wizara ya Kazi Qatar, Sheikha Najwa bit Abdulrahman Al-Thani, amesema ushirikiano kati ya nchi za Ghuba na Afrika unapaswa kuimarishwa zaidi sambamda na kubadilishana uzoefu katika kujenga mifumo ya pamoja inayotekelezeka na yenye matokeo.


Vilevile, amesema nchi za Ghuba zimepiga hatua katika kuimarisha mafunzo ya ufundi na stadi, hivyo itatumia uzoefu huo kwa kushirikiana na nchi za Afrika katika kuwaandaa vijana wenye ujuzi unaohitajika katika soko la ajira.


Naye, Mkuu wa Idara ya Kazi, Ajira na Uhamaji wa Nguvu Kazi katika Tume ya Umoja wa Afrika,  Dkt. Sabelo Mbokazi amesema kuongezeka kwa vijana kutoka Afrika, hususan Afrika Mashariki, baadhi ya nchi za Afrika Magharibi na Afrika Kaskazini, wanaokwenda kufanya kazi katika nchi za Ghuba kunaonesha umuhimu wa kuimarisha ushirikiano kati ya kanda hizo mbili katika kulinda haki na maslahi ya wafanyakazi wahamiaji.


Mkutano wa Pili wa Uhamaji wa Nguvu Kazi (Second Doha Dialogue on Labour Mobility) unaratibiwa na Serikali ya Jamhuri ya Muungano wa Tanzania kwa kushirikiana na Serikali ya Nchi ya Qatar, Tume ya Umoja wa Afrika na washiriki kutoka nchi wanachama wa Baraza la Ushirikiano la Nchi za Ghuba (Gulf Cooperation Council - GCC) ukiongozwa na kauli mbiu isemayo “Kuendeleza Uhamaji wa Nguvu kazi yenye Haki na endelevu katika ya Nchi za Afrika na Ghuba (GCC+).


MWISHO

soma zaidi »
Subscribe to: Posts (Atom)