Recent Post Recent Post
View More

on October 26, 2026

Na Mwandishi Wetu, Mbeya

MKUU wa Wilaya ya Mbeya, Mhe. Solomon Itunda, amefunga rasmi mafunzo ya Jeshi la Akiba yaliyofanyika katika Kata ya Itagano jijini Mbeya, ambapo jumla ya wahitimu 47 wamekamilisha mafunzo hayo kwa mafanikio makubwa. 

Mafunzo hayo yalilenga kuwajengea uwezo wa kina katika masuala ya ulinzi, usalama, uzalendo, pamoja na utumishi uliotukuka kwa Taifa.

Hafla hiyo ya ufungaji wa mafunzo ilifanyika Oktoba 23 2026, katika uwanja wa Shule ya Msingi Itagano jijini Mbeya, ikihudhuriwa na viongozi mbalimbali pamoja na wananchi wa eneo hilo.

Akizungumza na wahitimu hao wakati wa kufunga mafunzo hayo, Mhe. Itunda amewataka kutumia vyema maarifa na ujuzi walioupata kwa kuzingatia nidhamu ya hali ya juu, utii wa sheria na uzalendo katika kutekeleza majukumu yao ya kulinda amani na usalama wa nchi.

Aidha, Mhe. Itunda amesisitiza umuhimu wa wahitimu hao kushirikiana kwa karibu na vyombo vingine vya ulinzi na usalama ili kuzuia vitendo vyote vinavyoweza kuhatarisha usalama wa wananchi. 

Alieleza kuwa amani na utulivu ndio msingi mkuu wa maendeleo ya kijamii na kiuchumi, hivyo kila mwananchi ana wajibu wa kushiriki kikamilifu katika kuvilinda kwa kuimarisha mshikamano, kutoa taarifa za viashiria vya uhalifu, na kuepuka vitendo vyote vinavyoweza kuvuruga utulivu katika jamii.


Katika hatua nyingine, Mhe. Itunda amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa juhudi kubwa za Serikali anayoiongoza katika kudumisha amani, utulivu na usalama nchini.

Alibainisha kuwa mazingira salama ndiyo yanayowawezesha wananchi kushiriki kikamilifu katika shughuli mbalimbali za uzalishaji na kuchangia kukuza uchumi wa Taifa.

Akimalizia hotuba yake, Mhe. Itunda amewataka wahitimu hao 47 kuwa mfano bora katika jamii kwa kuzingatia maadili mema, uzalendo na uwajibikaji, huku akiwasihi kutumia mafunzo waliyoyapata kwa manufaa ya jamii nzima na Taifa kwa ujumla.

Mwisho

soma zaidi »

on October 26, 2026

 


📌Asema dhamira ya Serikali ni kuona wananchi wa kusini wananufaika na umeme wa uhakika

📌Atoa rai kwa TANESCO kumsimamia Mkandarasi kukamilisha mradi kwa wakati


Waziri wa Nishati, Mhe. Dkt. Juma Homera, amemtaka mkandarasi anayetekeleza mradi wa njia ya kusafirisha umeme wa msongo wa kilovoti 220 kutoka Songea hadi Tunduru, wenye urefu wa kilomita 214, pamoja na ujenzi wa Kituo cha Kupokea, Kupoza na Kusambaza Umeme cha Tunduru, kuongeza kasi ya utekelezaji wa mradi huo ili ukamilike kwa wakati.

Mradi huo unatarajiwa kuimarisha gridi ya Taifa na kunufaisha wananchi wa mikoa ya Ruvuma, Lindi na Mtwara kwa kuboresha upatikanaji wa umeme na kuchochea shughuli mbalimbali za kiuchumi na kijamii.

Waziri Homera ametoa agizo hilo Oktoba 25, 2026, wakati wa ziara yake ya kukagua maendeleo ya mradi huo, ambao unatekelezwa katika sehemu kuu mbili. Sehemu ya kwanza ni ujenzi wa njia ya kusafirisha umeme wa msongo wa kilovoti 220 kutoka Songea hadi Tunduru, ikijumuisha ujenzi wa Kituo cha Kupokea, Kupoza na Kusambaza Umeme cha Tunduru, huku sehemu ya pili ikiwa ni ujenzi wa njia ya kusafirisha umeme wa msongo wa kilovoti 220 kutoka Tunduru hadi Masasi, yenye urefu wa kilomita 177.

“Nimeona maendeleo ya mradi. TANESCO, msimamieni mkandarasi ili aweze kuongeza kasi ya utekelezaji wa mradi. Dhamira ya Serikali ni kuona wananchi wa mikoa ya kusini wananufaika na uwekezaji katika sekta ya umeme ambayo imekuwa na mchango mkubwa katika shughuli za kichumi na kijamii’’alifafanua Waziri Homera.

Akizungumza kwa niaba ya Mkurugenzi Mtendaji wa TANESCO, Naibu Mkurugenzi Mtendaji anayeshughulikia Mipango, Utafiti na Uwekezaji, Mhandisi Amos Kaihula, amesema utekelezaji wa mradi wa njia ya kusafirisha umeme kutoka Songea hadi Masasi umefikia asilimia 56, huku mradi wa njia ya kusafirisha umeme kutoka Tunduru hadi Masasi ukiwa umefikia asilimia 34.

“Utekelezaji wa miradi hii ni muhimu kwa kuwa inalenga kuhakikisha wananchi wa mikoa ya Kusini wananufaika na umeme wa uhakika. Tunafanya jitihada kubwa za kumsimamia mkandarasi ili aweze kukamilisha kazi kwa wakati na kwa ufanisi, kwa maslahi ya maendeleo ya nchi na Taifa kwa ujumla,” alieleza Mhandisi Kaihula.

Mradi huo, unatekelezwa na Kampuni ya Kalpataru Projects International Limited kutoka India ambapo sehemu ya kwanza ya mradi kutoka Songea hadi Tunduru, unagharimu shilingi bilioni 150.78, huku sehemu ya pili ya mradi kutoka Tunduru hadi Masasi ukigharimu shilingi bilioni 157.69.












soma zaidi »

on October 25, 2026
SHIRIKA la Viwango Tanzania (TBS), Kanda ya Magharibi, limeimarisha ukaguzi wa bidhaa za vipodozi na vyakula katika Mkoa wa Katavi kwa lengo la kuhakikisha bidhaa zinazouzwa zinakidhi viwango vya ubora na usalama kwa afya za watumiaji.
soma zaidi »

on October 25, 2026
NA EMMANUEL MBATILO, DAR ES SALAAM

CHUO Kikuu cha Dar es Salaam (UDSM) kimesisitiza umuhimu wa kutunza mazingira kwa kupanda miti ya asili, huku kikijivunia mafanikio yaliyopatikana katika kipindi cha miaka 65 tangu kuanzishwa kwake mwaka 1961.
soma zaidi »

on October 25, 2026
Katibu Mkuu Ofisi ya Makamu wa Rais, Dkt. Richard Muyungi akizungumza jambo wakati wa ufunguzi wa ufunguzi wa Mkutano wa 15 wa Kamati ya Usimamizi ya Mamlaka ya Ziwa Tanganyika (LTA) uliofanyika Oktoba 25, 2026 Jijini Dar es Salaam.
soma zaidi »

on October 25, 2026

Kamati ya Kudumu ya Bunge ya Viwanda, Biashara, Kilimo na Mifugo imeridhishwa na ubora wa jengo la Shirika la Viwango Tanzania (TBS) lililopo Njedengwa, jijini Dodoma, ikieleza kuwa uwekezaji huo utaongeza ufanisi katika utoaji huduma za upimaji na na kusogeza huduma karibu

Mwenyekiti wa kamati hiyo, Mhe.Deodatus Mwanyika,ameyasema hayo baada ya wajumbe wa kamati hiyo kutembelea jengo hilo na kukagua maabara pamoja na vifaa vilivyofungwa kwa ajili ya utoaji wa huduma za upimaji na uhakiki wa ubora wa bidhaa. Alisema ziara hiyo ni sehemu ya majukumu ya Bunge ya kuisimamia Serikali kupitia Wizara ya Viwanda na Biashara, ikiwemo kufuatilia utekelezaji wa miradi iliyopangiwa na kupitishiwa bajeti.

Amesema lengo la ziara hiyo halikuwa kukagua jengo pekee, bali pia kujionea matumizi ya fedha za umma, ubora wa ujenzi, vifaa vilivyonunuliwa, shughuli zinazofanyika na uwepo wa wataalamu wanaotekeleza majukumu ya shirika hilo. Alieleza kuwa kamati imeridhishwa na kiwango cha ujenzi pamoja na ubora wa vifaa vilivyowekwa katika maabara hizo.

 "Uwekezaji huo ni muhimu katika kuijenga TBS imara yenye uwezo wa kukabiliana na ushindani wa soko, kulinda viwanda vya ndani dhidi ya bidhaa zisizokidhi viwango na kuhakikisha bidhaa zinazotumiwa na Watanzania ni bora na salama. Alisisitiza kuwa mafanikio hayo yanahitaji pia kuwa na wafanyakazi wenye ujuzi, vifaa vya uhakika na mazingira bora ya kufanyia kazi."amesema Mhe.Mwanyika

Amesema baada ya kujionea kazi iliyofanyika na uwezo wa miundombinu hiyo, kamati imeridhishwa na uwekezaji huo na kuhimiza kuendelea kwa kazi ili kuhakikisha TBS inatekeleza majukumu yake kwa ufanisi.

Ameongeza kuwa kuimarika kwa shirika hilo kutachangia kulinda afya za wananchi, kuimarisha ubora wa bidhaa na kuongeza ushindani wa viwanda vya Tanzania katika soko la ndani na la kimataifa.

Naye Mkurugenzi Mkuu wa TBS, Dkt. Ashura Katunzi, amesema  ziara hiyo ya kamati ya bunge  imekuwa fursa kwa wajumbe wa kamati kujionea utekelezaji wa uwekezaji uliofanywa na Serikali katika kuboresha mazingira ya kazi ya TBS, hususan ujenzi wa jengo na uboreshaji wa maabara zinazowezesha shirika hilo kutoa huduma za kitaalamu kwa wadau wake.

Dkt.Katunzi ametoa shukrani kwa Rais Samia Suluhu Hassan pamoja na Waziri wa Viwanda na Biashara, Mhe.Judith Salvio Kapinga, kwa kuwezesha uwekezaji huo, ambao amesema umeimarisha uwezo wa TBS kutoa huduma karibu zaidi na wananchi na kuongeza ufanisi katika shughuli zake za kila siku.

"Kukamilika kwa jengo hilo na kuwepo kwa maabara hizo jijini Dodoma ni hatua muhimu katika kusogeza huduma za kitaalamu karibu na wateja, kupunguza changamoto za upatikanaji wa huduma na kuwezesha shughuli za upimaji wa ubora wa bidhaa kufanyika kwa ufanisi zaidi."amesema Dkt.Katunzi

Amesisitiza kuwa TBS itaendelea kuboresha huduma zake ili kusaidia ukuaji wa sekta ya viwanda na biashara nchini, kwa kuhakikisha bidhaa zinazozalishwa ndani ya nchi na zinazoingia sokoni zinazingatia viwango vinavyotakiwa, kwa lengo la kulinda afya, usalama na maslahi ya walaji.

Hata hivyo ametoa wito kwa wananchi, wazalishaji na wafanyabiashara kutumia huduma zinazopatikana katika ofisi za TBS jijini Dodoma, akieleza kuwa shirika hilo litaendelea kujizatiti kutoa huduma bora, za kuaminika na zinazokidhi mahitaji ya wadau, sambamba na jukumu lake la kuhakikisha Watanzania wanapata bidhaa bora na salama.

soma zaidi »

on October 25, 2026

Miaka minne baada ya kupata mafunzo kupitia Mfuko wa Kuendeleza Ujuzi (SDF), unaosimamiwa na Mamlaka ya Elimu Tanzania (TEA), Mwamvua Issa Hamisi, mjasiriamali kutoka Kaliua, Tabora, ameendelea kukuza biashara yake ya uzalishaji na uchakataji wa bidhaa zitokanazo na mazao ya nyuki.
soma zaidi »

on October 25, 2026

 


📌 Mafanikio ya kampuni yapimwe pia kwa mchango wake katika kuboresha maisha ya wananchi, si faida pekee.

📌 Biashara endelevu zijenge uhusiano wa kudumu na jamii ili kuhakikisha uwepo wa soko la uhakika kwa vizazi vijavyo.

📌 Serikali na sekta binafsi zashauriwa kushirikiana kukuza viwanda, uwekezaji na uchumi jumuishi.

Naibu Waziri wa Viwanda na Biashara, Mhe.Dennis Lazaro Londo (Mb), amezitaka kampuni na taasisi nchini kuweka uwajibikaji kwa jamii katika mipango na mikakati yao ya kibiashara ili kuhakikisha ukuaji wa uchumi unaambatana na maboresho ya maisha ya Watanzania na maendeleo endelevu ya Taifa.

Mhe Londo ameyasema hayo jijini Dar es Salaam, katika hafla ya Tuzo za Uwajibikaji kwa Jamii kwa Makampuni, Ukanda wa Afrika Mashariki, Awamu ya Tanzania 2026, ambapo amesema mafanikio ya kampuni hayapaswi kupimwa kwa faida inayopata pekee, bali pia kwa mchango wake katika jamii. 

“Katika biashara endelevu hatuwezi kupima mafanikio ya kampuni au taasisi kwa biashara inayofanya au kwa faida inayopata; biashara ni zaidi ya takwimu “ Alisema Mhe. Londo

Amesema uwajibikaji kwa jamii (CSR) ni nyenzo muhimu inayoiwezesha sekta binafsi kushiriki katika maendeleo ya nchi kwa kuongeza ajira, kuendeleza ujuzi, kuboresha huduma za elimu na afya, kuhifadhi mazingira na kuwawezesha wanawake na vijana kiuchumi. 

Aidha Mhe Londo aliongeza kuwa wajibu wa mzalishaji si kutoa bidhaa na huduma pekee, bali pia kuchangia ustawi wa jamii na kujenga mazingira rafiki kwa biashara za sasa na zijazo na kusisitiza kampuni zinapaswa kuangalia zaidi manufaa ya muda mrefu kwa kujenga uhusiano endelevu na jamii zinazozunguka shughuli zao.

akieleza kuwa jamii yenye ustawi ni sehemu muhimu ya maendeleo ya biashara ma kuhimiza makampuni kuwekeza katika vipaji na ujuzi wa Watanzania na kutoa fursa kwa wajasiriamali wadogo na wa kati ili kuongeza ushiriki wao katika shughuli za kiuchumi.

Ameeleza kuwa Serikali inaendelea kuimarisha mazingira ya biashara na uwekezaji kupitia maboresho ya miundombinu ya barabara, reli, bandari, mawasiliano na nishati, hatua zinazolenga kurahisisha usafirishaji, uzalishaji na shughuli za biashara na kusisitiza maendeleo endelevu hayawezi kufikiwa na Serikali pekee, bali yanahitaji ushirikiano wa karibu kati ya Serikali, sekta binafsi, taasisi za umma, vyama vya wafanyakazi na wananchi.

Kwa upande wake, Mkurugenzi wa Orange CSR Research Worldwide, Bi. Suzan Kanga amesema Orange CSR itaendelea kuunga mkono na kutambua taasisi mbalimbali na kuleta mabadiliko chanya katika jamii ili kubadilisha maisha ya wananchi.

Pia amezipongeza na kuziasa taasisi zilizopewa tuzo ziendelee kutumikia wananchi kwa manufaa ya maendeleo ya nchi nzima.

Katika hafla hiyo, Londo amewapongeza Orange CSR Research Worldwide kwa kuandaa tuzo hizo zinazolenga kutambua, kuthamini na kuhamasisha mchango wa kampuni na taasisi katika maendeleo ya jamii na amewapongeza washindi na wote waliotambuliwa, huku akiwahimiza kuendeleza juhudi zao, akisisitiza kuwa thamani ya uwajibikaji kwa jamii haipimwi kwa tuzo pekee, bali kwa mabadiliko halisi na endelevu katika maisha ya wananchi.










soma zaidi »

on October 25, 2026

 


Na: OWM–TAMISEMI, Mpanda - Katavi


Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (OWM–TAMISEMI), Mhe. Prof. Riziki Shemdoe, amekagua miradi ya maendeleo yenye thamani ya shilingi bilioni 26 katika Manispaa ya Mpanda, mkoani Katavi, na kuwataka watumishi wa umma kuhakikisha wananchi wanapata huduma bora ili uwekezaji huo uwe na manufaa kwa wananchi na tija kwa Taifa.

Prof. Shemdoe ametoa wito huo Oktoba 24, 2026, katika Hospitali ya Manispaa ya Mpanda, wakati wa ziara yake ya kikazi iliyolenga kukagua miradi ya maendeleo na kuhimiza uwajibikaji kwa watumishi wa umma katika manispaa hiyo.

Katika ziara hiyo, Prof. Shemdoe alikagua miradi yenye thamani ya shilingi bilioni 26 ikiwemo ujenzi wa shule ya kwanza ya sekondari ya wavulana Katavi Boys, ujenzi wa barabara za lami za mjini kupitia Mradi wa TACTIC, madaraja mawili pamoja na ujenzi wa Jengo la Watoto Wachanga katika Hospitali ya Manispaa ya Mpanda.

Baada ya kukagua Jengo la Watoto Wachanga, Prof. Shemdoe amewataka watumishi wa hospitali hiyo kuendelea kuwahudumia wagonjwa kwa weledi na uzalendo ili uwekezaji uliofanywa uendane na ubora wa huduma zinazotolewa kwa wananchi.

“Niendelee kuwaomba watumishi wote, na si wa hapa hospitalini pekee, tuendelee kuwasikiliza na kuwahudumia wananchi kwa lugha nzuri. Kumpa mtu tabasamu kwa kumhudumia vizuri ni baraka kwako, lakini akiondoka akiwa ananung’unika, huwezi kupata baraka,” amesisitiza Prof. Shemdoe.

Aidha, Prof. Shemdoe amemshukuru Mhe. Rais Dkt. Samia Suluhu Hassan kwa uwekezaji wa shilingi bilioni 26 katika miundombinu ya elimu, barabara na afya ya msingi katika Manispaa ya Mpanda, akieleza kuwa uwekezaji huo umeboresha huduma za elimu, usafiri na usafirishaji, pamoja na matibabu kwa wakazi wa Mpanda.

Kwa upande wake, Mstahiki Meya wa Halmashauri ya Manispaa ya Mpanda, Mhe. Charles Philipo, akitoa neno la shukrani kwa Prof. Shemdoe alipotembelea Shule ya Sekondari ya Katavi Boys, amemshukuru Mhe. Rais kwa kumteua Prof. Shemdoe na kumpongeza Prof. Shemdoe kwa utendaji kazi wake mzuri, huku akimwomba aridhie bweni mojawapo shuleni hapo lipewe jina lake, ombi ambalo Prof. Shemdoe aliliridhia.

Miradi hiyo yenye thamani ya bilioni 26 aliyoikagua Prof. Shemdoe ni sehemu ya kiasi cha shilingi Trilioni 1.4 ambacho Mhe. Rais Dkt. Samia Suluhu Hassan tangu aingie madarakani aliridhia kilektwe Mkoani Katavi kwa ajili ya miradi maendeleo, Trilioni 1.4 ni takwimu zilizotolewa Oktoba 13, 2026 na Mkuu wa Mkoa wa Katavi Mhe. Mwanamvua Mrindoko kwa Makamu wa Rais Mhe. Deogratius Ndejembi alipowasili mkoani humo kwa ziara ya kikazi ya siku moja.















soma zaidi »

on October 25, 2026
Na Alex Sonna, KITETO, MANYARA
SERIKALI imetoa maelekezo saba yanayolenga kupata ufumbuzi wa kudumu wa mgogoro wa ardhi unaohusisha Wilaya za Chemba na Kiteto, ikiwemo kusitisha shughuli za kilimo ndani ya Hifadhi ya Wanyamapori Makame na kutenga ekari 1,200 katika Kijiji cha Ngamboro kwa ajili ya wakulima watakaostahili kupatiwa maeneo mbadala.
Maelekezo hayo yametolewa Oktoba 24, 2026, katika Kijiji cha Ndaleta, Wilaya ya Kiteto, Mkoa wa Manyara, na Waziri wa Ardhi, Nyumba na Maendeleo ya Makazi, Dkt. Leonard Akwilapo, baada ya Serikali kukamilisha uchunguzi wa mgogoro huo na kuchambua maoni ya pande mbalimbali zilizohusika. Amesema maamuzi hayo yanalenga kuhakikisha ardhi inatumika kwa kuzingatia sheria, mipaka ya kiutawala na mipango ya matumizi ya ardhi.
 Dkt. Akwilapo amesema mpaka wa kiutawala kati ya Halmashauri za Wilaya za Chemba na Kiteto haujawahi kubadilishwa kama ilivyodaiwa, hivyo wananchi na viongozi wanapaswa kuutambua na kuuheshimu.
"Wananchi waliopewa maeneo ya kilimo ndani ya Hifadhi ya Wanyamapori Makame wanapaswa kusitisha shughuli zao, huku wale watakaostahili wakitambuliwa na kupangiwa maeneo mbadala katika ekari 1,200 zilizotengwa na Kijiji cha Ngamboro. "amesema Dkt. Akwilapo
Aidha, amesema maeneo yaliyotengwa katika mipango ya matumizi ya ardhi ya vijiji vya Makame, Irkisibor, Ndedo na Katikati yataendelea kutumika kwa madhumuni yaliyokusudiwa, huku vijiji vinavyohusika vikielekezwa kuhuisha mipango yao ya matumizi ya ardhi na kuweka alama zinazoonekana wazi katika mipaka ya hifadhi ili kuzuia uvamizi na migogoro ya baadaye.
Waziri huyo pia amewataka viongozi wa vijiji kuhakikisha hawagawi ardhi nje ya mamlaka yao, akibainisha kuwa maeneo yanayodaiwa kugawiwa na vijiji vya Ndaleta na Mwitikia, maeneo ya Katikati na Ngamboro yalihusisha mamlaka ambazo hazikuwa na uwezo wa kisheria wa kuyagawa, hususan maeneo yaliyo nje ya mipaka ya vijiji au yaliyotengwa kwa ajili ya uhifadhi.
Kwa upande wake, Naibu Waziri wa Maliasili na Utalii, Hamad Hassan Chande, amewataka wananchi kupokea maamuzi ya Serikali kwa utulivu, kuheshimu maelekezo yaliyotolewa na kuendeleza ushirikiano ili kurejesha shughuli za maendeleo na kudumisha amani.
Amesisitiza kuwa Serikali itaendelea kushirikiana na viongozi wa maeneo husika katika kutatua changamoto zinazowakabili wananchi.
Naye Mkuu wa Mkoa wa Manyara, Martin Shigela, amesisitiza umuhimu wa kusimamia matumizi sahihi ya ardhi na kuhakikisha ugawaji wa maeneo unazingatia mipaka na matumizi yaliyokubaliwa.
Amesema serikali itatoa maelekezo na mwongozo kwa halmashauri ili kuzuia kujirudia kwa makosa yanayohusiana na ugawaji wa ardhi, hususan maeneo yaliyotengwa kwa ajili ya shughuli mbalimbali za wananchi.
Shingela amewataka watendaji wa kata, wakuu wa wilaya, wakuu wa idara na viongozi wengine wa serikali kuhakikisha wanakomesha vitendo vya baadhi ya viongozi wa vijiji kutumia madaraka yao vibaya kwa kugawa maeneo ya malisho kwa ajili ya kilimo au maeneo ya kilimo kwa ajili ya malisho.

 Aidha ameonya kuwa watendaji wa serikali watakaokiuka maelekezo yaliyotolewa watachukuliwa hatua kwa mujibu wa taratibu zinazotumika.

Aidha, Mkuu huyo wa Mkoa amesisitiza umuhimu wa kuwatambua wananchi wanaopaswa kuhama kutoka maeneo yaliyopangwa kwa matumizi mengine na kuwahamishia katika eneo la hekta 1,200 lililotengwa kwa ajili yao.

Amesema zoezi hilo linapaswa kufanyika kwa kuzingatia misingi ya haki na usalama, bila upendeleo katika ugawaji wa ardhi. Ameeleza kuwa hakuna sababu ya mtu mmoja kupewa eneo kubwa huku wengine wakibaki na maeneo madogo yasiyolingana na mahitaji yao.

"Timu ya wataalamu ikiongozwa na Kamishna wa Ardhi itashirikiana na Mkuu wa Wilaya, kamati ya usalama na Mkurugenzi wa Halmashauri kutambua ukubwa wa eneo lililotengwa pamoja na kuandaa orodha ya wananchi wote wanaopaswa kuhamishwa. Amesema hatua hiyo itasaidia kuhakikisha ardhi inagawiwa kwa usawa na wananchi wote wanaostahili wanapata maeneo yao kwa kuzingatia haki."amesema Mhe.Shingela

Vilevile, amewataka wananchi kuwa wavumilivu na kutoa ushirikiano kwa serikali ili zoezi hilo likamilike kwa haraka kabla ya kuanza kwa msimu wa mvua, hatua itakayowawezesha kupata maeneo ya kuzalisha.

Amesema wananchi wenye mahitaji mengine ya kiserikali wanapaswa kufuata njia rasmi kupitia kwa watendaji wa kata na vijiji, Mkuu wa Wilaya, madiwani, Mkurugenzi wa Halmashauri na mbunge ili kupata suluhisho la kudumu kwa changamoto zinazowakabili.

soma zaidi »
Subscribe to: Posts (Atom)