Recent Post Recent Post
View More

on November 02, 2026

 


Na Jackline Minja, WMJJWM
Dodoma

Naibu Waziri wa Maendeleo ya Jamii, Jinsia, Wanawake na Makundi Maalum, Mhe. Mhandisi Maryprisca Mahundi, amewataka wazazi na walezi kuendelea kutekeleza wajibu wao wa kuwalinda watoto dhidi ya vitendo vya ukatili na udhalilishaji, akisisitiza kuwa jukumu la malezi na ulinzi wa watoto linaanzia katika ngazi ya familia na si kusubiri Serikali iingilie kati baada ya mtoto kufanyiwa vitendo vinavyokiuka maadili ya jamii.

Mhe. Mahundi ametoa wito huo leo Novemba 2, 2026, jijini Dodoma, wakati akijibu maswali ya Wabunge kuhusu hatua zinazochukuliwa na Serikali katika kutoa elimu kwa mabinti na jamii kuhusu kuripoti vitendo vya udhalilishaji.

Amesisitiza kuwa wazazi na walezi wanapaswa kuwa karibu na watoto wao, kuwafuatilia, kuwapatia malezi bora na kuwaelekeza katika misingi ya maadili mema yanayozingatia mila, desturi na tamaduni za Kitanzania ili kuwakinga dhidi ya vitendo vinavyoweza kuhatarisha usalama na mustakabali wao.

Aidha, ameeleza kuwa Serikali inaendelea kutoa elimu kwa mabinti na jamii kupitia Mpango Kazi wa Kitaifa wa Kutokomeza Ukatili dhidi ya Wanawake na Watoto (MTAKUWWA), unaotekelezwa kupitia kamati za kisekta kuanzia ngazi ya Taifa hadi Vijiji na Mitaa.

Vilevile, amesema kila Kata ina Polisi Jamii wanaoshiriki kutoa elimu kwa wananchi, huku Wizara ya Habari, Utamaduni, Sanaa na Michezo ikiratibu wadau wake, wakiwemo viongozi wa kimila na vyombo vya habari, katika kuelimisha jamii kuhusu namna ya kukabiliana na vitendo vya ukatili na udhalilishaji.

Amehitimisha kwa kutoa wito kwa wananchi wa makundi yote kuendelea kushirikiana na Serikali katika kutokomeza ukatili wa aina zote na kuhakikisha watoto wanakuwa katika mazingira salama yanayowawezesha kukua, kupata haki zao na kutimiza ndoto zao.
soma zaidi »

on November 02, 2026

 


 Waziri wa Wizara ya Viwanda na Biashara, Mhe. Judith Kapinga (Mb), amesema sekta ya viwanda na biashara ni miongoni mwa nguzo muhimu za uchumi wa Taifa, ikichangia asilimia 15 ya Pato la Taifa na kutarajiwa kuendelea kukua kwa wastani wa asilimia sita kila mwaka.

Waziri Kapinga ameyasema hayo Novemba 2, 2026, jijini Dodoma, wakati akifungua Maonesho ya bidhaa na huduma za viwanda na Biashara sambamba na Huduma za Kliniki za Biashara yanayofanyika katika Ukumbi wa Mikutano wa Jakaya Kikwete (JKCC), kuelekea uzinduzi wa Sera ya Maendeleo Endelevu ya Viwanda ya mwaka 2025 pamoja na Sera ya Maendeleo ya Wajasiriamali Wadogo na wa Kati ya mwaka 2003, Toleo la mwaka 2025, zitakazozinduliwa Novemba 4, 2026.

Amesema maonesho hayo ni sehemu ya juhudi za Serikali kuimarisha sekta ya viwanda na biashara kwa kuweka mazingira yanayowezesha kukuza uzalishaji, kuongeza thamani ya bidhaa za ndani na kupanua masoko ya bidhaa za Tanzania.

Waziri Kapinga amesisitiza kuwa ushirikiano kati ya Serikali na sekta binafsi ni muhimu katika kufikia azma ya kuwa na uchumi mkubwa zaidi, huku sekta ya viwanda na biashara ikiendelea kuwa chanzo muhimu cha ajira na fursa za kiuchumi kwa wananchi.

Aidha, amewahimiza wananchi kutembelea maonesho hayo ili kujionea bidhaa zinazozalishwa nchini, teknolojia zinazotumika viwandani pamoja na ubunifu wa wajasiriamali na wafanyabiashara, akieleza kuwa Serikali inalenga kuhakikisha bidhaa za Tanzania zinaongezwa thamani ili kukidhi mahitaji ya soko la ndani na kushindana katika masoko ya kimataifa.

Katika maonesho hayo, taasisi mbalimbali zilizo chini ya Wizara ya Viwanda na Biashara zimeshiriki, zikiwemo Shirika la Viwango Tanzania (TBS), Shirika la Kuhudumia Viwanda Vidogo (SIDO), Mamlaka ya Maendeleo ya Biashara Tanzania (TanTrade), Wakala wa Vipimo (WMA), Tume ya Ushindani (FCC), Mamlaka ya Udhibiti wa Mbolea Tanzania (TFRA), Taasisi ya Utafiti wa Viwanda Tanzania (TIRDO), Shirika la Maendeleo ya Viwanda Vidogo (TEMDO), Kituo cha Uwekezaji Tanzania (TIC) na Mamlaka ya Maendeleo ya Biashara Tanzania (TanTrade), pamoja na taasisi nyingine za sekta hiyo.

Aidha, Waziri Kapinga ametoa pongezi na shukrani kwa kampuni na wadau mbalimbali walioshiriki katika maonesho hayo na kuunga mkono maendeleo ya sekta ya viwanda na biashara, zikiwemo ALAF, Wilmar Pasta, KEDA, Lodhia, Pepsi, Coca-Cola, Goodwill na kampuni nyingine. 

Pia alitumia fursa hiyo kuwatambua na kuwashukuru wasanii waliojitokeza kushiriki na kuhamasisha wananchi pamoja na makundi mbalimbali kushiriki katika shughuli za ufunguzi wa maonesho hayo.

Maonesho hayo pia yamehudhuriwa na wanafunzi kutoka Chuo cha Biashara (CBE), viongozi waandamizi wa Wizara, wakurugenzi na wakuu wa taasisi zilizo chini ya Wizara pamoja na wadau mbalimbali wa sekta ya viwanda na biashara.





soma zaidi »

on November 02, 2026
Waziri wa Maliasili na Utalii, Mhe. Dkt. Ashatu Kijaji (Mb) akiwa ameambatana na Katibu Mkuu wa Wizara hiyo, Dkt. Hassan Abbasi, ametua jijini London, Uingereza, kwa ajili ya kushiriki Maonesho ya Kimataifa ya Utalii ya WTM London 2026 yanayotarajiwa kufanyika Novemba 3–5, 2026.
soma zaidi »

on November 02, 2026

 

Na Mwandishi Wetu, TANGA

Mwenyekiti wa Chama Cha Mapinduzi (CCM) Mkoa wa Tanga, Rajabu Abdurahmani, amesema kuwa ujenzi wa chama imara unahitaji uwepo wa watendaji wenye mazingira mazuri ya kufanyia kazi, ikiwemo kuwa na makazi ya kudumu katika ofisi za chama wilayani.

Abdurahmani amesema kuwa ili CCM iendelee kuwa na uwezo wa kusimamia majukumu yake, watendaji wa chama katika ngazi za wilaya wanapaswa kuishi katika nyumba za CCM ili kuwawezesha kutekeleza majukumu yao bila changamoto zinazotokana na gharama za kupanga makazi.

Amesema kuwa katika kutekeleza azma hiyo, walianzisha mradi wa ujenzi wa nyumba 36 za watendaji wa CCM katika Mkoa wa Tanga, wenye thamani ya Shilingi bilioni tatu, ambapo hadi sasa tayari Shilingi bilioni 1.5 zimepatikana na ujenzi unaendelea katika maeneo mbalimbali ya mkoa huo.

Akizungumza mbele ya mlezi wa CCM Mkoa wa Tanga, Rabia Abdallah Hamid, mwenyekiti huyo amesema kuwa katika awamu ya kwanza na ya pili alitoa Shilingi milioni 500 kwa kila awamu, huku awamu ya tatu akipata Shilingi milioni 500 nyingine zilizolenga kuendeleza ujenzi huo.


Amesema fedha hizo zimefanya jumla ya mchango wake kufikia Shilingi bilioni 1.5 kati ya Shilingi bilioni tatu zinazohitajika kukamilisha mradi huo.


“Nilipoeleza kuwa ninakuja kuwa Mwenyekiti wa CCM Mkoa wa Tanga na kuhakikisha najenga nyumba 36 katika mkoa huu, wengi hawakuamini, lakini nilikuwa na dhamira ya kweli ya kuhakikisha jambo hilo linatekelezwa,” amesema Abdurahmani.

Aidha, amesema uwepo wa mlezi wa mkoa huyo umempa nafasi ya kumkabidhi Shilingi milioni 500 zilizopatikana katika awamu ya tatu ili aweze kujionea maendeleo ya utekelezaji wa mradi huo.



Katika hatua nyingine, Abdurahmani amesema Mkoa wa Tanga umeanza maandalizi ya kuadhimisha miaka 50 ya kuzaliwa kwa CCM, itakayofanyika Februari 5, 2027, kwa kutekeleza miradi mbalimbali yenye kulenga kuimarisha shughuli za chama na kuchangia maendeleo ya wananchi.

Amesema kuwa katika kuadhimisha miaka hiyo, ameamua kuelekeza nguvu pia katika kuwawezesha wakulima kwa kutafuta matrekta 40 yatakayosaidia shughuli za kilimo katika wilaya za mkoa huo.

Kwa mujibu wa Abdurahmani, matrekta hayo yanatarajiwa kugawanywa kwa wilaya, kila wilaya ikipata matrekta matano, yatakayotumika kutoa huduma za kulima mashamba kwa wakulima kwa gharama ya nusu ya bei ya kawaida.


Ameeleza kuwa mkulima anayelipa Shilingi 60,000 kwa hekta moja atalipia Shilingi 30,000 kupitia mpango huo, hatua ambayo amesema inalenga kupunguza gharama za uzalishaji na kuwawezesha wakulima kuongeza tija katika shughuli zao.

Amesema mpango huo ni sehemu ya kuunga mkono juhudi za Rais na Mwenyekiti wa CCM katika kuwawezesha wakulima kupitia ruzuku ya mbolea na hatua nyingine za kuboresha sekta ya kilimo.

Akihitimisha hotuba yake, Abdurahmani amemuomba mlezi wa CCM Mkoa wa Tanga kufikisha salamu kwa Katibu Mkuu wa CCM na kumweleza azma ya mkoa huo, huku akimkaribisha atakapopata nafasi kuja kuzindua rasmi mpango wa matrekta kabla ya kuanza kusambazwa katika wilaya husika.


soma zaidi »

on November 02, 2026

 

Mamlaka ya Mapato Tanzania (TRA) inaendelea kutambua mchango mkubwa wa wenye viwanda na wafanyabiashara wadogo na wa Kati katika kukuza uchumi na kuongeza mapato ya Serikali, hivyo itaendelea kushirikiana nao kwa kuweka mazingira rafiki yatakayowezesha biashara kukua na kuimarika

Akizungumza leo Jijini Dodoma Novemba 2, 2026, katika maonesho yanayoelekea uzinduzi wa Sera ya Maendeleo ya Viwanda na sera ya Maendeleo ya Jasiriamali ndogo na za kati, Kaimu Mkurugenzi wa Idara ya Elimu kwa Mlipakodi na Mawasiliano wa TRA, Paul John Walalaze, amesema maendeleo ya viwanda na ukuaji wa biashara ni miongoni mwa mambo muhimu yatakayochochea ongezeko la mapato ya Serikali.

Walalaze amesema kuwa Serikali imeendelea kuweka mazingira mazuri ya ufanyaji biashara nchini kupitia maboresho mbalimbali yanayolenga kurahisisha shughuli za biashara, kuimarisha sekta ya viwanda na kuwezesha wafanyabiashara wadogo kupata mitaji na fursa za kukuza shughuli zao.

Amesema mwaka wa fedha 2025/26 ni wa kwanza katika utekelezaji wa Dira ya Taifa ya Maendeleo ya mwaka 2050, ambayo imeweka msisitizo katika maendeleo ya viwanda na sekta binafsi kama nguzo muhimu za kufikia malengo ya uchumi wa taifa.

Bw. Walalaze ameeleza kuwa kuimarika kwa mazingira ya biashara kutaiwezesha TRA kuongeza ufanisi katika ukusanyaji wa mapato na kuchangia kufikiwa kwa azma ya Tanzania kuwa na uchumi wenye thamani ya dola trilioni moja ifikapo mwaka 2050.

Amesema TRA ina lengo kuu la kukusanya Shilingi trilioni 42 katika mwaka wa fedha 2025/26, ikiwa ni ongezeko kutoka Shilingi trilioni 37 zilizokusanywa katika mwaka wa fedha uliopita, huku ikiendelea kuimarisha ushirikiano na sekta ya viwanda na wafanyabiashara ili kukuza mapato ya Serikali.

Aidha, amewataka wafanyabiashara wote nchini kuhakikisha wanatoa risiti za mauzo kwa wateja wao, huku wananchi wanaonunua bidhaa katika viwanda na kwa wafanyabiashara wadogo wakihimizwa kudai risiti kila wanapofanya manunuzi.

Amesisitiza kuwa risiti ni sehemu muhimu ya utambuzi na usimamizi wa kodi za Serikali, hivyo matumizi yake sahihi yatachangia kuongeza mapato yanayotumika kugharamia huduma za kijamii na miradi ya maendeleo nchini.






















soma zaidi »

on November 02, 2026

WAZIRI wa Viwanda na Biashara, Judith Kapinga,akizungumza  leo Novemba 2,2026 jijini Dodoma  wakati akifungua maonyesho ya bidhaa za viwanda na wajasiriamali, kuelekea uzinduzi wa Sera ya Maendeleo Endelevu ya Viwanda ya mwaka 2025 na Sera ya Maendeleo ya Wajasiriamali Wadogo na wa Kati ya mwaka 2003, toleo la 2025.

Na.Meleka Kulwa, DODOMA

WAZIRI wa Viwanda na Biashara, Judith Kapinga, amesema sekta ya viwanda inatarajiwa kuchangia asilimia 15 ya Pato la Taifa ifikapo mwaka 2050, huku ikilenga kukua kwa wastani wa asilimia tisa kwa mwaka ili kuimarisha uchumi na kuongeza ajira nchini.

Kapinga amesema hayo leo Novemba 2,2026 jijini Dodoma  wakati akifungua maonyesho ya bidhaa za viwanda na wajasiriamali, kuelekea uzinduzi wa Sera ya Maendeleo Endelevu ya Viwanda ya mwaka 2025 na Sera ya Maendeleo ya Wajasiriamali Wadogo na wa Kati ya mwaka 2003, toleo la 2025.

Amesema mapitio ya sera hizo yanalenga kuendana na kasi ya maendeleo ya uchumi na biashara nchini, pamoja na kufanikisha matarajio ya Dira ya Taifa ya Maendeleo 2050 ya kujenga uchumi wenye thamani ya dola trilioni moja za Marekani.

“Sekta ya viwanda na biashara ni nguzo muhimu katika kuchochea uchumi wa taifa letu. Ndiyo maana tumefanya mapitio ya sera hizi ili ziendane na kasi ya uchumi na biashara tunayoiendea,” amesema Kapinga.

Amesema maonyesho hayo yanalenga kuwawezesha Watanzania kuona bidhaa zinazozalishwa nchini, kutambua uwezo wa viwanda vya ndani na kuwafahamu wajasiriamali wanaotumia biashara kama chanzo cha kipato na ajira.

Ameeleza kuwa viwanda na biashara ni miongoni mwa sekta zinazotarajiwa kuchangia kwa kiasi kikubwa kufikia malengo ya ajira yaliyowekwa katika mpango wa utekelezaji wa Dira ya Taifa ya Maendeleo, hivyo ni muhimu kuimarisha sekta hizo kwa kuwashirikisha wajasiriamali wadogo.

Mhe.Kapinga amezitaka taasisi zilizo chini ya Wizara ya Viwanda na Biashara kuendelea kuwawezesha wajasiriamali kwa kuwapatia mafunzo na kuboresha ubora wa bidhaa zao, hususan katika hatua za mwisho za uzalishaji, ufungashaji na muonekano wa bidhaa ili ziweze kushindana katika masoko.

Ametaja bidhaa za ngozi kuwa miongoni mwa bidhaa zinazozalishwa na wajasiriamali nchini zenye ubora, lakini akasisitiza umuhimu wa kuboresha hatua za umaliziaji ili kuongeza mvuto na ushindani wake sokoni.

Aidha, amezitaka taasisi ikiwemo Shirika la Kuhudumia Viwanda Vidogo (SIDO) na Shirika la Viwango Tanzania (TBS) kuendelea kutoa mafunzo, ushauri na ithibati kwa wajasiriamali, huku akisisitiza kuwa kuwaingia sokoni hakupaswi kuwa mwisho wa msaada wanaopatiwa.

Amesema serikali itaendelea kuweka mazingira wezeshi ya biashara, kufungua fursa za masoko ya ndani na nje ya nchi na kutatua changamoto zinazokabili viwanda ili viendelee kukua, kuongeza uzalishaji na kutoa ajira kwa wananchi.

Mhe.Kapinga amesema kupitia Tantrade, serikali itaendelea kuimarisha fursa za biashara na kuhamasisha matumizi ya chapa ya Made in Tanzania ili kuongeza uelewa wa bidhaa zinazozalishwa nchini na kuwasaidia wafanyabiashara kuingia katika masoko ya kimataifa.

Ameongeza kuwa serikali itaendelea kushirikiana na BRELA kurasimisha biashara, kusajili wafanyabiashara na kuwawezesha kupata leseni na ithibati zinazohitajika, hatua itakayosaidia kupunguza idadi ya biashara zisizo rasmi na kuimarisha ukuaji wa uchumi.

Hata hivyo amewahimiza Watanzania kutembelea maonyesho hayo, akisema ni fursa ya kujionea ubunifu, uwezo na bidhaa zinazotengenezwa na viwanda pamoja na wajasiriamali wa ndani.

 
soma zaidi »

on November 02, 2026
Mkuu wa Wilaya ya Rungwe mkoani Mbeya, Mhe. Jafar Haniu, ametoa siku tano kwa wananchi wa Kijiji cha Suma na wote wanaoishi pembezoni mwa barabara ya Katumba–Mbambo–Tukuyu kuhama katika maeneo ya hifadhi ya barabara ili kuwezesha kuanza kwa kasi kwa shughuli za ujenzi wa barabara hiyo kwa kiwango cha lami.
soma zaidi »

on November 02, 2026

DODOMA, Novemba 2, 2026

Tanzania imeendelea kutambuliwa kwa mchango wake katika kuimarisha mifumo ya ufuatiliaji, tathmini, utendaji na uwajibikaji kwa umma, ikiwa ni sehemu ya jitihada za kuboresha utawala na utendaji wa Serikali barani Afrika.

Ofisi ya Waziri Mkuu, Sera, Bunge, Uratibu na Wenye Ulemavu, kupitia Idara ya Ufuatiliaji na Tathmini, leo Novemba 2, 2026, imewasilisha tuzo maalumu kwa Katibu Mkuu wa Ofisi hiyo, Dkt. Jim Yonazi, iliyotolewa kwa Tanzania kutokana na mchango wake katika kuboresha utawala  barani Afrika kupitia ushiriki wake katika mtandao wa TWENDE MBELE.

Tuzo hiyo imewasilishwa na Mkurugenzi wa Idara ya Ufuatiliaji na Tathmini, Bi. Sakina Mwinyimkuu, ikitokana na matokeo ya kikao kazi cha TWENDE MBELE kilichofanyika jijini Johannesburg, Afrika Kusini.

Utambuzi huo unaonesha mchango wa Tanzania katika kuendeleza mifumo ya ufuatiliaji na tathmini inayosaidia kuboresha utendaji wa Serikali, kuimarisha uwajibikaji na kuongeza ufanisi katika utekelezaji wa mipango na programu za maendeleo.


Katika hatua nyingine, Bi. Mwinyimkuu amemkabidhi Dkt. Yonazi tuzo ya uongozi bora katika kuendeleza ufuatiliaji, tathmini na ujifunzaji nchini Tanzania.

Tuzo hiyo ilitolewa wakati wa Kongamano la Tano la Wiki ya Ufuatiliaji, Tathmini na Kujifunza (MEL) 2026, lililofanyika jijini Arusha.


Tuzo hizo ni sehemu ya utambuzi wa mchango wa Tanzania na uongozi katika kuimarisha mifumo ya ufuatiliaji, tathmini na ujifunzaji, ambayo ni muhimu katika kupima matokeo ya utekelezaji wa mipango ya Serikali, kubaini changamoto na kuweka mikakati ya kuboresha utoaji wa huduma kwa wananchi.



soma zaidi »

on November 02, 2026

 


Naibu Waziri wa Elimu, Sayansi na Teknolojia, Mhe. Wanu Hafidh Ameir, amesisitiza kuwa mchakato wa kutoa ufadhili kupitia Samia Scholarship unapaswa kuwa huru na usio na upendeleo wowote, huku akiwataka wadau kuzungumza suala hilo kwa umakini ili kuepuka tafsiri potofu.

Wanu aliyasema hayo mbele ya Kamati ya Kudumu ya Bunge ya Elimu, Utamaduni na Michezo wakati wa ziara ya kamati hiyo katika Taasisi ya Afrika ya Sayansi na Teknolojia ya Nelson Mandela (NM-AIST). Alisema ni muhimu kuhakikisha haki inatendeka na nafasi zinawafikia wale wanaostahili kwa vigezo vilivyowekwa.

"Ninaomba sana suala hili mlizungumzie kwa namna ambayo halitaleta tafsiri ya upendeleo. Tuhakikishe kuwa hakuna upendeleo katika mchakato huu wa Samia Scholarship, bali wanaopata nafasi ni wale wanaostahili," alisema.

Kuhusu wanafunzi wanaonufaika na programu hiyo, Naibu Waziri alisema ni vijana wanaojitambua na wenye uwezo mkubwa, hivyo hapaswi kudharauliwa. Alieleza kuwa alipata fursa ya kuzungumza nao wakati wa boot camp alipokuja kwa ajili ya uhakiki wa taarifa na kubaini kuwa ni vijana wenye uelewa mpana wa mazingira yao.

"Kwa hiyo, ninawaomba mnapokuwa nao msidharau uwezo wao. Wapewe nafasi ya kuishi na kujifunza kutokana na malezi na maelekezo mnayowapa, lakini pia waaminiwe. Ni vizuri pia kuwapa nafasi ya kuzungumza kwa Kiingereza ili kuimarisha uwezo wao wa kuwasiliana na kuwajengea Ujasiri"Alisisitiza Naibu Waziri 

Alisema Rais Samia Suluhu Hassan ana imani kubwa na timu inayotekeleza programu hiyo, na mara nyingi amekuwa akisisitiza kwa Waziri wa Elimu kuwa ni jukumu la pamoja kuhakikisha ndoto hiyo inatimia. "Mheshimiwa Rais amekuwa akimwambia Mheshimiwa Waziri, 'Tupambane, hili ni jukumu langu na lako'. Nimepokea pongezi kwa niaba ya Mheshimiwa Rais na Mheshimiwa Waziri," alisema huku akiwapongeza watendaji wote na kumshukuru Mwenyekiti wa Kamati kwa usimamizi mzuri wa mipango na shughuli za kamati.

Nae Kaimu Mwenyekiti wa Kamati hiyo, ambaye ni Mbunge wa Kyela, Mhe. Baraka Mwambengo,mara baada ya  wa ziara ya kamati katika Taasisi ya Sayansi na Teknolojia ya Nelson Mandela (NM-AIST), alisema kamati imeshuhudia uwekezaji mkubwa unaofanyika katika sayansi na teknolojia kupitia ufadhili huo, ambao ni matunda ya maono ya Rais Samia.

 Mwambengo aliwaasa wanafunzi watakaokwenda kusoma nje ya nchi kupitia ufadhili huo kutanguliza uzalendo, maadili na utamaduni wa Kitanzania.

“Mnapokwenda nje mtakutana na mambo mengi tofauti na maadili yetu. Jitambueni,kumbukeni mmetumwa na kijiji kikubwa zaidi, ambacho ni Taifa la Tanzania, Nendeni mkaiwakilishe nchi vizuri,” alisisitiza.

Mwambengo alibainisha kuwa licha ya uwekezaji mkubwa wa vifaa na teknolojia za kisasa chuoni hapo, baadhi yake bado havijaanza kutumika kibiashara.

“Hatutaki kuona chuo hiki kinabaki kuwa sehemu ya kufundishia na kufanya tafiti pekee bali tunataka kiwe kitovu cha kuzalisha bunifu na suluhisho zinazotumika kiuchumi. Teknolojia hizo zipelekwe sokoni wananchi wanufaike,” alisema.

Kamati pia ilipongeza wanafunzi wa Shahada ya Uzamili wanaofanya tafiti za Akili Unde (Artificial Intelligence - AI), na kuishauri Serikali kuendelea kuwekeza katika eneo hilo ili wataalamu wa Kitanzania wasiachwe nyuma na kasi ya dunia.

Kwa upande wake, Makamu Mkuu wa Taasisi ya Afrika ya Sayansi na Teknolojia ya Nelson Mandela, Profesa Maulilio Kipanyula alisema kuwa Programu ya Samia Scholarship Extended katika Sayansi ya Data, Akili Unde na Sayansi Shirikishi (SSE DS/AI+) ina lengo kuu la kujenga uwezo wa nchi katika masuala ya Sayansi ya Data, Akili Unde na Sayansi Shirikishi ili kuimarisha matumizi ya teknolojia za kidijitali kwa kuzalisha rasilimali watu mahiri.

Aidha alisema kuwa malengo mahususi pia ni kuwaandaa wahitimu wa Kidato cha Sita wenye ufaulu wa juu kitaaluma, kiteknolojia na kiuongozi kupitia kambi ya mafunzo ya miezi kumi, ikiwemo maandalizi ya mitihani ya kimataifa ya lugha na ya Hisabati, kuwezesha maombi maalum ya kujiunga na vyuo vya nje ya nchi.

"Programu hii inakabiliwa na changamoto ya gharama kubwa za masomo nje ya nchi na upatikanaji wa ufadhili, ambapo Wizara imeweka kipaumbele kwa nafasi zenye ufadhili kamili na punguzo kubwa la ada, huku ikiendelea kufuatilia ufadhili wa asilimia 100 kupitia wadau wa elimu," alisisitiza Profesa Kipanyula.









soma zaidi »

on November 01, 2026


NA Mwandishi wetu Arusha ARUSHA

Taasisi ya Moyo Jakaya Kikwete (JKCI) kwa kushirikiana na Global Medicare inaendelea kuimarisha Hospitali ya JKCI-ALMC (Selian ya Mjini) Arusha kupitia uwekezaji wa miundombinu, teknolojia na vifaa tiba vya kisasa, ikiwa ni sehemu ya maandalizi ya huduma za afya kuelekea mashindano ya AFCON 2027 na kuboresha huduma za kudumu kwa wananchi wa Kanda ya Kaskazini.
soma zaidi »

on November 01, 2026

 




Asema amekuta msingi imara wa chama, ataja mafanikio ya Samia, Bandari ya Tanga yazidi kufungua uchumi

Na Oscar Assenga, TANGA

Katibu wa Halmashauri Kuu ya Taifa ya CCM, Idara ya Mambo ya Siasa na Uhusiano wa Kimataifa (SUKI), Rabia Abdalla Hamid amesema amepokea jukumu la kulea mkoa huo kwa furaha kubwa, akieleza kuwa amekuta mazingira mazuri ya kisiasa yaliyowekwa na viongozi waliomtangulia.

Amesema kabla ya kuwasili Tanga, alifahamu kuwa hatakuwa na kazi kubwa ya kuimarisha chama kutokana na misingi imara iliyojengwa na Mwenyekiti wa CCM Mkoa Rajab Abdurhaman pamoja na mlezi aliyekuwepo awali.

Rabia ambaye pia ni Mlezi Mpya wa chama hicho Mkoa wa Tanga aliyasema hayo leo wakati akizungumza na viongozi na wanachama wa CCM mkoani humo mara baada ya kupokelewa rasmi ambapo amefika Tanga kwa kazi maalumu aliyopewa na Makao Makuu ya chama, ikiwamo kuhakikisha viongozi na wananchi wanatambua nafasi ya CCM katika kusimamia maendeleo ya mkoa na taifa kwa ujumla.

Alisema alitumia uzoefu alioupata wakati akiulea Mkoa wa Kilimanjaro kwa miaka mitatu, akibainisha kuwa Tanga imekuwa na mazingira tofauti ya kisiasa na kijamii yaliyompa furaha kubwa katika utekelezaji wa majukumu yake.

Alieleza kuwa jukumu lake kubwa ni kuhakikisha chama kinaendelea kuwa karibu na wananchi na kusimamia utekelezaji wa majukumu yake kwa kuzingatia misingi na maadili ya CCM.

Katika hatua nyingine, Rabia aliwataka viongozi wa chama na Serikali kuelewa kuwa utendaji wao haupimwi kwa maneno mengi, bali kwa matokeo ya kazi wanazozifanya.

Alisema CCM ni chama kinachopaswa kuwa kazini saa 24, huku akisisitiza kuwa ni sikivu, mwadilifu na kinachozingatia utu katika kuwahudumia wananchi.

Aliongeza kuwa kaulimbiu ya chama ya mwaka huu, Kazi na Utu Tunasonga Mbele, inaakisi dhamira ya kuendeleza huduma na maendeleo kwa Watanzania.

Akizungumzia uongozi wa Rais Samia Suluhu Hassan, alisema moja ya sifa kubwa zinazomtambulisha ni utu, akieleza kuwa falsafa hiyo inaonekana katika matendo na utekelezaji wa miradi ya maendeleo inayofanyika maeneo mbalimbali nchini.

Alisema tangu nchi ipate uhuru, viongozi waliotokana na CCM wamekuwa wakichangia maendeleo ya taifa kulingana na uwezo na mazingira ya vipindi vyao vya uongozi.

Rabia alisisitiza kuwa maendeleo hayapaswi kubagua maeneo, akieleza kuwa serikali imeendelea kusambaza miradi katika mikoa na kata mbalimbali nchini.

Aidha, alizungumzia umuhimu wa kulinda amani na mshikamano wa kitaifa, akiwataka Watanzania kutofautisha ushindani wa kisiasa na masuala yanayohusu masilahi mapana ya nchi.

Alisema wananchi wanaweza kuwa na mitazamo tofauti ya kisiasa, lakini hawapaswi kuruhusu tofauti hizo kuathiri umoja na usalama wa taifa.

Katika kuelezea hali ya uhusiano wa Tanzania na mataifa mengine, Rabia alisema baadhi ya changamoto zilizokuwepo katika mahusiano ya kimataifa zimeendelea kushughulikiwa, huku akisisitiza kuwa Tanzania inaendelea kuwa nchi yenye amani na usalama.

Alitumia nafasi hiyo kuwataka wananchi kuendelea kuilinda nchi na kutanguliza masilahi ya taifa badala ya misimamo ya kisiasa.


RAJAB: TANGA NI NGOME IMARA YA CCM

Awali, Mwenyekiti wa CCM Mkoa wa Tanga, Rajab Abdurahman, alisema mkoa huo umeendelea kuwa ngome ya chama hicho, akieleza kuwa kipaumbele cha sasa ni kuimarisha umoja na kusimamia maendeleo ya wananchi.

Alisema kazi kubwa iliyopo mbele yao si kujikita katika malumbano ya kisiasa, bali kuhakikisha Tanga inasonga mbele kiuchumi na kijamii.

Hata hivyo, akizungumzia kauli za wapinzani kuhusu mipango yao ya kufanya shughuli za kisiasa mkoani humo, Rajab alisema CCM iko tayari kuendelea kuimarisha chama chake na kuonyesha mafanikio ya utekelezaji wa shughuli za maendeleo.

Alisema wananchi wa Tanga wana nafasi ya kujionea mabadiliko yanayotokana na miradi inayotekelezwa na Serikali ya Awamu ya Sita chini ya Rais Samia Suluhu Hassan.

Akitoa mfano wa mafanikio hayo, alitaja uwekezaji wa Sh bilioni 429.1 katika Bandari ya Tanga, akisema umechangia kuboresha miundombinu ya bandari hiyo, ikiwamo kuongeza kina cha maji ili kuruhusu meli kubwa kutia nanga.

Alisema kwa muda mrefu wakazi wa Tanga walikuwa na kilio cha kuboreshwa kwa bandari hiyo ili kuongeza shughuli za kiuchumi na kufungua fursa za biashara.

Rajab alisema baada ya maboresho hayo, Bandari ya Tanga imeanza kuvutia meli kubwa ambazo awali zilikuwa zikielekezwa zaidi katika bandari nyingine, hatua aliyoeleza kuwa imeanza kuchochea shughuli za kiuchumi mkoani humo.

Aliongeza kuwa ongezeko la shughuli za kiuchumi limeambatana na ongezeko la magari na shughuli za usafirishaji, hali inayofanya baadhi ya wananchi kuanza kutoa malalamiko kuhusu udogo wa barabara ikilinganishwa na mahitaji ya sasa.

Alisema hali hiyo ni ishara ya kuongezeka kwa shughuli za kiuchumi na umuhimu wa kuendelea kuboresha miundombinu ili kwenda sambamba na kasi ya maendeleo ya mkoa.










soma zaidi »
Subscribe to: Posts (Atom)