Recent Post Recent Post
View More

on October 17, 2026
Na WyEST,Tianjin, China
Serikali ya Tanzania na Serikali ya Jamhuri ya Watu wa China zimesaini hati ya makubaliano ya kuimarisha Elimu na Mafunzo ya Ufundi na Ufundi Stadi (TVET), kwa lengo la kuboresha ubora wa mafunzo, kuimarisha ushirikiano na viwanda na kuongeza fursa za ajira kwa vijana.
Hati hiyo imesainiwa Oktoba 17, 2026, jijini Tianjin, na Naibu Waziri wa Elimu, Sayansi na Teknolojia, Mhe. Wanu Hafidh Ameir (Mb), kwa niaba ya Tanzania, na Naibu Waziri wa Elimu wa Serikali ya Jamhuri ya Watu wa China China, Mhe. Wang Guangyan.
Makubaliano hayo yanatoa kipaumbele katika kuanzisha Karakana (Luban Workshop], kituo cha mafunzo ya ufundi kinachotumia teknolojia za kisasa pamoja na kuimarisha programu za uhandisi wa ujenzi, upimaji na uchoraji ramani, reli, barabara na madaraja. China pia imeahidi kutoa msaada wa kitaalamu kupitia mafunzo kwa walimu, uendelezaji wa mitaala ya Elimu ya Ufundi na Mafunzo ya Ufundi Stadi, ubadilishanaji wa wataalamu na matumizi ya mbinu za kisasa za ufundishaji.
Aidha, makampuni ya Kichina nchini Tanzania, hususan katika Sino–Tan Industrial Park na sekta za reli, nishati, madini na ujenzi, yamehimizwa kutoa nafasi za mafunzo kwa vitendo kwa wanafunzi,  Serikali ya Tanzania itateua taasisi zitakazotekeleza  makubaliano hayo na kuhakikisha programu zinaendana na Mfumo wa Kitaifa wa Sifa na Tuzo  (TQF), ili kuimarisha ubora na uendelevu wa mafunzo.
Mbali na makubaliano hayo, Tanzania imenufaika na ushiriki wake katika Mkutano wa Kimataifa wa Maendeleo ya Elimu ya Ufundi na Mafunzo ya Ufundi Stadi kwa kupata fursa ya kubadilishana uzoefu na nchi nyingine kuhusu uboreshaji wa mitaala, viwango vya mafunzo na uhusiano kati ya elimu na mahitaji ya soko la ajira.
Katika mkutano huo, Tanzania imeunga mkono Kiunzi cha Kimataifa cha Viwango vya Elimu ya Ufundi na Ufundi Stadi (Framework of World Vocational and Technical Education Standards), kinachotoa rejea ya hiari ya kulinganisha viwango huku kikiheshimu mifumo ya elimu ya kila nchi. Akizungumza kuhusu mfumo huo, Mhe. Ameir alisema unaendana na mageuzi ya elimu nchini yanayotekelezwa kupitia Sera ya Elimu na Mafunzo ya Mwaka 2014, Toleo la 2023, linalolenga kujenga mfumo wa elimu unaozingatia ujuzi na umahiri.
Tanzania pia imependekeza vipaumbele vinne vya utekelezaji wa kiunzi hicho, ambavyo ni utambuzi wa pamoja wa sifa, upatikanaji wa ufadhili na vifaa vya kisasa, ubadilishanaji wa walimu na mafunzo, pamoja na tathmini ya hiari kwa ajili ya kujifunza kwa pamoja. Hatua hiyo inaipa nchi nafasi ya kushiriki katika majadiliano ya kimataifa kuhusu viwango vya mafunzo na kuimarisha ushirikiano wa kitaalamu, ikiwemo na China.
Akizungumza katika kikao maalumu cha majadiliano Oktoba 16, 2026, Mhe. Ameir amesema elimu ya ufundi ni nyenzo muhimu ya kuunganisha nguvu kazi ya vijana wa Afrika na maendeleo endelevu ya kiuchumi. Alisisitiza umuhimu wa kuwaandaa vijana wenye ujuzi wa vitendo, ubunifu na uwezo wa kutatua changamoto katika sekta za reli, nishati, madini, kilimo, gesi na viwanda.
Ushiriki huo na makubaliano yaliyosainiwa yanatarajiwa kusaidia Tanzania kuboresha mafunzo ya ufundi, kuongeza uwezo wa wakufunzi na fursa za mafunzo kwa vitendo. Hatua hizo zinalenga kuandaa vijana wenye ujuzi unaohitajika katika soko la ajira, kuwawezesha kujiajiri na kuchochea ubunifu kwa ajili ya maendeleo ya taifa.
soma zaidi »

on October 17, 2026

 

DAR ES SALAAM

KAMPUNI ya Mkuyu Africa imewataka madalali wa nyumba na ardhi nchini kuzingatia maadili ya kazi, kujiendeleza kitaaluma na kujiunga na mifumo rasmi ya usajili ili kujenga uaminifu kwa wateja na kurejesha heshima ya taaluma hiyo.

Wito huo umetolewa na Mkurugenzi wa Mkuyu Africa, Juneid Othman, wakati wa mkutano uliowakutanisha madalali na wadau wa sekta hiyo kujadili changamoto zinazowakabili pamoja na umuhimu wa kuanzisha mfumo rasmi wa kuwatambua na kuwasimamia.

Juneid alisema sekta ya nyumba, ardhi na ujenzi ina mchango mkubwa katika maisha ya wananchi, hivyo inahitaji watu wenye uaminifu, weledi na uwajibikaji ili kulinda maslahi ya wateja na kuimarisha imani ya umma.

Alisema licha ya kuwepo kwa madalali wengi wanaofanya kazi kwa uaminifu, baadhi ya watu wamekuwa wakijihusisha na shughuli za udalali bila utambulisho rasmi wala mfumo wa kuwawajibisha wanapokiuka maadili, hali inayochangia malalamiko na kuharibu taswira ya taaluma hiyo.

“Tatizo linapotokea kwa mtu mmoja, wakati mwingine jamii inawaona madalali wote kama vishoka. Hali hii inawanyima heshima wale wanaofanya kazi kwa uaminifu na weledi,” alisema Juneid.

Alisisitiza umuhimu wa kuanzishwa kwa Bodi ya Madalali itakayoweka viwango vya kitaaluma, kusimamia maadili na kusaidia kutambua madalali wanaofanya kazi kihalali ndani na nje ya nchi.

Alisema mfumo huo utasaidia pia kuwalinda wateja dhidi ya utapeli na migogoro inayoweza kujitokeza wakati wa kununua, kuuza au kupanga nyumba na ardhi.

“Tunapokwenda kwa daktari, wakili au mkandarasi, kuna mifumo inayotuwezesha kutambua na kufuatilia wataalamu hao. Madalali nao wanahitaji mfumo utakaowatambua na kuwaweka katika viwango vinavyokubalika,” alisema.

Kwa upande wake, Mwenyekiti wa chama cha madalali nchini, Emmanuel Machibya, alisema kuanzishwa kwa bodi hiyo kutasaidia kuwaunganisha madalali na kuweka msingi wa kutambuliwa kisheria.

Alisema wazo la kuanzisha bodi hiyo limepata uungwaji mkono kutoka kwa viongozi na wadau mbalimbali baada ya Mkuyu Africa, kupitia jukwaa la Miliki Mali, kuibua umuhimu wa kuwa na chombo kitakachosimamia taaluma hiyo.

Machibya alisema bodi hiyo inatarajiwa kusaidia kulinda haki na maslahi ya wateja pamoja na wanunuzi, huku ikiwapa madalali mfumo wa kufanya kazi kwa uwazi na uwajibikaji.

Naye Makamu Mwenyekiti wa chama hicho, Leonida Sudi Ibrahim, aliiomba Serikali kuweka utaratibu wa kuwatambua na kuwarasimisha madalali ili waweze kufanya kazi katika mfumo unaotambulika kisheria.

Alisema chama hicho kimejipanga kutoa elimu na mafunzo kwa madalali katika maeneo mbalimbali nchini, kwa msisitizo maalumu kwa wanawake, ili kuwajengea uwezo, kujiamini na kuzingatia misingi ya taaluma.

Ibrahim alisema kupitia mwamvuli wa TBAB, wanatarajia kuanzisha mfumo maalumu wa utambulisho wa madalali na kuendesha mafunzo yatakayowasaidia kuboresha utendaji wao na kuelewa wajibu wao kwa wateja.

Aliwataka madalali wanawake kutokata tamaa kutokana na changamoto wanazokutana nazo, akisema wana uwezo wa kushindana katika sekta hiyo iwapo watajiamini, kujitambua na kutumia fursa zilizopo.

Aliongeza kuwa umoja na urasimishaji wa shughuli zao unaweza kuwasaidia madalali kupata fursa za huduma za kifedha na mikopo kutoka taasisi husika, hatua itakayochangia kuimarisha biashara zao na kuwawezesha kujikwamua kiuchumi.




soma zaidi »

on October 17, 2026



Tuzo hizo kulenga kukuza usafirishaji, ugavi na uwekezaji


DAR ES SALAAM. Makamu wa Kwanza wa Rais wa Zanzibar, Othman Masoud Othman, anatarajiwa kuwa mgeni rasmi katika hafla ya utoaji wa tuzo za Supply Chain, Mobility & Logistics Awards (SML Awards 2026), zinazolenga kutambua ubunifu, ubora na mchango wa wadau katika sekta za ugavi, usafirishaji na lojistiki.

Hafla hiyo inatarajiwa kufanyika Oktoba 23, 2026, katika ukumbi wa Superdome, Masaki, jijini Dar es Salaam, ikitarajiwa kukutanisha viongozi wa serikali, wawekezaji na wadau wa sekta mbalimbali kutoka Tanzania Bara na Zanzibar.


Mkurugenzi wa SML, Amon John Mtonyi, amesema tuzo hizo zinalenga kutambua mchango wa wadau katika sekta za ugavi, usafirishaji na lojistiki, huku zikitoa fursa ya kuimarisha ubunifu, ushindani na uwekezaji katika sekta hizo.

Miongoni mwa viongozi wengine wanaotarajiwa kushiriki katika hafla hiyo ni Waziri wa Uchukuzi wa Tanzania, Profesa Makame Mbarawa; Waziri wa Uchukuzi na Ujenzi wa Zanzibar, Dkt. Khalid Salum Mohamed; Waziri wa Biashara wa Zanzibar, Omar Said Shaaban; pamoja na Waziri wa Utalii na Mambo ya Kale wa Zanzibar, Dkt. Nasra Nassor Omar.


Ushiriki wa viongozi hao unatarajiwa kutoa fursa ya kuimarisha ushirikiano kati ya serikali na sekta binafsi, hususan katika kuboresha mifumo ya usafirishaji, kuongeza ufanisi wa huduma za ugavi na kuvutia uwekezaji.

Kwa makampuni yanayojihusisha na usafirishaji, bandari, biashara, utalii na huduma za lojistiki, hafla hiyo inaweza kuwa jukwaa la kujenga mahusiano ya kibiashara, kutafuta masoko mapya na kuimarisha ushirikiano na wawekezaji pamoja na taasisi za umma.


Aidha, utambuzi wa makampuni yanayofanya vizuri unaweza kuchochea ubunifu, ushindani wenye tija na uboreshaji wa viwango vya huduma, hatua zinazoweza kuongeza ushindani wa biashara za Tanzania katika masoko ya ndani na nje ya nchi.

Kwa upande wa wananchi, maendeleo ya sekta za usafirishaji na ugavi yana umuhimu katika kurahisisha usafirishaji wa bidhaa, kuboresha upatikanaji wa huduma na kupanua fursa za ajira na biashara.


Hata hivyo, manufaa ya jukwaa hilo yatategemea namna mahusiano yatakayojengwa yatakavyogeuzwa kuwa uwekezaji, miradi na maboresho yenye matokeo yanayopimika kwa wafanyabiashara na wananchi.

SML Awards 2026 inalenga kuwa zaidi ya hafla ya utoaji wa tuzo kwa kuwaunganisha wadau muhimu na kutambua mchango wao katika sekta zinazosaidia kurahisisha biashara, kuunganisha masoko na kuchochea ukuaji wa uchumi.

Wadau wanaotaka kushiriki katika hafla hiyo wanaweza kupata tiketi kupitia tovuti rasmi ya tuzo hizo: https://smlaward.com/ticket/
soma zaidi »

on October 17, 2026


Na, Mwandishi wetu Pretoria - Afrika Kusini.

WAZIRI wa Nchi, Ofisi ya Waziri Mkuu (Sera, Bunge, Uratibu na Wenye Ulemavu), Profesa Palamagamba Kabudi, ameongoza ujumbe wa Tanzania katika Mkutano wa Mawaziri wa Ushirikiano wa Nchi Tatu za Tanzania, Msumbiji na Afrika Kusini, unaolenga kuimarisha mapambano dhidi ya uhalifu unaovuka mipaka.

Mkutano huo umefanyika , Oktoba 15, 2026, jijini Pretoria, Afrika Kusini, ukitanguliwa na kikao cha viongozi waandamizi kilichofanyika Oktoba 14, mwaka huu.

Akizungumza katika mkutano huo, Profesa Kabudi amezitaka nchi hizo kuimarisha ushirikiano kwa kubadilishana taarifa za kiintelijensia ili kuwabaini wahalifu, kuvunja mitandao yao na kuimarisha ulinzi na usalama wa mipaka.

“Lengo la mkutano huo lilikuwa kujadili mikakati ya kuimarisha ushirikiano wa nchi hizo katika kudhibiti usafirishaji haramu wa dawa za kulevya katika ukanda wa Bahari ya Hindi, pamoja na uhalifu mwingine unaojumuisha usafirishaji haramu wa binadamu, utekaji nyara na uhalifu wa kuvuka mipaka”amesema Profesa Kabudi

Amesema  kuwa ushirikiano wa karibu kati ya vyombo vya usalama ni muhimu katika kudhibiti vitendo vya uhalifu vinavyotumia mianya ya mipaka na udhaifu wa mifumo ya udhibiti kutekeleza shughuli haramu.

Katika hatua nyingine, Profesa Kabudi amewakaribisha rasmi wanachama wa TPC nchini Tanzania, ambayo kwa kushirikiana na Kenya na Uganda inatarajiwa kuwa mwenyeji wa mashindano ya Kombe la Mataifa ya Afrika (AFCON) yatakayofanyika Juni na Julai 2027.

Alisisitiza nchi hizo kutumia fursa ya mashindano hayo kuimarisha mikakati ya kupambana na dawa za kulevya na uhalifu mwingine, akieleza kuwa matukio makubwa ya kimataifa yanaweza kutumiwa na wahalifu kutekeleza shughuli zao haramu.

Aidha, mkutano huo uliridhia maombi ya Angola na Uganda kujiunga na TPC, ambayo makao makuu yake yako nchini Msumbiji.

Kwa hatua hiyo, umoja huo sasa unaundwa na nchi tano ambazo ni Afrika Kusini, Angola, Msumbiji, Tanzania na Uganda, hatua inayotarajiwa kuimarisha ushirikiano wa kikanda katika kukabiliana na uhalifu unaovuka mipaka.

Mkutano huo uliwakutanisha pia viongozi waandamizi kutoka mamlaka za kudhibiti dawa za kulevya, vyombo vya polisi na wadau wa maendeleo, wakiwemo Ofisi ya Umoja wa Mataifa inayohusika na Dawa za Kulevya na Uhalifu (UNODC) na Umoja wa Ulaya.

Washiriki kutoka Angola, Uganda, Comoro, Shelisheli, Eswatini, Uingereza na Marekani pia walishiriki majadiliano kuhusu namna bora ya kukabiliana na changamoto za uhalifu, kubadilishana uzoefu na kuimarisha ushirikiano wa kikanda.

soma zaidi »

on October 17, 2026

 

Mm
Na Mwandishi Wetu

HALMASHAURI ya Wilaya ya Muheza mkoani Tanga imewataka wawekezaji kutumia fursa zilizopo katika sekta ya kilimo kwa kuwekeza katika uzalishaji wa mazao ya kisasa na viwanda vya kuchakata bidhaa za kilimo ili kuongeza thamani na kipato cha wakulima.

Wito huo umetolewa kufuatia ushindi wa kitaifa uliotwaa na halmashauri hiyo katika Maonyesho ya Wiki ya Chakula na Lishe Duniani yaliyofanyika katika Viwanja vya Usagara, jijini Tanga, ambapo ilionesha uwezo wake katika uzalishaji wa mazao na mnyororo wa thamani kuanzia shambani hadi sokoni.

Mkurugenzi Mtendaji wa Halmashauri ya Wilaya ya Muheza, Naima Chondo, amesema ushindi huo umetokana na maandalizi mazuri na juhudi za kuwawezesha wakulima wadogo kushiriki maonyesho hayo, kujifunza teknolojia mpya za kilimo na kupata fursa ya kuonesha ubora wa mazao yao.
Amesema Muheza ina ardhi yenye rutuba inayofaa kwa uzalishaji wa mazao mbalimbali, hivyo kuifanya wilaya hiyo kuwa na fursa za uwekezaji katika kilimo na biashara. Ameongeza kuwa ushiriki wa wakulima katika maonyesho hayo umewapa nafasi ya kujifunza mbinu zinazoweza kuongeza tija na thamani ya bidhaa zao.

Kwa upande wake, Mkuu wa Wilaya ya Muheza, Ayubu Sebabili, amesema wilaya hiyo imetenga maeneo kwa ajili ya kilimo cha kisasa na ujenzi wa viwanda vya kuchakata mazao ili kuongeza thamani ya bidhaa na kupanua fursa za ajira na biashara.

Amezitaja baadhi ya fursa zilizopo kuwa ni kilimo cha mahindi, ndizi na mazao ya viungo kama karafuu, iliki na mdalasini, ambayo yanaweza kunufaisha wakulima na wafanyabiashara kupitia masoko ya ndani na nje ya nchi.
Sebabili amesema wilaya hiyo inapanga kufanya kongamano la wadau wa kilimo litakalowakutanisha wakulima, wafanyabiashara, taasisi za fedha na wawekezaji ili kuweka mikakati ya pamoja kuelekea msimu ujao wa kilimo.

Naye Mkuu wa Mkoa wa Tanga, Dkt. Batilda Buriani, amesema mkoa huo una fursa za kiuchumi zinazohusishwa na upanuzi wa Bandari ya Tanga, Bomba la Mafuta na uwekezaji katika kilimo na viwanda. Amewahimiza wawekezaji kutumia fursa hizo kuongeza uzalishaji wa chakula na kukuza uchumi.

Dkt. Buriani ametoa shukrani kwa Wizara ya Kilimo, Wizara ya Mifugo na Uvuvi, Shirika la Chakula Duniani (WFP) na wadau wengine walioshiriki maonyesho hayo yenye kaulimbiu isemayo “Ubunifu wa Leo, Lishe Bora ya Kesho, Kuelekea Dira 2050.”
soma zaidi »

on October 17, 2026
Chuo cha Elimu ya Biashara (CBE) kinatarajia kufanya Kongamano la Saba la Biashara na Maendeleo ya Uchumi jijini Mwanza, likilenga kujadili fursa za biashara, ubunifu, teknolojia na mikakati ya kukuza uchumi, huku likitarajiwa kushirikisha wadau takribani 300 kutoka ndani na nje ya Tanzania.
soma zaidi »

on October 16, 2026

 



Na Mwandishi Wetu - Simanjiro

Mwenyekiti wa Halmashauri ya Wilaya ya Simanjiro Mhe. Kaleya Melita Mollel ameitaka Kamati za Usimamizi wa Maafa wa Halmashauri hiyo kutekeleza yale yaliyomo kwenye Mpango wa Kujiandaa na kukabiliana na Maafa wa Halmashauri ya Simanjiro ili kuimarisha usimamizi wa maafa katika Wilaya hiyo.

Mhe. Mollel ameyasema hayo leo Oktoba 16, 2026 katika ukumbi wa mikutano wa halmashauri ya wilaya hiyo wakati akizindua Mpango wa Kujiandaa na Kukabiliana na Maafa wa Wilayani ukiwa na lengo la kutoa miongozo na taratibu za kujiandaa na kukabiliana na maafa katika halmashauri ya wilaya na hasa katika kipindi hiki cha mvua za msimu.

“Nitoe wito nendeni mkatekeleze yaliyomo kwenye mpango huu, mpango huu usibaki kwenye makaratasi kwani ni nyezo muhimu ya usimamizi wa maafa katika halmashauri yetu” amesisitiza Mhe. Mollel.

Kwa upande wake, Mkurugenzi Msaidizi Ofisi ya Waziri Mkuu Sera, Bunge, Uratibu na Wenye Ulemavu, Kanali Selestine Masalamado amesema kuwa, mpango huo umeandaliwa kwa kuzingatia matokeo ya tathmini ya vihatarishi na uwezo wa wilaya wa kukabiliana na maafa, pamoja na historia ya matukio ya maafa yaliyoikumba Wilaya ya Simanjiro.

“Mpango huu ni matokeo ya mchakato shirikishi uliohusisha taasisi na wadau mbalimbali wa usimamizi wa maafa katika ngazi ya wilaya hivyo tunatarajia mpango huu utawezesha masuala mbalimbali ikiwemo uratibu wa shughuli za usimamizi wa maafa katika hatua zote za usimamizi wa maafa (Kuzuia, Kujiandaa, Kukabili na Kurejesha hali)” amefafanua Kanali Masalamado.

Aidha, ameongeza kuwa, maandalizi ya mpango huo ni hatua muhimu katika kuimarisha utekelezaji wa Sera ya Usimamizi wa Maafa ya Mwaka 2004 (Toleo la Mwaka 2025) pamoja na Sheria ya Usimamizi wa Maafa Na. 6 ya Mwaka 2022, kwa kuweka mikakati madhubuti ya kujiandaa na kukabiliana na maafa.

“Ofisi ya Waziri Mkuu, kupitia Idara ya Usimamizi wa Maafa, itaendelea kushirikiana nanyi, Wilaya ya Simanjiro katika shughuli za usimamizi wa maafa kwani usimamizi madhubuti wa maafa ni jukumu letu sote, kila mmoja ashiriki sasa na achukue hatua katika eneo lake, ili kulinda maisha na mali” ameongeza Kanali Masalamado.

Tathmini ya vihatarishi, uwezekano wa kutokea na uwezo wa kukabili maafa iliyofanyika katika Halmashauri ya Wilaya ya Simanjiro inaonesha kuwa, halmashauri hiyo inakabiliwa na majanga ya ukame, mafuriko, Migongano kati ya Wanyamapori na binadamu, moto magonjwa ya milipuko (binadamu, mifugo na wanyamapori) upepo mkali pamoja na mimea vamizi.


soma zaidi »

on October 16, 2026

 

Mwenyekiti wa Kamati ya Bunge ya Ustawi na Maendeleo ya Jamii, Mhe. Hawa Mchafu, akizungumza wakati kamati yake ilipokutana na Ofisi ya Waziri Mkuu-Kazi Ajira na Mahusiano na Mfuko wa PSSSF, jijini Dodoma

Waziri wa Nchi, Ofisi ya Waziri Mkuu - Kazi, Ajira na Mahusiano Mhe. Deus Sangu akizungumza katika kikao cha Kamati ya Kudumu ya Bunge ya Ustawi na Maendeleo ya Jamii leo tarehe 16/10/2026 Bungeni, Dodoma

Mkurugenzi Mkuu wa PSSSF, Fortunatus Magambo akizungumza mbele ya Kamati ya Kudumu ya Bunge ya Ustawi na Maendeleo ya Jamii leo Bungeni, jijini Dodoma

Mhe. Kangi Lugola, Mb akichangia hoja wakati wa kikao cha Kamati ya Kudumu ya Bunge ya Ustawi na Maendeleo ya Jamii, leo tarehe 16/10/2026

✅ Yasema PSSSF imekuwa faraja kwa Wafanyakazi


Na, Mwandishi wetu - Dodoma

Mwenyekiti wa Kamati ya Kudumu ya Bunge ya Ustawi na Maendeleo ya Jamii, Mhe. Hawa Mchafu, amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa uamuzi wa kulipa madeni ya mifuko ya hifadhi ya jamii ikiwemo PSSSF, hatua iliyosaidia kuimarisha mifuko hiyo na ustawi wa wastaafu nchini.

Mhe. Mchafu ametoa pongezi hizo leo Oktoba 16, 2026 jijini Dodoma wakati kamati hiyo ikipokea taarifa kuhusu mwenendo wa Mfuko wa Hifadhi ya Jamii kwa Watumishi wa Umma (PSSSF) katika kufuatilia michango ya watumishi wa Umma, mafanikio, changamoto na hatua za utatuzi. 

Mhe. Mchafu amesema kulipwa kwa deni hilo imewezesha kuongeza kasi ya ulipaji mafao kwa wastaafu. Vilevile, amempongeza Waziri wa Nchi, Ofisi ya Waziri Mkuu – Kazi, Ajira na Mahusiano, Mhe. Deus Sangu, kwa usimamizi wa mifuko ya hifadhi ya jamii ambayo ni mhimili muhimu wa ustawi wa wananchi nchini.

Kwa upande wake, Mhe. Sangu amesema Serikali imelipa kiasi cha shilingi trilioni 2.09 kupitia Hati Fungani ikiwa ni kwa ajili ya michango ya wanachama ambayo haikuwasilishwa katika mfuko kwa kipindi cha utumishi kabla ya mwaka 1999.

Aidha, amesema kuanzia Julai hadi Septemba 2026, Mfuko wa Hifadhi ya Jamii kwa Watumishi wa Umma (PSSSF) umekusanya kiasi cha shilingi bilioni 839.98, hali inayoonesha juhudi za kuimarisha ukusanyaji wa michango ya wanachama.

Kadhalika, amesema kuwa ongezeko la ufanisi katika ukusanyaji wa michango limechangiwa na matumizi ya mifumo bora ya Teknolojia ya Habari na Mawasiliano (TEHAMA), ikiwemo mfumo wa Billing Portal, unaorahisisha michakato ya utozaji na ufuatiliaji wa michango.

Naye, Mkurugenzi Mkuu wa PSSSF, Bw. Fortunatus Magambo, amesema Mfuko umeendelea kurahisisha upatikanaji wa huduma kwa wanachama wake kupitia mifumo ya kidijitali, inayolenga kuongeza ufanisi na kuboresha utoaji wa huduma.

Amesema, hatua hizo zinaonesha jitihada za Serikali na PSSSF katika kuimarisha usimamizi wa hifadhi ya jamii, kuboresha huduma kwa wanachama na kulinda maslahi ya wastaafu nchini.


MWISHO

soma zaidi »

on October 16, 2026



Naibu Waziri wa Nishati Mhe. Salome Makamba  amesema wananchi wanaoishi katika maeneo ya mijini yenye sura ya vijijini watanufaika na huduma ya umeme kwa gharama ya shilingi 27,000 kupitia Wakala wa Nishati Vijijini (REA), hatua inayolenga kuwawezesha wananchi wenye kipato cha chini kupata huduma hiyo kwa gharama nafuu.

Akizungumza leo Octoba 16, 2026  jijini Mbeya, wakati wa ziara ya Makamu wa Rais wa Jamhuri ya Muungano wa Tanzania Mhe. Deogratius Ndejembi, Mhe. Salome amesema Serikali imefanyia kazi maelekezo kuhusu utaratibu huo, ambapo maeneo husika tayari yametambuliwa na hatua za awali za manunuzi ya vifaa zinaendelea.

Amesema utaratibu huo unalenga kuhakikisha wananchi wanaoishi katika maeneo ambayo kisheria ni ya mijini lakini yana hali inayofanana na vijijini wanapata fursa ya kuunganishiwa umeme kwa gharama nafuu, kwa kuzingatia hali zao za kiuchumi.

Aidha, ameeleza kuwa kwa wananchi wa mijini ambao hawana uwezo wa kulipa gharama za kuunganishiwa umeme za shilingi 320,000 kwa mara moja, Wizara ya Nishati kupitia Shirika la Umeme Tanzania (TANESCO), kwa kushirikiana na Benki ya CRDB, imezindua mfumo unaomwezesha mteja kuunganishiwa umeme kwanza na kulipa gharama hizo kidogokidogo kulingana na matumizi yake ya umeme.

Mhe.Salome amesisitiza kuwa, hatua hizo ni sehemu ya jitihada za Serikali za kurahisisha upatikanaji wa huduma ya umeme kwa wananchi wa makundi mbalimbali, kwa lengo la kuongeza matumizi ya umeme na kuchochea shughuli za kiuchumi na maendeleo ya jamii nchini.












soma zaidi »
Subscribe to: Posts (Atom)