Na Shua Ndereka, Morogoro
Mkuu wa Mkoa wa Morogoro, Queen Sendiga, amemuagiza Mkuu wa Wilaya ya Morogoro, Mussa Kilakala, Shirika la Reli Tanzania (TRC) pamoja na wataalamu wa Manispaa ya Morogoro kukutana mara moja ili kutafuta suluhisho la mafuriko yanayowaathiri wakazi wa Kata za Lukobe na Kihonda.
Sendiga ametoa agizo hilo akiwa katika ziara yake ya kwanza mkoani Morogoro tangu aanze majukumu hayo, ambapo ametembelea na kukagua baadhi ya maeneo yanayokumbwa mara kwa mara na mafuriko.
Kwa mujibu wa taarifa hiyo, mafuriko hayo yanatokana na ujenzi wa tuta la reli ya SGR katika eneo la Kihonda Azimio.
Mkuu huyo wa Mkoa amesema Serikali kupitia wataalamu wake inaendelea kuchukua hatua mbalimbali kuhakikisha usalama wa wananchi, ikiwemo kuchimba mifereji itakayosaidia kupitisha maji na kupunguza athari za mafuriko.
Hatua hizo pia zinakuja wakati Mkoa ukijiandaa kukabiliana na athari zinazoweza kujitokeza kutokana na mvua za El Niño zinazotarajiwa kunyesha mwaka huu.
Sendiga amewataka wananchi kutojenga makazi katika maeneo ambayo ni njia za maji, huku akiwataka wale wanaoishi pembezoni mwa mito, kwenye mikondo ya maji na maeneo ya mabondeni kuondoka katika maeneo hayo kwa kuwa ni hatarishi.
Kwa upande wao, wakazi wa Kata ya Lukobe, akiwemo Anateti Mkola, wamepongeza ziara ya Mkuu wa Mkoa na kuiomba Serikali kuchukua hatua zaidi, ikiwemo kufukuliwa kwa Mto Ngerengere na kuondolewa matope ili maji yaweze kupita kwa urahisi.
Mkola amesema ziara hiyo imewapa matumaini kutokana na hatua zinazochukuliwa mapema na Serikali katika kukabiliana na changamoto zinazoweza kusababishwa na mvua za El Niño.
Kwa ujumla, hatua hizo zinaonyesha msisitizo wa Serikali mkoani Morogoro katika kushughulikia changamoto zinazogusa moja kwa moja usalama wa wananchi, matumizi ya ardhi, shughuli za uzalishaji pamoja na athari za mafuriko.
Post A Comment: