RAIS SAMIA AMETEKELEZA KAULI MBIU YA KAZI NA UTU KATIKA SHULE YA MLANDIZI

 

Naibu Waziri, Ofisi ya Waziri Mkuu Tawala za Mikoa na Serikali za Mitaa (OWM-TAMISEMI) Mhe. Reuben Kwagilwa amesema kitendo cha Mhe. Rais Dkt. Samia Suluhu Hassan kutoa fedha za ujenzi wa miundombinu ya Shule ya watoto wenye Mahitaji malumu ya Mlandizi, kinadhihirisha namna anavyoiishi kwa vitendo kauli mbiu yake ya KAZI NA UTU kwa kuwajali watoto wenye uhitaji maalum.

Mhe. Kwagilwa ameyasema hayo leo Novemba 29, 2025 katika ziara yake ya kikazi mkoani Pwani, iliyolenga kukagua utekelezaji wa miradi ya maendeleo ukiwepo mradi wa ujenzi wa miundombinu ya Shule ya watoto wenye Mahitaji malumu ya Mlandizi. 

Mhe. Kwagilwa amempongeza Mhe. Rais Dkt. Samia Suluhu Hassan kwa kuwakumbuka watoto wenye uhitaji maalum kwa kutoa milioni 506.5 za ujenzi wa miundombinu rafiki katika shule hiyo Maalum ya Mlandizi ambayo itawahudumia watoto wenye uhitaji maalum.

“Kitendo cha Mhe. Rais kutoa milioni 506.5 kwa ajili ya watoto wenye uhitaji maalum, kinaenzi kaulimbiu yake ya KAZI NA UTU ambayo alizunguka kuinadi nchi nzima,” Mhe. Kwagilwa amesisitiza.

Mhe. Kwagilwa amefafanua kuwa, fedha hizo zitawezesha kukamilisha ujenzi wa jengo la utawala, madarasa sita kwa ajili ya watoto wenye uhitaji maalum, madarasa mawili ya mfano, nyumba ya mwalimu na mabweni.

Aidha, Mhe. Kwagilwa amesema Ofisi ya Waziri Mkuu-TAMISEMI imejipanga kuwapokea watoto wote wanaotarajiwa kuanza masomo ya shule za awali na msingi mnamo mwezi Januari, hivyo amewataka wasimamizi wa mradi huo wa ujenzi wa shule maalum pamoja na miradi mingine ya shule inakamilika kwa wakati.

Kwa upande wake, Mkurugenzi Mtendaji wa Halmashauri ya Wilaya ya Kibaha Bi. Regina Bieda amesema, mradi unatarajiwa kukamilika Disemba 30, 2025 na mkandarasi ameahidi kukabidhi mradi huo Januari 5, 2025 hivyo watoto watakaopangwa katika shule hiyo watapokelewa na kuanza masomo.