Na Oscar Assenga,TANGA
Historia ya usafirishaji baharini imeendelea kuandikwa upya katika Bandari ya Tanga baada ya meli ya mizigo ya makontena, MV Pioneer yenye uzito wa tani 13,000 kutoka Iran, kutia nanga moja kwa moja bandarini hapo ikiwa ni mara ya kwanza kwa safari ya moja kwa moja kutoka Iran hadi Tanga.
Tukio hilo lilielezewa na Mkuu wa Mkoa wa Tanga, Balozi Dkt. Batilda Burian, kama hatua muhimu inayoweza kuongeza fursa za kiuchumi hasa kwa vijana na kuimarisha ushindani wa kanda.
Meli hiyo iliwasili ikiwa na makontena 463—ambapo 261 yameelekezwa Tanzania na 182 kwenda Malawi, Zambia, Uganda na nchi nyingine za SADC—yakibeba vifaa vya viwandani, malighafi ya uzalishaji na bidhaa za kiteknolojia. Ujio huo umewezeshwa na kampuni ya Seven Seas Shipping Agency, ambayo inaendesha safari za baharini kati ya Iran na Tanga.
Akizungumza wakati wa kuipokea meli hiyo iliyoongozwa na Nahodha Ahmadjoo, Dkt. Burian alisema ujio huo unafungua mwanya mpya kwa vijana wa Tanga kunufaika na teknolojia ndogo na za kisasa kutoka Iran.
“Iran ina teknolojia za kisasa katika uchakataji wa viungo, viwanda vidogo na bidhaa za dawa,” alisema. “Haya ni maeneo ambayo vijana wa Tanga wanaweza kuwekeza na kuzalisha bidhaa zitakazopata masoko. Meli hii si mizigo tu—ni fursa.”
Alisema Serikali ya Mkoa ipo katika mazungumzo na mamlaka za Iran kuanzisha ushirikiano kati ya miji na mikoa (Sister City na Sister Region) kwa lengo la kuharakisha uhamishaji teknolojia, mafunzo ya viwandani na upatikanaji wa masoko kwa wazalishaji wa ndani.
Pia alisema wafanyabiashara sasa wanaweza kuagiza bidhaa kutoka Iran na kuzipokea ndani ya siku nane. “Tunaweza kuifanya Tanga kuwa kitovu cha biashara ya jumla ya bidhaa kutoka Iran na kuongeza kipato chetu,” alisema.
Dkt. Burian alibainisha kuwa maendeleo makubwa ya Bandari ya Tanga—ambayo sasa inavutia meli kubwa za safari ndefu—ni matokeo ya uwekezaji wa Sh bilioni 429.1 uliofanywa na Serikali ya Rais Samia Suluhu Hassan katika maboresho na upanuzi wa bandari hiyo.
“Bandari hii inakua kwa sababu tumewekeza ipasavyo. Kuongezeka kwa meli kunamaanisha ajira, viwanda na fursa za kuuza bidhaa nje. Lakini yote haya yanahitaji amani,” alisema. “Bila amani, fursa tunazoshuhudia leo zisingekuwepo.”
Aliongeza kuwa mkoa wa Tanga una mazao mengi yakiwemo mkonge, kahawa, viungo na mazao ya baharini ambayo yanaweza kubadilisha maisha ya vijana kiuchumi.
Alisisitiza kuwa uvurugaji wa amani unaweza kuathiri si Tanzania pekee bali pia nchi zote zinazotegemea bandari za Tanzania kwa shughuli zao za kiuchumi.
Kwa upande wake, Meneja wa Uendeshaji wa Seven Seas Shipping Agency, Athumani Kimaro, alisema ujio wa MV Pioneer unaashiria mwanzo wa njia ya kudumu ya usafirishaji kati ya Iran na Tanga.
“Huu ni mwanzo wa hatua mpya ya biashara ya baharini,” alisema. “Kwa mara ya kwanza tunapokea safari za moja kwa moja kutoka bandari za Iran hadi Tanga. Tunatarajia meli tatu au nne kwa mwezi.”
Alisema tayari meli nyingine zimepangwa kuja, ambapo meli inayofuata inatarajiwa kuwasili Desemba 8, na nyingine Desemba 14. Safari kati ya Iran na Tanga huchukua siku 7–8 pekee, hivyo kuwa moja ya njia za haraka kwa wafanyabiashara wa Afrika Mashariki.
Dkt. Burian aliwataka wafanyabiashara na wazalishaji wa ndani kutumia fursa hiyo ipasavyo.
“Hii ni nafasi muhimu. Lazima kuhakikisha meli zinarejea kwa kujaza makontena ya kusafirisha bidhaa kwenda Iran—viungo, bidhaa za asili, mazao yaliyoongezwa thamani na mengine.”
Nahodha Ahmadjoo aliishukuru bandari ya Tanga kwa mapokezi mazuri na ufanisi, akisema ana matarajio ya kuifanya Tanga kuwa moja ya kituo cha mara kwa mara cha meli zao.
Mkuu wa Wilaya ya Tanga, Dadi Kolimba, aliwataka vijana kuchangamkia fursa zilizofunguliwa na safari hizo mpya.
“Uhusiano huu wa biashara ya baharini una maana kubwa kwetu kwa sababu makontena haya yatasafirishwa kwa njia ya barabara, jambo ambalo linatoa ajira kwa vijana,” alisema.
Post A Comment: