Dkt. Biteko Azindua Mfumo wa Gari la Mafunzo Kidijitali (DIGI-TRUCK)

 

Na Mwandishi Wetu, Dar es Salaam

Naibu Waziri Mkuu na Waziri wa Nishati, Mhe. Dkt. Doto Mashaka Biteko (Mb) amesema Serikali itafanya kila liwezekanalo ili kuboresha hali ya maisha ya wananchi kupitia Teknolojia ya Habari na Mawasiliano.

Mhe. Dkt. Biteko ametoa kauli hiyo leo tarehe 24 Agosti, 2024 jijini Dar es Salaam alipokuwa akihutubia wakati wa hafla ya uzinduzi wa gari la kutoa mafunzo kidijitali lililopewa jina la DIGI-TRUCK. 

Katika hotuba yake, Dkt. Biteko alitoa wito kwa Huawei Tanzania na Vodacom Tanzania kuhakikisha kuwa kampeni ya kutoa mafunzo kwa kutumia gari hili inatekelezwa kwa haraka na inafika maeneo yote, hasa vijijini ambapo watu wengi wako mbali na huduma za kidijitali. Alisema umuhimu wa kuwafikia watoto wa maeneo ya pembezoni ambao hawajawahi kuona kompyuta, akisisitiza kuwa kwa kuwapa fursa ya mafunzo mapema kutawapa hamasa katika kupenda masomo ya TEHAMA.

Amesema kuwa Serikali ya Awamu ya Sita chini ya uongozi wa Rais Mhe. Dkt. Samia Suluhu Hassan imeweka mkazo katika kubadilisha hali ya maisha kupitia matumizi ya TEHAMA. 

Kwa upande wake, Waziri wa Habari, Mawasiliano na Teknolojia ya Habari, Mhe. Jerry William Silaa (Mb), amesema kuwa mfumo huu unakubaliana na malengo ya Dira ya Maendeleo ya Tanzania 2025, ambayo inakusudia kuifanya Tanzania kuwa nchi yenye kipato cha kati na uchumi unaotegemea maarifa. Alisisitiza kuwa uzinduzi wa DigiTruck ni uthibitisho wa jinsi wadau wa sekta binafsi kama Huawei na Vodacom wanavyosaidia kuboresha mandhari ya kidijitali nchini.

Waziri Silaa alitoa pongezi kwa Huawei na Vodacom kwa mpango huu wa msingi, akisema kuwa DigiTruck ni zaidi ya darasa la kusafiri; ni chombo cha matumaini, fursa, na mabadiliko kwa Watanzania wengi. Alikiri kuwa juhudi za kueneza ujuzi wa kidijitali zitakuwa na athari za kudumu katika safari ya Tanzania kuelekea kuwa nchi ya kidijitali.

Mpango wa DigiTruck umedhaminiwa na Kampuni ya Huawei Tanzania na Vodacom Tanzania na umeanzishwa ili kufikisha mafunzo ya kidijitali kwa wananchi na unatarajiwa kuwa na mchango mkubwa katika kuimarisha ujuzi wa TEHAMA nchini.