Kikao kinaweka msingi wa kuimarisha elimu kuhusu bahari, uhifadhi wa mazingira na uchumi wa buluu
ZANZIBAR: Tume ya Taifa ya UNESCO inafanya mashauriano na Menejimenti ya Wizara ya Elimu na Mafunzo ya Amali Zanzibar kuhusu uanzishwaji wa Programu ya Shule za Bluu (Blue Schools Programme), inayolenga kuwajengea wanafunzi uelewa na maarifa kuhusu umuhimu wa bahari katika maisha ya binadamu, uhifadhi wa mazingira, mabadiliko ya tabianchi na fursa za uchumi wa buluu.
Kikao hiki kinaendelea Zanzibar, huku Tume ya Taifa ya UNESCO ikiwakilishwa na Naibu Katibu Mtendaji wa Tume, Dkt. Khamis Khalid Said. Majadiliano yanajikita katika kujenga uelewa wa pamoja kuhusu programu hiyo na kuweka msingi wa hatua zinazofuata kuelekea uanzishwaji wake Zanzibar.
Programu ya Shule za Bluu inalenga kukuza Elimu kuhusu Bahari (Ocean Literacy) kwa kuwawezesha wanafunzi kuelewa bahari, uhusiano wake na maisha ya binadamu na namna shughuli za binadamu zinavyoathiri mazingira ya baharini.
Kupitia mpango huo, shule zinapata fursa ya kuunganisha elimu ya bahari na mazingira, uendelevu na maisha ya jamii, huku wanafunzi wakijengewa uwezo wa kutambua thamani ya bahari na wajibu wao katika kuitunza.
Kwa Zanzibar, ambako bahari ni sehemu muhimu ya mazingira, maisha ya jamii na shughuli mbalimbali za kiuchumi, kuimarisha elimu kuhusu bahari katika shule kunatoa fursa ya kuwaandaa wanafunzi kuwa kizazi kinachotambua thamani ya rasilimali hizo na umuhimu wa kuzitumia kwa njia endelevu.
Elimu hiyo inagusa maeneo mbalimbali, yakiwemo uhifadhi wa mazingira ya baharini, mabadiliko ya tabianchi, uchafuzi wa bahari, matumizi endelevu ya rasilimali za bahari na fursa za uchumi wa buluu.
ELIMU YA BAHARI KUELEKEA TANZANIA YA 2050
Majadiliano kuhusu Shule za Bluu yanaendana na mwelekeo mpana wa Tanzania wa kuwekeza katika elimu, ujuzi, sayansi, teknolojia na ubunifu, pamoja na matumizi endelevu ya rasilimali kwa ajili ya maendeleo ya muda mrefu.
Dira ya Taifa ya Maendeleo 2050 inaweka mkazo katika kujenga rasilimali watu yenye maarifa na ujuzi, kukuza ubunifu na kuimarisha matumizi endelevu ya rasilimali za Taifa.
Katika muktadha huo, elimu kuhusu bahari inatoa fursa ya kuwaandaa wanafunzi mapema kuelewa fursa na changamoto zinazohusiana na bahari, ikiwemo nafasi ya uchumi wa buluu katika maendeleo ya Tanzania.
Kujenga uelewa huo shuleni kunaweza pia kusaidia kuandaa kizazi chenye uwezo wa kutumia maarifa, sayansi na ubunifu kutafuta suluhisho la changamoto za mazingira na mabadiliko ya tabianchi.
KUJENGA KIZAZI CHENYE UFAHAMU WA BAHARI
Dhana ya Shule za Bluu inaweka mwanafunzi katika nafasi ya kuwa sehemu ya kujifunza, kutafakari na kuchukua hatua kuhusu mazingira yanayomzunguka.
Kupitia elimu hiyo, wanafunzi wanaweza kuelewa uhusiano kati ya bahari, mazingira, uchumi na maisha ya jamii, na namna maamuzi ya sasa yanavyoweza kuathiri rasilimali za bahari kwa vizazi vijavyo.
Kwa mtazamo huo, shule inaweza kuwa sehemu muhimu ya kujenga utamaduni wa kuhifadhi mazingira, huku walimu na wanafunzi wakishirikiana na jamii katika kukuza uelewa kuhusu bahari na matumizi yake endelevu.
TUME YA TAIFA YA UNESCO YAWEKA MSINGI WA HATUA ZINAZOFUATA
Akizungumzia kikao hicho, Dkt. Khamis Khalid Said anaeleza kuwa majadiliano yanawezesha kujenga uelewa wa pamoja kati ya Tume ya Taifa ya UNESCO na Menejimenti ya Wizara ya Elimu na Mafunzo ya Amali Zanzibar kuhusu Programu ya Shule za Bluu.
“Kikao hiki kinatuwezesha kujenga uelewa wa pamoja kuhusu Programu ya Shule za Bluu na kuweka msingi wa namna nzuri ya kuendelea na hatua zinazofuata kuelekea uanzishwaji wa programu hii Zanzibar,” anasema Dkt. Khamis.
Kikao kinaendelea kuimarisha ushirikiano kati ya Tume ya Taifa ya UNESCO na Wizara ya Elimu na Mafunzo ya Amali Zanzibar katika kuangalia namna elimu kuhusu bahari inaweza kuimarishwa katika mazingira ya shule na kuhusishwa na mahitaji ya maendeleo ya Zanzibar na Tanzania kwa ujumla.
Hatua hii pia inaendana na juhudi za Serikali ya Awamu ya Sita katika kuimarisha elimu na ujuzi, kukuza sayansi, teknolojia na ubunifu, pamoja na kuhimiza matumizi endelevu ya rasilimali katika kuchochea maendeleo ya Taifa.
Katika safari kuelekea Tanzania ya 2050, kuwekeza katika elimu kuhusu bahari kunaweza kusaidia kujenga kizazi chenye maarifa, ujuzi na ubunifu wa kutambua fursa za uchumi wa buluu na wakati huo huo kuwa na uelewa wa wajibu wa kulinda mazingira ya baharini.
Kwa kuanzia shuleni, elimu kuhusu bahari inaweza kuwa msingi wa kujenga kizazi kinachoifahamu bahari, kinathamini rasilimali zake na kinakuwa tayari kushiriki katika kuzitunza kwa ajili ya vizazi vya sasa na vijavyo.
Tume ya Taifa ya UNESCO inaendelea kushirikiana na wadau mbalimbali katika kuendeleza programu zinazotumia elimu, sayansi, utamaduni na mawasiliano kama nyenzo za kuchangia maendeleo endelevu ya Tanzania.
Post A Comment: