WADHIBITI UBORA WA SHULE TEKELEZENI MAJUKUMU YENU, ACHENI LUGHA ZA VITISHO-DKT.AKWILAPO

Na Mwamvua Mwinyi, Pwani

KATIBU Mkuu Wizara ya elimu, sayansi na teknolojia Dkt. Leonard

Akwilapo amewaasa baadhi ya wadhibiti ubora wa shule nchini

kutekeleza majukumu yao kwa weledi na kuacha lugha za vitisho kwa

wateja.

Dkt. Akwilapo amesema hayo katika ufunguzi wa mafunzo maalum kwa

wathibiti wakuu ubora wa Shule kanda na Wilaya zote Tanzania bara,

wapatao 217, yanayofanyika wilayani Bagamoyo kwa muda wa siku tatu .

Anasema, lengo la mafunzo ni kuwaongezea ujuzi wa masuala mbalimbali ya

utendaji katika utumishi wa umma na kuwasaidia wathibiti wakuu ubora

wa shule kuondoa ama kurekebisha changamoto za kiutendaji ambazo

zimekuwa zikiripotiwa kwa uongozi wa wizara mara kwa mara katika

maeneo wanayosimamia.

“Wizara imekuwa ikipokea malalamiko kutoka kwa wadau na watoaji wa

elimu kuhusu mwenendo usiofaa wa baadhi ya Wathibiti Ubora wa Shule

kutoa lugha za vitisho kwa wateja na wakati mwingine kuwaomba Rushwa

ili kufanikisha usajili wa Shule au Vyuo vyao .

"Hii ni kukiuka maadili ya utendaji katika utumishi wa umma kwa

kutozingatia sheria, kanuni na maadili ya utendaji katika utumishi wa

Umma na wadhibiti ubora wa elimu wanaofanya vitendo hivi waache mara

moja kwani taarifa zako zitakapotufikia hatutasita kukuchukulia hatua

za kinidhamu” Amesema Dkt. Akwilapo.

Mshiriki wa Mafunzo hayo Bi.  Tatu Tamizi Kutoka Wilaya ya Gairo

akizungumza kwa niaba ya Washiriki  wa mafunzo hayo amesema,

wanashukuru Wizara ya elimu, Sayansi na Teknolojia kwa kuwaandalia

mafunzo hayo ambayo wanaamini yatawaongezea weledi na ufanisi katika

utendaji kazi wao na hivyo kuboresha utoaji huduma za elimu nchini.