Recent Post Recent Post
View More

on October 07, 2026



Waziri wa Nishati, Mhe. Dkt. Juma Zuberi Homera, amesema Serikali imetenga Shilingi trilioni 2.46, sawa na asilimia 97.5 ya bajeti ya Wizara ya Nishati kwa mwaka wa fedha 2026/27, kwa ajili ya kutekeleza miradi ya maendeleo katika sekta ya nishati.

Amesema hatua hiyo ni sehemu ya juhudi za Serikali kuhakikisha nchi inakuwa na nishati ya uhakika, ya kutosha na inayokidhi mahitaji ya wananchi pamoja na shughuli za kiuchumi.

Mhe. Homera amesema Serikali ya Awamu ya Sita, chini ya uongozi wa Mhe. Dkt. Samia Suluhu Hassan, inaendelea kuweka msukumo katika kukuza sekta ya nishati ili iwe kichocheo cha ukuaji wa uchumi na ustawi wa wananchi.

Ametoa kauli hiyo leo, Oktoba 7, 2026, wakati akifungua Maonesho ya 10 ya Kimataifa ya Biashara ya Nishati ya Umeme na Nishati ya Jua (Power and Solar Energy International Trade Event), yanayofanyika katika Ukumbi wa Diamond Jubilee Expo Centre, jijini Dar es Salaam, kuanzia Oktoba 7 hadi 10, 2026.

Amesema kupitia bajeti hiyo, Serikali itaendelea kutekeleza miradi mikubwa ya kimkakati, ikiwemo Mradi wa Kufua Umeme kwa Maji wa Julius Nyerere pamoja na Mradi wa Umeme wa Jua wa Kishapu, ambapo megawati 50 tayari zimeunganishwa kwenye Gridi ya Taifa na awamu ya pili inatarajiwa kuongeza megawati 100.

Kwa mujibu wa Mhe. Homera, bajeti hiyo pia inalenga kuharakisha utekelezaji wa mipango mbalimbali ya kitaifa, ikiwemo Ajenda ya Mission 300 inayolenga kuunganisha wateja wapya wa umeme milioni 1.7 kila mwaka na kufikisha jumla ya wateja milioni 8.3 ifikapo mwaka 2030.

Aidha, amesema Serikali inaendelea kutekeleza Mkakati wa Nishati Safi ya Kupikia wa mwaka 2024–2034, wenye lengo la kuhakikisha asilimia 80 ya Watanzania wanatumia nishati safi ya kupikia ifikapo mwaka 2034.

Ametaja pia Mradi wa Umeme Vijijini kupitia mpango wa kupeleka umeme katika vitongoji 9,009 ifikapo mwaka 2030, kwa gharama ya Shilingi trilioni 1.2, pamoja na kuimarisha mchanganyiko wa vyanzo vya nishati (Energy Mix) kwa kuongeza mchango wa nishati jadidifu kutoka asilimia 61.8 hadi asilimia 75 ifikapo mwaka 2030.

Waziri Homera amesisitiza kuwa utekelezaji wa miradi hiyo unahitaji ushiriki mkubwa wa sekta binafsi, hususan wawekezaji na wadau wenye teknolojia, mitaji na ujuzi wa kisasa, ili kuongeza kasi ya maendeleo ya sekta ya nishati na kuendana na malengo ya Dira ya Taifa ya Maendeleo 2050.

Maonesho hayo yamewakutanisha wawekezaji, wazalishaji na wasambazaji wa teknolojia za nishati ya umeme na nishati ya jua kutoka nchi 48 duniani, kwa lengo la kuonesha teknolojia na suluhisho mbalimbali zinazoweza kuchangia katika maendeleo ya sekta ya nishati.

Mhe. Homera amewahimiza Watanzania kutembelea mabanda mbalimbali katika maonesho hayo ili kujionea teknolojia zinazotumika katika sekta ya nishati, kujifunza na kuongeza uelewa kuhusu fursa na ubunifu unaoendelea katika sekta hiyo.















soma zaidi »

on October 07, 2026


Na Denis Chambi, Tanga.

TANGU kufanyika kwa maboresho ya Bandari ya Tanga yaliyoghalimu zaidi ya Shilingi Bilioni 429.1 Benki ya watu wa Zanzibar (PBZ) imekuwa ni miongoni mwa wanufaika wakuu kupitia tawi lake lililopo mkoani hapa ambapo wananchi wanaotumia usafiri wa majini na shughuli za uvuvi wamekuwa wadau wao wakubwa.

Hayo yameelezwa na Kaimu Meneja wa Benki ya watu wa Zanzibar tawi la Tanga Wahabi Ali wakati akizungumza na waandishi wa habari ambapo amesema kuwa wafanyabishara waliopo katika ya Tanga na Zanzibar pamoja na wavuvi wanaotumia Majahazi wamekuwa wakiitumia benki hiyo kukopa kwaajili ya biashara zao.

"Maboresho ya Bandari ya Tanga yametusaidia kwa kiasi kikubwa kwa upande wa   wafanyabiashara na mzunguko wa fedha umekuwa ni rahisi kwa wale wanaotoka Zanzibar na kuja kufanya biashara zao Tanga na sehemu nyingine za Mikoa ya jirani, tukiangalia sasa hivi kuna Majahazi yanayotoka Tanga kwenda Zanzibar pamoja na boti za kisasa zinazoendelea kutumiwa hizi zote zimetusaidia kwa kiasi kikubwa PBZ"

"Tangu tumefungua huduma yetu katika mkoa wa Tanga muitikio umekuwa ni mzuri  ukilinganisha na mahusiano ya ukaribu yaliyopo kati ya Tanga na Zanzibar muingiliano wa kibishara uliopo imetusaidia kuanza vizuri na Benki yetu inahudumia watu wote na tumejipanga kutoa huduma bora" amesema Ali.

Amebainisha kuwa katika wiki maalum ambayo ni mahususi kwaajili ya huduma kwa wateja PBZ  inatarajia kukutana na wateja wake kwa lengo la kupokea maoni kutoka kwao ili kuboresha zaidi huduma zao na kuweza kuwavutia wengine

Aidha Benki hiyo imeanzisha mfumo wake wa kidigital ambapo mteja anaweza kupata huduma  kwa haraka zaidi kupitia simu ya mikononi bila kwenda katika ofisi au tawi lolote kwaajili ya kufuata huduma.

"PBZ imeendelea kujiimarisha zaidi katika kutoa huduma bora  kwa njia ya kidigitali kupitia huduma ya lipa hapa ambayo unaweza kufanya malipo yako kwa njia ya mtandao kwa gharama nafuu kupitia mitandao ya simu bila hata  kwenda Benki" amesema.

Mbali na hiyo PBZ inatarajia kuzindua rasmi huduma ya lipa Ada ikiwalenga wadau wa elimu kupitia taasisi mbalimbali ambapo wazazi na walezi wanaweza kufanya malipo ya ada kupitia mfumo huo huku mfumo ukihusisha na upatikanaji wa taarifa zote za kitaaluma pamoja na mahudhuriao ya wanafunzi.

"Hivi karibuni tutatambulisha huduma yetu mpya inaitwa lipa Ada ni maalumu kwaajili ya taasisi za elimu yaani shule za binafsi ambayo  tutawapa shule husika bure kabisa ambapo watatakiwa kuwa na akaunti za PBZ na wazazi wataweza kulipa ada zao lakini pia mfumo huu itawezesha kuwa na taarifa zote  za kitaaluma pamoja na mahudhuriao ya wanafunzi" ameongeza.

Amesema PBZ imeendelea kusogeza huduma zake karibu na wananchi ambapo mpaka sasa imepungua matawi yake katika Mikoa ya Dar es salaam, Dodoma Mbeya , Tanga, Arusha na Morogoro ikitoa huduma z kibishara, mikopo kwa watumishi mbalimbali, wakulima ,wavuvi pamoja na wajasiriamali.

Baadhi ya wananchi wakiendelea kupata huduma katika tawi la Benki ya watu wa Zanzibar (PBZ)  lililopo mkoani Tanga ikiwa ni mwendelezo wa huduma ya wiki ya mteja.

soma zaidi »

on October 07, 2026


Na Denis Chambi Tanga.

MBUNGE wa Jimbo la Tanga mjini Kassimu Mbaraka (Makbel) amesema kuwa ofisi yake inaratibu uandikishaji wa majina ya vijana kwaajili ya kuwapatia fursa ya ajira zaidi ya elfu 3,000 zilizopatikana kupitia zao la Mkonge  ambapo amewataka kuchangamkia fursa hiyo ili kuweza kujipatia kipato..

Makbel Amesema hayo wakati akiwa katika Kata ya Maweni jijini Tanga ikiwa ni mwendelezo wa ziara zake za mtaa kwa mtaa jimboni humo  zenye lengo la kusikiliza na kutatua kero mbalimbali za wananchi wa Jimbo hilo ambapo ameeleza kuwa kupitia zao la Mkonge vibarua hao wanahitajika kwaajili ya kukata Mkonge mashambani pamoja na uchakataji wake kwa kutumia Korona.

"Mpaka sasa hivi  tuna ajira elfu tatu za vijana  ambao wanatakiwa kuja kuandikisha vijana kwenye ofisi ya Mbunge, vijana wanatakiwa waende  kufanya kazi ya kulisha Korona na kukata Mkonge na mshahara wanaolipwa ni kima kizuri cha  mshahara wa Serikali, mpaka sasa tunaendelea na zoezi la kuandikisha vijana  na ajira hizi ziko ndani ya jiji letu la Tanga" amesema Makbel.


Amebainisha kuwa alifanya ziara kwenye viwanda vyote vilivyopo jijini Tanga lengo hasa ni kujua ni kwa jinsi gani wananchi hususani wanaozungukwa na uwekezaji huo wananufaika ambapo aliwaelekeza wawekezaji kuzingatia wakazi waliopo karibu na maeneo yote ya viwanda hususani vijana ili viweze kuwa na tija kwao.

"Moja ya malengo ya kufanya ziara katika viwanda vyote vilivyopo jiji la Tanga ni kuhakikisha kuwa ajira zinapotokea ziletwe kwenye ofisi ya Mbunge  ili vijana waweze kunufaika kupitia Diwani wa kata husika tuweze kirstibu vizuri na kuwabaini walengwa"amesema Mbunge huyo.

Hayo yanakuja baada ya  wananchi waliiopata fursa ya kuzungumza mbele ya Mbunge huyo alipokuwa katika kata ya Maweni ambapo wameweza kutokunufaika na viwanda vilivyopo licha ya kuwa vimewazunguka katika maeneo yao ambapo wameomba kupatiwa vibarua ili waweze kujipatia kipato na hatimaye kuendesha familia zao.

"Sisi vijana tatizo kubwa lililopo kwa sasa ni ajira katika kata yetu ya Maweni kuna viwanda vingi vimetuzunguka lakini fursa kwa wakazi wa kata husika imekuwa ni changamoto na sisi tupo tayari kufanya hata vibarua lakini wanapata watu wa kutoka mbali" amesema mmoja wa kijana kwenye ziara hiyo..




soma zaidi »

on October 07, 2026

Na Denis Chambi Tanga.

MKOA wa Tanga kupitia ofisi ya tume ya Madini kwa mwaka wa fedha 2025/2026 umefanikiwa kukusanya kiasi cha Shilingi Bilioni 13.9 sawa na asilimia 126 na kufanikiwa kuvuka lengo walilopangiwa la kukusanya Bilion 12 mafanikio ambayo yamechangiwa na wachimbaji kufuata sheria zinazotakiwa ikiwemo kuwa na Leseni rasmi.

Hayo yameelezwa na Kaimu Afisa Madini Mkazi wa mkoa wa kimadini Tanga,  Laurent Bujashi  wakati akizungumza na waandishi wa habari ofisini kwake akieleza mafanikio hayo ambapo amesema kuwa miongoni mwa Mikoa ambayo inapatikana Madini ya aina zote yaliyopo hapa nchini Tanga ni moja wapo karibia wilaya zote zikihusisha shughuli za uchimbaji wa aina mbalimbali.

"Tanga ni moja wapo ya Mikoa ambayo ni tajiri kwenye upande wa Madini kwa takwimu zilizopo kwenye kipindi cha mwaka wa fedha  2025/2026 tumeweza kukusanya jumla ya Shilingi Milion 13.9 ambayo ni sawa na  asilimia126 ya lengo tulilopewa la kukusanya Bilioni 12, asilimia kubwa ya Madini yakiwa ni Madini ya viwandani yakifwatiwa na Madini mengine  yakiwemo ya Vito na dhahabu".amesema Bujashi

Aidha  amesema kuwa mafanikio hayo yametokana na uwepo wa leseni za uchimbaji wa aina mbalimbali za  Madini ikiwemo Madini ya viwandani pamoja na dhahabu ambapo hadi sasa mkoa huo umesajili jumla ya leseni  3090, nyingi zikiwa ni leseni za uchimbaji mdogo na  wa kati.

Hata hivyo  Bujashi ameeleza kuwa yapo baadhi ya maeneo ambayo hayajatengwa kwaajili ya shughuli za uchimbaji wa Madini na baadhi ya wananchi wamekuwa wakikiuka taratibu kwa kuyavamia maeneo hayo ambapo sheria mbalimbali zimekuwa zikichukuliwa dhidi yao huku wengine wakionyesha utayari wa kutafuta leseni baada ya kupatiwa elimu.

 "Zipo changamoto za baadhi watu kutumia maeneo ambayo wanavamia maeneo wanaanzisha shughuli za uchimbaji ambazo haziruhusiwi tunaendelea kushirikiana na Mamlaka za Serikali kiwachukulia hatua ikiwemo kufanya ukaguzi wa mara kwa mara lakini pia tumekuwa tukiwapa elimu wale ambao wameonyesha utayari wa kuomba leseni ili waweze kufanya shughuli zao kwa mujibu wa sheria" amesema. Bujashi

Ameongeza kuwa ofisi ya Madini mkoa wa Tanga imekuwa ikikutana na wamiliki wa leseni mara kwa mara ikiwemo kiwatembelea kwa lengo la kuhakikisha kuwa wananufaika namba moja wa shughuli wanazozifanya wanakuwa ni wananchi wa maeneo yanayowazunguka hii ikilenga hasa kuwapatia kipato kupitia.

"Tume ya  Madini mkoa wa Tanga Huwa mara ya tunakaa na wamiliki wa leseni na kuwashauri kuhakikisha kwamba shughuli zao za uchimbaji  zinazingatia wananchi kunufaika na wanakuwa kipaumbele cha kwanza na sehemu ya kile wanachokipata sheria inawataka kurudisha kwa jamii na wanatakiwa wawasirishe mipango yao ya utekelezaji wa CSR kwenye kamati za kila  wilaya na kuweza kupitishwa"

Ameongeza kuwa kutokana na ukuwaji wa mkoa wa Tanga unaendelea kumekuwa na uhitaji mkubwa wa Madini ujenzi yakiwemo, vifusi, kokoto na mchanga hivyo baadhi ya wananchi kuanzisha shughuli za uchimbaji holela ambao unaweza kuathiri mazingira hivyo kuwataka kufuata sheria ikiwemo kuomba vibali.

"Kuendelea kukua kwa mkoa wa Tanga hii inaenda sambamba na uhitaji mkubwa wa Madini ya ujenzi wito kwa wananchi ni kuwataka kuomba leseni ambazo zitawawezesha kujipatia kipato zaidi lakini wahakikishe kuwa maeneo ambayo wanachimba ni Yale ambayo yamekubalika  ili kuhakikisha kwamba hakuna uharibifu wa mazingira ambao unaweza kutokea  na kupelekea athari kwa jamii"amesisitiza.



Baadhi ya Madini mbalimbali yanayopatikana Mkoani Tanga  yakiwa katika ofisi hiyo.
Kaimu Afisa Madini mkoa wa Tanga Laurent Bujashi akipata maelezo kutoka kwa  Msimamizi wa kituo cha uongezaji thamani wa Madini mkoa wa Tanga Naomi Mndambi.
Muongez thamani wa Madini ya Vito Amour Juma akiwa katika shughuli zake ndani ya  kituo kilichopo ndani ya ofisi ya Mkoa huo 

Mfanyabiashara na Mnunuzi mkubwa wa Madini (DIRA)Mkoa wa Tanga Said Salimu.
soma zaidi »

on October 07, 2026
Na Mwandishi Wetu    
Serikali imesema inaweka mkazo katika kuhakikisha bidhaa za mafuta zinaendelea kupatikana nchini kwa uhakika, na kwa bei himilivu, licha ya mabadiliko ya bei katika soko la dunia yanayoendelea kuathiri bei za ndani.
Serikali imechukua hatua hizo kutokana na mwenendo wa bei za mafuta nchini kuendelea kuathiriwa na mgogoro wa kisiasa katika eneo la Mashariki ya Kati, ambako Tanzania hununua sehemu kubwa ya bidhaa zake za mafuta, ambao uliibuka upya na kuathiri uzalishaji, upatikanaji na usafirishaji wa mafuta duniani.Hali hiyo ilisababisha kupanda kwa bei za bidhaa za mafuta yaliyosafishwa katika soko la dunia.
Kutokana na mwenendo huo, bei za petroli, dizeli na mafuta ya taa nchini kwa mwezi Oktoba 2026 zimeongezeka ikilinganishwa na mwezi Septemba 2026. Bei zimepanda  baada ya kushuka kwa miezi mitatu mfululizo.
EWURA, kama ilivyo wajibu wake, imetangaza bei kikomo za bidhaa za mafuta ya petroli zitakazotumika nchini kuanzia Jumatano, tarehe 7 Oktoba 2026, saa 6:01 usiku.
Kwa mwezi Oktoba 2026, katika mkoa wa Dar es Salaam, bei kikomo ya rejareja ni Shilingi 4,057 kwa lita ya petroli, Shilingi 4,086 kwa lita ya dizeli na Shilingi 4,067 kwa lita ya mafuta ya taa.
Kwa Tanga, bei kikomo ya rejareja ni Shilingi 4,123 kwa lita ya petroli, Shilingi 4,152 kwa lita ya dizeli na Shilingi 4,133 kwa lita ya mafuta ya taa.
Na kwa Mtwara, bei kikomo ya rejareja ni Shilingi 4,170 kwa lita ya petroli, Shilingi 4,199 kwa lita ya dizeli na Shilingi 4,180 kwa lita ya mafuta ya taa. 
Taarifa hiyo iliyotolewa  imewakumbusha wananchi kuchukua risiti baada ya kununua ya mafuta kwenye vituo ili kuwa na ushahidi wa ununuzi huo. 
soma zaidi »

on October 07, 2026
Baraza la Taifa la Hifadhi na Usimamizi wa Mazingira (NEMC) linashiriki kikamilifu katika Mkutano wa 12 wa Nchi Wanachama wa Mkataba wa Nairobi (COP12), unaofanyika tarehe 6 hadi 9 Oktoba 2026 katika Ukumbi wa Kimataifa wa Mikutano wa Julius Nyerere (JNICC), Dar es Salaam, Tanzania.
soma zaidi »

on October 07, 2026
MLANDIZI, PWANI

BRIGEDIA Jenerali David Msakulo amewataka wazazi kushirikiana kwa karibu na walimu na walezi katika malezi ya watoto ili kuwajenga kuwa viongozi bora wa taifa.
soma zaidi »

on October 06, 2026

 

Meneja wa Mamlaka ya Udhibiti wa Huduma za Nishati na Maji (EWURA) Kanda ya Magharibi,Mhandisi Karim Ally, akitoa elimu kwa wanachama wa Shirikisho la Vyama vya Watu wenye Ulemavu ( SHIVYAWATA) mkoa wa Tabora leo Oktoba 6,2026.

Na Mwandishi Wetu,TABORA

Katika kuadhimisha Wiki ya Huduma kwa Wateja, Mamlaka ya Udhibiti wa Huduma za Nishati na Maji (EWURA) Kanda ya Magharibi, leo, tarehe 6/10/2026, imekutana na wanachama wa Shirikisho la Vyama vya Watu wenye Ulemavu Tanzania (SHIVYAWATA) kwa mkoa wa Tabora, na kuwaelimisha kuhusu haki na wajibu wao katika huduma za nishati na maji.

Wanachama hao pia wamepata elimu kuhusu utaratibu wa kuwasilisha malalamiko na namna yanavyoshughulikiwa, kanuni za ubora wa huduma ya maji, matumizi sahihi na salama ya gesi ya kupikia na umuhimu mikataba ya huduma kwa wateja huku wakisisitizwa kutumia mafundi umeme wenye leseni zilizotolewa na EWURA.

Meneja wa EWURA Kanda ya Magharibi, Mha. Karim Ally, akifungua warsha hiyo iliyofanyika katika Ofisi za EWURA Kanda ya Magharibi, mjini Tabora, ameeleza kuwa ni utaratibu wa Mamlaka kukutana na wadau mbalimbali ikiwemo watu wenye ulemavu ili kuwaelimisha kuhusu udhibiti sanjari na kupokea mrejesho kuhusu huduma zinazodhibitiwa.

Aidha, washiriki wameiomba EWURA kuendeleza elimu hiyo kwa kuwafikia wanachama wa SHIVYAWATA katika maeneo mbalimbali nchini na pia kwa makundi mengine ya aina hiyo ili kuimarisha uelewa wao katika masuala ya kiudhibiti.

 Meneja wa Mamlaka ya Udhibiti wa Huduma za Nishati na Maji (EWURA) Kanda ya Magharibi,Mhandisi Karim Ally, akitoa elimu kwa wanachama wa Shirikisho la Vyama vya Watu wenye Ulemavu ( SHIVYAWATA) mkoa wa Tabora leo Oktoba 6,2026.

 

 Meneja wa Mamlaka ya Udhibiti wa Huduma za Nishati na Maji (EWURA) Kanda ya Magharibi,Mhandisi Karim Ally, akiwa katika picha ya pamoja mara baada ya kutoa  elimu kwa wanachama wa Shirikisho la Vyama vya Watu wenye Ulemavu ( SHIVYAWATA) mkoa wa Tabora leo Oktoba 6,2026.

 Meneja wa Mamlaka ya Udhibiti wa Huduma za Nishati na Maji (EWURA) Kanda ya Magharibi,Mhandisi Karim Ally, akiwa katika picha ya pamoja mara baada ya kutoa  elimu kwa wanachama wa Shirikisho la Vyama vya Watu wenye Ulemavu ( SHIVYAWATA) mkoa wa Tabora leo Oktoba 6,2026.

 Meneja wa Mamlaka ya Udhibiti wa Huduma za Nishati na Maji (EWURA) Kanda ya Magharibi,Mhandisi Karim Ally, akiwa katika picha ya pamoja mara baada ya kutoa  elimu kwa wanachama wa Shirikisho la Vyama vya Watu wenye Ulemavu ( SHIVYAWATA) mkoa wa Tabora leo Oktoba 6,2026.

soma zaidi »

on October 06, 2026


Waziri wa nchi ofisi ya waziri mkuu-kazi, ajira na mahusiano, mhe. Deus sangu (kulia) akiteta jambo na waziri wa kazi nchini Qatar, Mhe. Dkt. Ali Bin Samikh Ali Mari, mwishoni mwa Mkutano wa Pili wa ‘Doha Dialogue’ kuhusu Uhamaji wa Wafanyakazi, uliofanyika Oktoba 6, 2026, jijini Dar es Salaam.


Rais wa Zanzibar na Mwenyekiti wa Baraza la Mapinduzi, Mhe. Dkt. Husserin Ali Mwinyi (Wapili kushorto), akipokea zawadi kutoka kwa Waziri wa Kazi wa nchini Qatar, Mhe. Dkt. Ali Bin Samikh Ali Mariri, huku Waziri wa Nchi Ofisi ya Waziri Mkuu-Kazi, Ajira na Mahusiano Mhe. Deus Sangu, akishuhudia wakati w aufunguzi wa mkutano wa pili wa majadiliano ya Doha (Doha Dialogue)


Mkurugenzi Mkuu wa Mfuko wa Hifadhi ya Jamii kwa Watumishi wa Umma (PSSSF), Bw. Fortunatus Magambo (Wakwanza Kulia) akiwa na viongozi wenzake, katika ufunguzi wa Mkutano wa Pili wa ‘Doha Dialoguie’ Jijini Dar Es Salaaam, Oktoba 6, 2026

✅ Abainisha Makubaliano ya Mkutano huo katika kuimarisha Uhamaji wa Nguvu Kazi




Na: OWM (KAM), Dar es Salaam


WAZIRI wa Nchi, Ofisi ya Waziri Mkuu – Kazi, Ajira na Mahusiano, Mhe. Deus Sangu, amesema Mkutano wa Pili wa Doha Dialogue II 2026 umefungua fursa zaidi za ajira kwa Watanzania na wananchi wa nchi nyingine za Afrika, kupitia kuimarishwa ushirikiano wa uhamaji wa nguvu kazi kati ya Afrika na nchi za Ghuba (GCC+).

Mhe. Sangu amesema hayo akizungumza na Waandishi wa Habari mwishoni mwa mkutano huo uliofanyika leo Oktoba 6, 2026 Jijini Dar es Salaam.

Amesema, kama taifa tumepata fursa ya nchi za GCC+ kuja nchini ili kujadili na kutafakari uhamaji wa nguvu kazi kutoka Barani Afrika kwenda katika nchi za Ghuba (GCC+).

“ Kupitia mkutano huu tumejadili na nchi mbalimbali za Ghuba kuona namna gani wanaweza kuongeza fursa za ajira ikiwemo za kitaalamu (Skilled labour) zinazohusisha madaktari, manesi, wafamasia, mafundi na mainjinia,”

Aidha, Mhe. Sangu amesema vijana wa Kitanzania waliopelekwa kwenye nchi hizo kufanya kazi wameonyesha uhodari katika kuchapa kazi na uaminifu.




Kadhalika, amesema katika mkutano huo nchi za Ghuba zimeihakikishia mkutano huo uliowaleta pamoja wajumbe kutoka mataifa mbalimbali barani Afrika uzingatiaji wa mikataba waliyoingia (Bilateral Agreements) ambayo inazingatia haki na maslahi ya wafanyakazi hasa katika suala la hifadhi ya jamii.




“ Tumekubaliana kimsingi sasa, suala la hifandhi ya jamii ni kipaumbele katika mikataba yote tutakayoingia na nchi hizo, tumejadili kuhusu bima ya afya kwa wanaokwenda kufanya kazi na malipo ya mishahara,” amesema

Kwa upande wake, Mwenyekiti wa Mawakala wa Uhamaji wa Nguvu Kazi na Ajira Bw. Abdallah Khalid Mohammed, amefurahia makubaliano hayo na kwamba kutakuwa na mfumo ambao utawezesha mfanyakazi kuhakikisha usalama wake unazingatiwa huku kila upande unawajibika.

MWISHO
soma zaidi »

on October 06, 2026

Waziri wa nchi ofisi ya waziri mkuu-kazi, ajira na mahusiano, mhe. Deus sangu (kulia) akiteta jambo na waziri wa kazi nchini Qatar, Mhe. Dkt. Ali Bin Samikh Ali Mari, mwishoni mwa Mkutano wa Pili wa ‘Doha Dialogue’ kuhusu Uhamaji wa Wafanyakazi, uliofanyika Oktoba 6, 2026, jijini Dar es Salaam.

Rais wa Zanzibar na Mwenyekiti wa Baraza la Mapinduzi, Mhe. Dkt. Husserin Ali Mwinyi (Wapili kushorto), akipokea zawadi kutoka kwa Waziri wa Kazi wa nchini Qatar, Mhe. Dkt. Ali Bin Samikh Ali Mariri, huku Waziri wa Nchi Ofisi ya Waziri Mkuu-Kazi, Ajira na Mahusiano Mhe. Deus Sangu, akishuhudia wakati w aufunguzi wa mkutano wa pili wa majadiliano ya Doha (Doha Dialogue)

Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Deus Sangu akisisitiza jambo  mwishoni mwa Mkutano wa Pili wa ‘Doha Dialogue kuhusu Uhamaji wa Wafanyakazi, Uliofanyika Oktoba 6, 2026, Jijini Dar Es Salaam.

Mkurugenzi Mkuu wa Mfuko wa Hifadhi ya Jamii kwa Watumishi wa Umma (PSSSF), Bw. Fortunatus Magambo (Wakwanza Kulia) akiwa na viongozi wenzake, katika ufunguzi wa Mkutano wa Pili wa ‘Doha Dialoguie’ Jijini Dar Es Salaaam, Oktoba 6, 2026

Dar es Salaam, Oktoba 6, 2026

Mkutano wa Pili wa mazungumzo ya Doha (Doha Dialogue) kuhusu uhamaji wa nguvu kazi na ajira, umekamilika leo Oktoba 6, 2026 jijini dar es salaam na kuja na fursa mpya za ajira kwenye nchi za Ghuba.

Akizungumza na Waandishi wa Habari mwishoni mwa mkutano huo, Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Deus Sangu, amesema kama taifa tumepata fursa ya nchi za GCC+ kuja nchini ili kujadili na kutafakari uhamaji wa nguvu kazi kutoka Barani Afrika kwenda katika nchi za Ghuba (GCC+) 

“ Lakini pia tumeahidiwa ajira zaidi, kando na mkutano huu tuliendelea na mikutano mingine kuhusisha nchi mbalimbali za Ghuba kuona namna gani wanaweza kuongeza fursa za ajira hivyo katika mikutano hiyo tumepata fursa nyingi zitakazopelekea kusaini mikataba mingi ya ajira.” amesema Mhe. Sangu.

Mbali na ajira zisizo za ujuzi (Un skilled), sasa zimekuja fursa za ajira za kitaalamu (Skilled labour) wanahitaji vijana wengi madaktari, manesi, wafamasia, mafundi na mainjinia, kwahivyo wameona fursa ya nguvu kazi kutoka afrika lakini kipekee kutoka Tanzania. 

“Vijana wa Kitanzania waliopelekwa kwenye nchi hizo kufanya kazi wameonyesha uhodari katika kuchapa kazi na uaminifu,” amesisitiza.

Aidha, Mhe. Sangu amesema, katika mkutano huo nchi za Ghuba zimeuhakikishia mkutano huo uliowaleta pamoja wajumbe kutoka mataifa mbalimbali barani Afrika na AU uzingatiaji wa mikataba waliyoingia (Bilateral Agreements)  ambayo mingi inazingatia haki na maslahi ya wafanyakazi hasa katika suala la hifadhi ya jamii.

“ Tumekubaliana kimsingi sasa, suala la hifandhi ya jamii ni kipaumbele katika mikataba yote tutakayoingia na nchi hizo, tumejadili kuhusu bima ya afya kwa wanaokwenda kufanya kazi na malipo ya mishahara,”Amesema Mhe. Sangu.

MWISHO

soma zaidi »

on October 06, 2026

 


📌Asisitiza mifumo iliyozinduliwa ifanye kazi kwa ufanisi na kuendana na mahitaji ya wateja


📌Aipongeza TANESCO kwa ubunifu na kuimarisha huduma kwa wateja wakubwa


Waziri wa Nishati, Mhe. Dkt. Juma Zuberi Homera, leo Oktoba 6, 2026 amezindua Mkataba wa Huduma kwa Wateja uliohuishwa pamoja na  huduma mbalimbali za TANESCO zinazolenga kuboresha zaidi namna ya utoaji wa huduma kwa wateja kwa ufanisi na kwa wakati, uzinduzi uliofanyika katika Ukumbi wa Super Dome, jijini Dar es Salaam.

Mhe. Homera amesema matumizi ya mifumo ya teknolojia za kisasa katika utoaji wa huduma kwa wateja yanazidi kuiwezesha TANESCO kupiga hatua kubwa katika kuboresha huduma zake  kwa kuzingatia uwajibikaji, uwazi na weledi unaolenga kuleta matokeo chanya kiutendaji.

Ametoa rai kuhakikisha  changamoto zinazowakabili  wananchi katika matumizi ya umeme zinashughulikiwa kwa haraka kwa kuwa changamoto katika huduma ya umeme zinaweza kuathiri moja kwa moja uzalishaji na shughuli za kiuchumi.

“Mwelekeo wa Serikali ni kujenga sekta ya nishati inayoweza kuunga mkono kasi ya ukuaji wa uchumi wa Tanzania. Tunataka kuona shughuli za uzalishaji zinaendelea bila vikwazo visivyo vya lazima na tunataka wananchi wapate huduma kwa urahisi zaidi,” ameeleza Waziri Homera.

Amesema Tanzania hivi sasa ina umeme wa kutosha, ambapo uwezo wa uzalishaji umefikia jumla ya Megawati 4,606 dhidi ya mahitaji ya juu ya Megawati 2,316, hatua inayotoa fursa zaidi za kukuza shughuli za kiuchumi kupitia uwekezaji katika viwanda, biashara na shughuli za kijamii.

Kwa upande wake, Mwenyekiti wa Kamati ya Kudumu ya Bunge, Mhe. Subira Mgalu, ameipongeza Wizara ya Nishati kupitia Shirika la Umeme Tanzania (TANESCO) kwa kuendelea kuja na ubunifu unaolenga kutatua changamoto zinazowakabili wananchi katika nyanja mbalimbali.

Naye Makamu Mwenyekiti wa Bodi ya Wakurugenzi wa TANESCO, Mhe. Balozi Zuhura Bundala, amesema Bodi itaendelea kuisimamia TANESCO katika kuhakikisha utoaji wa huduma unaenda sambamba na matumizi ya teknolojia za kisasa, ili huduma zimfikie mteja moja kwa moja bila vikwazo.

“Bodi itaendelea kuishauri TANESCO katika utoaji wa huduma kwa ufanisi. Kwetu sisi, mteja ni mfalme, na huduma inayotolewa na Shirika inamgusa mwananchi moja kwa moja. Tumejipanga kuhakikisha jitihada hizi zinaendelea kupiga hatua,” amesisitiza Balozi Bundala

Kwa upande wake, Mkurugenzi Mtendaji wa TANESCO, Bw. Lazaro Twange, ametoa ufafanuzi kuhusu uzinduzi wa Twiga Assistant, mfumo unaolenga kuachana na utoaji wa huduma kwa njia za makaratasi na kuingia katika matumizi ya mifumo ya kielektroniki inayompunguzia   mteja kutumia muda mrefu kusubiri huduma anayohitaji.

“TANESCO inafanya kazi kubwa kuhakikisha nishati ya umeme inawafikia wananchi baada ya kukamilika kwa miradi mingi ya kimkakati, ukiwemo Mradi wa Chalinze–Dodoma. Hatua hii inatupa nguvu ya kuja na ubunifu wa kuona namna ya kumfikia mteja kwa haraka. 

Ndiyo maana TANESCO imeamua kushuka chini na kusogeza huduma zake karibu na wananchi,” amefafanua Bw. Twange.

Hafla hiyo iliyobeba kaulimbiu ya “EXTRA MILE” imeenda sambamba na uzinduzi wa namba mpya ya 185 kwa ajili ya wateja wakubwa, Twiga AI Chatbot, mfumo saidizi wa kidijitali unaolenga kujibu maswali ya wateja, Kitengo cha watwja wakubwa kilichoboreshwa, pamoja na Premium Customer Portal, mfumo maalumu kwa ajili ya wateja wakubwa, ikiwa ni sehemu ya kutambua mchango wao katika shughuli za Shirika.

Uzinduzi huo umefanyika katika kuadhimisha Wiki ya Huduma kwa Wateja, ikiwa ni sehemu ya jitihada za TANESCO kuendelea kuboresha huduma kwa kutumia teknolojia za kisasa na kuhakikisha mteja anapata huduma kwa urahisi, haraka na kwa ufanisi.

soma zaidi »

on October 06, 2026

 

Na Mwandishi Wetu- Same

 

Katibu Tawala Wilaya ya Same Bi. Mamndolwa Gembe amewataka Kamati ya Usimamizi wa Maafa Wilaya ya Same kuendelea kutoa elimu ya tahadhari kwa wananchi wa maeneo yote ya wilaya hiyo hususani wakulima na wafugaji.

Bi. Gembe amesisitiza hayo kwa niaba ya Mkuu wa Wilaya hiyo, leo Octoba 06, 2026, wakati akifungua kikao kazi cha Kamati za usimamizi wa maafa za wilaya na timu ya wataalamu kutoka Ofisi ya Waziri Mkuu (Sera, Bunge, Uratibu na Wenye Ulemavu), Mamlaka ya Hali ya Hewa Tanzania (TMA) na Shirika la Chakula Duniani (WFP) sambamba na kuimarisha utoaji wa matumizi ya taarifa za tahadhari za awali katika kujiandaa na kukabiliana na madhara ya El nino.


“Wilaya ya Same ni miongoni mwa maeneo yanayokabiliwa na mabadiliko makubwa ya tabianchi, kijiografia wilaya yetu ina maeneo ya milima na tambarare, hivyo inatufanya tuwe katika hatari ya kukabiliwa na changamoto za pande mbili, kutokana na hilo mipango na mapendekezo yatakayotolewa katika kikao kazi hiki yasibaki kwenye nyaraka tu, bali yakatimizwe na kuingizwa kwenye mipango kazi ya halmashauri, mamlaka za kata na vijiji” amesisitiza Bi. Gembe.

 

Aidha, Bi. Gembe ameishukuru Ofisi ya Waziri Mkuu (Sera, Bunge, Uratibu na Wenye Ulemavu), Mamlaka ya Hali ya Hewa Tanzania (TMA) na Shirika la Chakula Duniani (WFP) kwa ushirikiano lakini pia amesema kuwa Serikali ya Wilaya ya Same ipo tayari kufanya kazi bega kwa bega ili kuhakikisha malengo ya programu hiyo yanatimia.


“Tunawashukuru sana kwa kuchagua Wilaya ya Same kuwa sehemu yay a ziara na kikao kazi hiki cha kimkakati, ujio wenu ni Ushahidi tosh awa dhamira ya Serikali ya Awamu ya Sita katika kulinda Maisha na mali za wananchi dhidi ya athari za majanga Ameongeza Katibu Tawala huyo.

 


Nae, Mwakilishi kutoka Shirika la Chakula Duniani (WFP) Bi. Sandra Hakim amebainisha kuwa, lengo la programu hiyo ni kuifanya taarifa ya Mamlaka ya Hali ya Hewa inashuka chini ili jamii ikiwemo wazee, wamama, walemavu na watoto waweze kupata taarifa kwa wakati kwani upatikanaji wa taarifa za hali ya hewa mapema zitakuwa na thamani pale utakapochukua hatua kabla ya majanga kutokea.

 


Katika kikao hicho mada mbalimbali kuhusu Utabiri wa Msimu, El nino na madhara tarajiwa, Dhana ya Maafa ikiwemo mzingo wa maafa, Mpango wa Dharurawa Kukabiliana na Maafa na majukumu ya kamati na utekelezaji wa mpango pamoja na Usambazaji wa Huduma za Hali ya Hewa ziliwasilishwa kwa Kamati ya Usimamizi wa Maafa.

soma zaidi »

on October 06, 2026
SHIRIKA la Mawasiliano Tanzania (TTCL) imesema itaendelea kwenda hatua ya ziada katika kuboresha huduma kwa wateja kwa kutumia teknolojia, kuongeza kasi ya utatuzi wa changamoto na kuimarisha mifumo ya kupokea na kufanyia kazi mrejesho wa wateja.
soma zaidi »

on October 06, 2026

 

Makamu wa Rais wa Jamhuri ya Muungano wa Tanzania Mhe. Deogratius Ndejembi amesema matumizi ya mifumo ya kisasa ya teknolojia ni chachu katika ukusanyaji wa kodi hivyo yanapaswa kutiliwa mkazo ili kuongeza uwazi, kuimarisha usimamizi wa kodi na kurahisisha ulipaji kodi.

Makamu wa Rais ameyasema hayo jijini Arusha Oktoba 06, 2026 wakati wa ufunguzi wa Mkutano wa wa Chama cha Wasimamizi wa Kodi wa Jumuiya ya Madola (CATA) na kueleza kuwa teknolojia ni nyenzo muhimu katika kuboresha ukusanyaji wa mapato ya ndani na kuimarisha huduma kwa walipa kodi ndiyo maana mkutano huo umekuja na kauli mbiu inayogusa teknolojia.

Amesema pamoja na umuhimu wa teknolojia, mafanikio katika ukusanyaji wa mapato hayawezi kutegemea teknolojia pekee, bali yanahitaji sera nzuri, madhubuti, zinazoeleweka na zinazotabirika, pamoja na usimamizi wa kodi wenye ufanisi na unaokidhi mahitaji ya walipakodi.

Makamu wa Rais pia amesisitiza umuhimu wa ushirikiano wa kimataifa katika masuala ya kodi, akibainisha kuwa biashara zinazovuka mipaka, makampuni ya kimataifa, miamala ya kidijitali pamoja na mali za kifedha zinazohifadhiwa nje ya nchi zimefanya ushirikiano kati ya mamlaka za kodi kuwa muhimu zaidi.

Amesema Tanzania inaendelea kuimarisha ushiriki wake katika ushirikiano wa kimataifa wa kodi, ikiwemo kubadilishana taarifa za kodi na kutoa msaada wa kiutawala baina ya nchi huku akieleza kuwa ushirikiano huo ni muhimu katika kuongeza uhakika wa kodi, kubadilishana taarifa, kuzuia na kutatua migogoro ya kikodi.

Amesema uratibu mzuri kati ya nchi unaweza kusaidia kulinda mapato ya Serikali huku ukipunguza uwezekano wa kutozwa kodi mara mbili na kuondoa sintofahamu kwa wawekezaji halali.

“Nchi inayovutia uwekezaji siyo ile isiyokuwa na kodi, bali ni ile yenye kanuni za kodi zilizo wazi, thabiti na zinazosimamiwa kwa haki, zikiungwa mkono na taratibu bora za forodha na ukusanyaji wa mapato,” amesema.

Awali akizungumza katika mkutano huo Rais wa CATA Mhe. Abu Tariq Jamaluddin amesema matumizi ya teknolojia ya kisasa yamekuwa yakisaidia nchi wanachama wa CATA kurahisisha utawala wa kodi kwa kuweka mazingira rahisi ya ukusanyaji wa mapato na kuwasaidia walipakodi kufuata sheria za kodi.

Amesema kauli mbiu ya mkutano huo inalenga kuhimiza matumizi zaidi ya teknolojia na kueleza kuwa CATA itaendelea kuwezesha matumizi ya teknolojia katika ukusanyaji wa kodi ili kuimarisha usimamizi wa kodi baina ya nchi wanachama.

Amesema kupitia mkutano huo nchi washiriki wataweza kubadilishana ujuzi na uzoefu kuhusu usimamizi wa kodi na matumizi ya teknolojia.

Kwa upande wake Kamishna Mkuu wa Mamlaka ya Mapato Tanzania (TRA) ambao ndiyo waandaaji wa mkutano huo Bw. Yusuph Juma Mwenda amesema Mamlaka hiyo imepiga hatua kubwa katika matumizi ya teknolojia ambayo yameboresha zaidi huduma za usimamizi wa kodi kwa kuongeza uwazi na ufanisi.

Amesema kupitia matumizi ya teknolojia TRA imekuja na mfumo wa IDRAS unaosimamia kodi za ndani ambao unamuwezesha Mlipakodi kutoa risiti za kielektroniki kwa kutumia simu ya mkononi bila kuwa na mashine hali ambayo imeongeza uhiari katika kulipa kodi na kupunguza kuonana kwa walipakodi na maofisa wa TRA.

Amesema kupitia mkutano huo wataweza kubadilishana ujuzi na mataifa mengine akieleza kuwa matumizi ya teknolojia ya kisasa pia kwa Tanzania yameongeza wigo wa kodi kutokana na kuwapa uhuru walipakodi kujisajili kupitia mtandao na kupata namba ya utambulisho wa mlipakodi (TIN).

Mkutano huo utadumu mpaka Oktoba 09 mwaka huu.




soma zaidi »
Subscribe to: Posts (Atom)